Дэлхийн аваргын мэргэн бууч шигшээ багаасаа зодог тайллаа

Дөрвөн жилд нэг удаа зохиогддог хөлбөмбөгийн дэлхийн аваргад “Од” болон гялазлана гэдэг хүн бүрт тохиох аз биш билээ. Пеле, Д.Марадона, Ф.Пушкаш, З.Зидан “World cup”-аас тодрон гарч ирсэн. Гэвч дээрх тоглогчдоос хэн нь ч дэлхийн аваргад 16 гоол оруулж чадаагүй юм. 84 жилийн түүхтэй “Мунидалд” Польшийн жижигхэн хотод төрж Германд ирж суурьшсан даруухан намтартай М.Клозе бүх цаг үеийн мэргэн бууч нь болж түүхэнд нэрээ үлдээлээ.

Германы шигшээ багийн довтлогч М.Клозе 1978 оны зургаадугаар сарын 9-нд Польшийн Ополе хотод төржээ. Түүнийг бага байхад нь гэр бүл нь хил давснаар Германы иргэн болсон аж. Орон нутгийн Блаубах-Дидедкопф хэмээх жижигхэн багаас хөлбөмбөгчний замналаа эхэлсэн Мирослав 1998-2004 оны хооронд “Хамбург 08” II, “Хамбург 08”, “Кайсерлаутерн” II, “Кайсерлаутерн” зэрэг багт тоглож байжээ. Хөлбөмбөгийн спортоор дэлхийд тэргүүлдэг Германд мэргэжилтнүүдийн хараанд өртөж шигшээ багт орно гэдэг тийм ч амар зүйл биш аж. Тэрээр “Кайсерлаутерн”-д харьяалагдаж байхдаа шигшээгийн цугларалтанд дуудагдаж 2001 онд Бундестимийн гишүүн болсон.

Аз болоход ганцхан жилийн дараа Азид дэлхийн аваргын тэмцээн болж залуу туршлага багтай М.Клозе шигшээ багаа төлөөлөн оролцсон нь саяхан мэт санагдаж байна. Эхний тоглолтонд Саудын Арабаар “сагс” тоглоход Клозе гурван гоол оруулахдаа бүгдийг нь толгойгоороо цохиж оруулжээ. Дараа нь Ирланд, Камеруны хаалганд тус нэг бөмбөг толгойгоор оруулахыг Ф.Беккенбауэр “Энэ хүү толгойгоороо тоглодог шигээ хөлөөрөө ингэж сайн тоглодог болоосой” гэж хэлж байлаа. Харин Клозе дөрвөн жилийн нутагтаа хөлөөрөө сайн тоглодог болохоо харуулж таван гоол оруулж мэргэн бууч нь болсон.

“Бразил 2014”-т алтан медаль хүртсэн тэрээр ФИФА-гийн түүхэнд маш олон дээд амжилтыг эвдсэн юм. Эдгээр нь дөрвөн дэлхийн аваргаас медаль хүртсэн анхны, цор ганц хөлбөмбөгч, 16 гоол оруулж бүх цаг үеийн мэргэн бууч нь болсон, дэлхийн аваргад 17 тоглолтонд оролцож ялагч болсон анхны тамирчин, гурван дэлхийн аваргад дөрөв ба түүнээс дээш гоол оруулсан анхны хөлбөмбөгчин зэрэг олон рекордыг эзэмжих болжээ.

2001-2014 оны хооронд 13 жил Германы шигшээд хүчин зүтгэсэн М.Клозе хэдхэн хоногийн өмнө Бундестимээс зодог тайлж буйгаа мэдэгдсэн. Тэрээр сэтгүүлч нарт хэлэхдээ “Дэлхийн аваргад түрүүлнэ гэдэг миний мөрөөдөл байсан. Алтан медальтай, дээд амжилттай зодог тайлна гэдэг хэн бүхэнд тохиолдоод байдаггүй хувь тохиол. Би маш их аз жаргалтай байна” гэж хэлсэн.