Дэлхийг жанжлах үзэлтэй Америкийн Хятадад үзүүлж буй дарамт ямар ч үр дүнд хүрэхгүй гэлээ

Twitter Print
2021 оны 04-р сар 21-нд 13:20 цагт
Мэдээний зураг,

Си Жиньпин нээлттэй эдийн засагт уриаллаа. Хятадын Хайнань арал дээр өнгөрсөн ням гарагт эхэлсэн Азийн төлөөх Боао форумын үеэр Хятадын Ерөнхийлөгч Си Жиньпин коронавирусын цар тахлын улмаас уналтанд орсон эдийн засгийг сэргээхэд улс орнууд "нээлттэй эдийн засаг"-гийн зарчмаар хамтран ажиллах нь нэн чухал болохыг анхааруулжээ.

Тэрээр, "Хана босгох эсвэл хагалан бутаргах оролдлого хийх нь эдийн засгийн хууль дүрэм, зах зээлийн зарчимтай зөрчилдөнө. Энэ нь ямар ч ашиггүйгээр бусдын эрх ашгийг хохироосон үйлдэл юм. Зөвхөн нэг ба цөөн хэдэн улс өөрсдийн тогтоосон дүрэм журмаа, нэг талыг баримталсан үзэл бодлоо бусдад тулгах явдлыг бид зөвшөөрөх ёсгүй. Том гүрнүүд өөрсдийн том гүрэн гэсэн статусдаа тохирсон байдлаар маш өндөр хариуцлагатайгаар шийдвэр гаргах ёстой. Бусдыг захирч, бусдын хэрэгт хошуу дүүрэх явдлыг хэн ч дэмжихгүй." хэмээн онцолжээ.

Си Жиньпин хэлсэн үгэндээ ямар нэг орныг онцолж нэрлээгүй ч ажиглагчид түүнийг сүүлийн саруудад Хятадын эсрэг олон тооны хориг арга хэмжээ аваад буй АНУ-ыг шүүмжилж байна хэмээн үзжээ. Өнгөрсөн сард АНУ болон түүний түнш орнууд Хятадын эрх баригчид Шиньжаан дахь шашны цөөнх уйгурчуудын эрхийг ноцтойгоор зөрчиж байна гэсэн үндэслэлээр Шиньжаан мужийн томоохон албан тушаалтнуудад хориг тавьсан билээ.

Түүнчлэн Ерөнхийлөгч асан Доналд Трампын Хятадын технологийн томоохон компаниудад тогтоосон хоригууд хэвээр байгаа юм. Бизнесийн салбарын олон мянган төлөөлөл болон улс төрчид оролцсон Боао форумд Америкийн томоохон компаниудын төлөөлөл, хөрөнгө оруулагчид оролцсон ба өнгөрсөн даваа гарагт болсон хэлэлцүүлэгт Америкийн хөрөнгө оруулалтын Blackstone группыг үндэслэгч Стивен Шварцман, дэлхийн хамгийн том хэдж санг үүсгэн байгуулагч, тэрбумтан Рэй Далио нар оролцжээ. Түүнчлэн форумын үеэр явагдах хэлэлцүүлгүүдэд Apple компанийн гүйцэтгэх захирал Тим Кук, Tesla компанийн гүйцэтгэх захирал Илон Маск нар оролцоно гэдгийг зохион байгуулагчид онцолжээ.

Ерөнхийлөгч Си Жиньпиний хувьд Хятадад хөрөнгө оруулах хүсэлтэй гадаадын компаниудад дэмжлэг үзүүлнэ гэсэн амлалтаа дахин дурдаж, эдийн засгийн хөгжил болон ахиц дэвшилд нээлттэй байдал хамгийн чухал гэдгийг онцолсон байна. Түүнээс гадна тэрээр улс орнуудыг дэлхийн цаг уурын өөрчлөлтийн эсрэг хамтдаа тэмцэж, Парисын гэрээг хэрэгжүүлэхийн тулд илүү их хичээл зүтгэл гаргах шаардлагатай хэмээн уриалжээ.

Ерөнхийлөгч Си Жиньпин өнгөрсөн даваа гарагт ХБНГУ болон Францын төрийн тэргүүнүүдтэй цахимаар холбогдож, Хятад улс цаг уурын өөрчлөлттэй холбоотой асуудал дээр дээрх хоёр улстай хамтран ажиллана гэдгээ амлажээ.

Эх сурвалж: https://edition.cnn.com/2021/04/20/business/xi-jinping-boao-forum

Орчуулсан: Содномцэрэнгийн Энхзаяа

mongolcom.mn

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.