Бангкок хотод халдварын тоо нэмэгдэж байна

Twitter Print
2021 оны 07-р сар 29-нд 14:54 цагт
Мэдээний зураг,

Тайландад коронавирусын халдварын тархалт нэмэгдэж байгаатай холбогдуулан сайн дурын ажилчид өнгөрсөн лхагва гарагт Бангкок хотын олон улсын Донмыанг нисэх буудлын каргоны агуулахыг коронавирусын халдвартай иргэдийг хэвтүүлэх 1800 ортой хээрийн эмнэлэг болгон тохижуулжээ.

Өнгөрсөн лхагва гарагт л гэхэд Тайландад коронавирусын халдварын 16 533 тохиолдол бүртгэгдэж, уг вирусын халдварын улмаас 133 хүн нас баржээ. Коронавирусын цар тахал эхэлснээс хойш тус улсад коронавирусын халдварын нийт 543 гаруй тохиолдол бүртгэгдэж, уг вирусын халдварын улмаас 4397 хүн нас барсан юм.

Тус түр эмнэлэгт коронавирусын халдвартай, КОВИД-19 өвчний шинж тэмдэг хөнгөн илэрч байгаа өвчтнүүдийг хүлээн авах ба өвчтнүүдийн биеийн байдал хүндэрсэн тохиолдолд өөр эмнэлэг рүү шилжүүлэх гэнэ.

Мэргэжилтнүүдийн хэлж байгаагаар коронавирусын халдвар авсан иргэдийн тоо өсөх хандлагатай байгаа ба нэмж түр эмнэлгүүд байгуулах шаардлагатай байгаа аж.

Бангкок хотод коронавирусын халдвар хурдацтай тархаж байгаатай холбоотойгоор тус хотын эрүүл мэндийн тогтолцоо ачааллаа дийлэхээ больсон ба иргэд коронавирусын эсрэг дархлаажуулах ажил удаашралтай явагдаж байгаад бухимдалтай байна.

Тайландын эрх баригчид энэ оны сүүл гэхэд 50 сая иргэнийг коронавирусын эсрэг вакцинд хамруулах зорилт тавьсан ч өнөөдрийн байдлаар 66 сая гаруй хүн амынх нь 5.6 хувь нь л коронавирусын эсрэг вакцинд бүрэн хамрагдаж, 19.2 хувь нь эхний тундаа хамрагджээ.

Эх сурвалж: https://edition.cnn.com/2021/07/28/asia/thailand-covid-19-hospital-bangkok

Содномцэрэнгийн Энхзаяа

mongolcom.mn

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.