Оршуулгын зардлын 1 сая төгрөгийг нь Төрийн банк жилийн дараа шүүхээр шийдвэрлүүлж аваарай гэжээ

Twitter Print
2020 оны 03-р сар 16-нд 18:55 цагт
Мэдээний зураг,

Арван дөрвөн жилийн өмнө Солонгост ажлын гэрээгээр явсан зээ дүү метроны осолд орж хөгжлийн бэрхшээлтэй болсон юм. Ээж нь миний төрсөн дүү. Тэр маань хүүгээ асарч байгаад 3 жилийн өмнө зуурдаар өөд болсон тул ганц дүүтэйгээ үлдсэн хэвтрийн залууг харж хандах ажил миний толгой дээр ирсэн юм.

Өөртөө үйлчлэх 100 хувийн чадваргүй өвчтөнг гэртээ байнга асрах хэцүү байсан ч яалтай. Ядахад хань минь бие муутай бас л "асаргааны" хүн. Гурван жил гаруй хугацаанд манай байдал сайнгүй байсан учраас залуугаа асрамжийн газар өгөхөөр бүтэн жил тойрон хөөцөлдөөд барсангүй. Дүүрэг хорооны халамжийн, нийгмийн ажилтнууд ёстой хөлдүү махнууд юм билээ. Ядарсан хүний төлөө явна гэж гонж! Цалин л хүлээдэг амьгүй албатууд!

Хөгжлийн бэрхшээлтэй иргэнийг авдаг "Ачлалт хүүхдүүд", "Бат гэрэлт ирээдүй" гэх асрамжийн газрууд ч шал худлаа. Ядарсан хүний нэр барьж, хаанаас хэдэн төгрөг олдох бол хэмээн анаж суудаг "горьчхон бизнесчид"!

Энэ ч яахав, гол нь хэвтрийн залуу маань сарын өмнө нас барав. Ах дүү муутай бидэнд хүндхэн нөхцөл бий болсон нь оршуулах мөнгө! Уг нь Халамжийн газраас оршуулгын зардал болох 1 сая төгрөг өгдөг гэнэ. Хоёр өдрийн турш нас барсны гэрчилгээг нь авах гэж хэдэн байгуулгын дунд гүйсээр арайхийн бүтээгээд очтол БЗД-ийн Хөдөлмөр нийгэм халамжийн хэлтэс "-Хурлаар орж байж 10 хоногийн дараа зөвшөөрөгдөнө. Дараа нь санхүүжилт хүлээх ёстой" гэж айлдав.

Талийгчаа хөдөөлүүлэлгүй сар хүлээлтэй биш, зардлын сая төгрөгийг хувь хүнээс зээлж, амьтан хүний өгсөн "буяны мөнгөөр" болгочихлоо.

Тэгээд өнөөдөр /3.16/ мөнгө нь орсон гэхээр Төрийн банкны Гачуурт салбар дээр яваад очтол бүтсэнгүй. "Мөнгө нь орсон, гэхдээ жилийн дараа өмчлөлийн эрх үүсэхээр шүүхээр шийдвэрлүүлж аваарай" гэнээ. Яагаад?

"-Яагаад асарч байсан хүний итгэмжлэл байхад авч болохгүй гэж? Бүх бичиг баримт нь байна шүү дээ?" хэмээн асуувал тус салбарын эрхлэгч, "-Яагаад гэвэл итгэмжлэл дээр чинь оршуулгын зардал авна гэсэн үг алга" гэв.

Энэ үгийг би нотариатчиноор бичүүлэх ёстой байж! Ийм юм гэж байж болох уу, та минь ээ? Арай л хөгийн үү?

Сураглаад байсан чинь тус салбар ядарсан хүмүүсийг байнга ингэж зовоодог гэнэ.

Ингэхэд ХАЛАМЖ гэдэг юу вэ? Ер нь хэнд, ямар хүнд халамж хэрэгтэй байдаг билээ? Тэд үхвэл ар гэр нь оршуулахгүйгээр сар хүлээх ёстой юу? Эсвэл жил хүлээх ёстой болж байна уу?

Одоо би яах ёстой вэ? Улсаас халамжийн байгууллагаар дамжаад орж ирсэн мөнгийг төрийн банк яагаад өгөх дургүй юм бэ? Энэ банкны хүнд суртал зовсон, ядарсан хүмүүст яасан хатуу байдаг юм бэ!

Иргэн Надмид овогтой Мандал

2020 оны 3-р сарын 16

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.