Дэлхийн хамгийн өндөр өртөгтэй хотын жагсаалтыг Нью Йорк, Сингапур хоёр тэргүүлжээ

Twitter Print
2022 оны 12-р сар 02-нд 11:34 цагт
Мэдээний зураг,

Их Британийн Economist Intelligence Unit судалгааны төвөөс жил бүр дэлхийн хамгийн өндөр өртөгтэй хотуудын жагсаалтыг гаргадаг билээ. Тэгвэл энэ жилийн хамгийн өндөр өртөгтэй хотуудын жагсаалтыг Сингапур, Нью Йорк хотууд хамтдаа тэргүүлсэн байна.

Нью Йорк хотын хувьд уг жагсаалтыг анх удаагаа тэргүүлж байгаа бол өнгөрсөн жил 1-т бичигдсэн Тель Авив хот энэ жил жагсаалтын 3-т бичигджээ.

Энэ жилийн жагсаалтаас харвал дэлхийн томоохон хотуудад амьдралын өртөг дунджаар 8.1 хувиар өссөн байна. Украинд болж буй дайн, коронавирусын цар тахал зэрэг нь тухайн үзүүлэлтийн өсөлтөнд хамгийн ихээр нөлөөлжээ.

Инфляцийн төвшин нь хамгийн ихээр нэмэгдсэн хотуудыг Истанбул 86 хувьтайгаар тэргүүлсэн бол Буэнос Айрест инфляц 64 хувь, Тегеранд 57 хувиар тус тус өссөн байна.

Америкийн Нью Йорк хот жагсаалтыг тэргүүлж, жагсаалтын эхний 10-т Лос Анжелес, Сан Франциско хотууд мөн багтсан нь Америкт инфляцийн төвшин өнгөрсөн 40 жилд байгаагүй өндөр төвшинд хүрч, долларын ханш чангарсан зэрэг нөлөөлжээ.

ОХУ Украин руу довтолсонтой холбоотойгоор АНУ, Европын холбооны хориг тавьсантай холбоотойгоор Москва, Санкт-Петербург хотуудын амьдралын өртөг нэмэгдэж, Москва жагсаалтын 37, Санкт-Петербург 73-т бичигджээ. Жагсаалтыг гаргахдаа дэлхийн 173 хотын 200 гаруй бараа бүтээгдэхүүн, үйлчилгээний үнийг америк долларт шилжүүлэн харьцуулдаг ч энэ жилийн судалгаанд Киев хотыг хамруулаагүй байна.

Судалгааг хариуцсан мэргэжилтэн болох Упасана Даттын хэлж байгаагаар Украинд болж буй дайн, ОХУ-д тогтоосон барууны хориг арга хэмжээнүүд мөн Хятадын цар тахлын эсрэг бодлого зэрэг нь бараа бүтээгдэхүүний нийлүүлэлт доголдоход хүргэсэн ба үүн дээр бодлогын хүүгийн өсөлт, валютын ханшийн өөрчлөлт зэрэг нэмэгдсэн нь дэлхий даяар амьдралын өртөг нэмэгдэхэд хүргэжээ.

Дэлхийн хамгийн өндөр өртөгтэй хотуудын жагсаалтын эхний 10-т Нью Йорк, Сингапор, Тел Авив, Хонгконг, Лос Анжелес, Цюрих, Женев, Сан Франциско, Парис, Сидней, Копенгаген зэрэг хотууд багтсан бол хамгийн хямд өртөгтэй хотуудад Дамаск, Триполи, Тегеран, Тунис, Ташкент, Карачи, Алматы, Ахмедабад, Шеннай, Алгиерс, Банголор, Коломбо зэрэг хотууд тус тус багтжээ.

Эх сурвалж:  https://www.bbc.com/news/world

Содномцэрэнгийн Энхзаяа

mongolcom.mn

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.