Долоо хоногийн тойм

Twitter Print
2014 оны 08-р сар 09-нд 13:37 цагт
Мэдээний зураг,

Улс төр, нийгмийн амьдралд онцлох үйл явдлаар дүүрэн долоо хоног болж өндөрлөлөө. МАН-аас АН болон Засгийн газрын хууль зөрчсөн үйлдлүүдийн талаар мэдээлэл хийсэн бол Төрийн тусгай хамгаалалтын газраас АТГ-ыг Төрийн нууц задруулсан хэмээн шалгуулахаар Тагнуулын Ерөнхий газарт хүргүүлсэн, Зам тээврийн яамны Төрийн нарийн бичгийн дарга Б.Батзаяаг албан тушаалаас нь чөлөөлсөн, Э.Бат-Үүл даргын замын түгжрэлийг бууруулах журмыг иргэд хүлээн зөвшөөрөхгүй гээд олон үйл явдлыг нэрлэж болох юм. Ингээд www.mongolcom.mn сайт энэ долоо хоногт болсон үйл явдлыг тоймлон хүргэж байна.

С.Батцэцэг алтан медаль хүртлээ

Польшийн Домброва Гурнича хотод болсон Вацлав Циолковскийн дурсгалд зориулсан эрэгтэй чөлөөт бөхийн ХХIII болон эмэгтэй чөлөөт бөхийн “Poland Open” ХYIII дахь уламжлалт олон улсын тэмцээн хоёр өдөр үргэлжилж дууслаа.

Эмэгтэй чөлөөт бөхийн 53, 58, 63, 75 кг-ын жингүүдийн барилдаан болж, манай 6 эмэгтэй бөх дэвжээнд гарч хүч үзсэнээс 63 кг-ын жинд Гавьяат тамирчин С.Батцэцэг алт, 53 кг-ын жинд олон улсын хэмжээний мастер Э.Сумьяа мөнгө, 53 кг-ын жинд олон улсын хэмжээний мастер Э.Даваачимэг, 75 кг-ын жинд Гавьяат тамирчин О.Бурмаа нар хүрэл медаль авлаа.

БНХАУ-аас 100 хүүхэд манайд зочиллоо

Монгол Улс- БНХАУ хооронд дипломат харилцаа тогтсоны 65 жилийн ой, “Монгол Хятадын соёл, урлаг, хүмүүнлэгийн солилцооны жил” энэ жил тохиож байгаа. Үүнтэй холбогдуулан Ерөнхий сайд Н.Алтанхуягийн урилгаар БНХАУ-ын Ляонин мужийн Ардын Гадаадтай Найрамдлаар Харилцах Нийгэмлэгийн даргаар ахлуулсан 100 хүүхэд манай улсад зочиллоо.

Хүүхдүүдийг Монгол улсын Ерөнхий сайд Н.Алтанхуяг Олон улсын хүүхдийн найрамдал зусланд хүлээн авч уулзсан юм.

Ц.Мянганбаярт торгуулийн ял оноолоо

“Монгол газар” компанийн захирал Ц.Мянганбаярт холбогдох хэргийг дүүргийн эрүүгийн хэргийн анхан шатны хоёрдугаар шүүхэд хэлэлцээд, түүнийг хууль бусаар алт олборлосон хэмээн үзжээ. Ц.Мянганбаяр тэргүүтэй долоон хүнийг Өвөрхангай аймгийн Уянга сумын нутагт хууль бусаар ашигт малтмал олборлон онц их хэмжээний хохирол учруулсан гэмт хэрэгт буруутгажээ. Шүүхээс Ц.Мянганбаярт яллах дүгнэлт үйлдсэн бол бусад холбогдогч нарын хэргийг хэрэгсэхгүй болгожээ. Шүүхээс түүнийг улсад 190 орчим сая төгрөгийн хохирол учруулсан, хэдий ч улсад учруулсан хохирлоо нөхөн төлсөн зэргийг харгалзан 19.2 сая төгрөгөөр торгох шийдвэр гаргасан байна.

Төрийн нарийн бичгийн дарга Б.Батзаяаг огцруулав

Өнгөрөгч пүрэв гаригт хуралдсан Засгийн газрын хуралдаанаар Зам тээврийн яамны Төрийн нарийн бичгийн дарга Б.Батзаяаг чөлөөлөх тухай асуудлыг хэлэлцэж дэмжлээ. Түүнийг ажлын хариуцлага алдсан гэж албан тушаалаас нь чөлөөлсөн байна. Тэгвэл оронд нь  тус яамны Төмөр зам, далайн тээврийн бодлогын хэрэгжилтийг зохицуулах газрын дарга Ё.Манлайбаярыг үүрэг гүйцэтгэгчээр томиллоо.


Паркийн бүх тоглоомыг шалгах ажил эхэллээ
Үндэсний соёл амралтын хүрээлэнгийн бүх тоглоомонд Нийслэлийн мэргэжлийн хяналтын газраас нэгдсэн шалгалт хийж эхлээд байна. Энэ ажил өнгөрөгч баасан гаригт эхэлсэн билээ. 2009 оноос хойш тус хүрээлэн бүх тоглоомоо шинэчилсэн.
Өнөөдрийн байдлаар нийт 50 гаруй тоглоом ажилладаг ч аюулгүй ажиллагааны баталгаа ямар хэмжээнд байгаа нь тодорхойгүй байдаг байна. Тухайлбал, хамгийн сүүлд угсарсан гэх “галзуу хулгана” тоглоом хоёр сар гаруйн хугацаанд тоглоомын тоноглол, аюулгүй ажиллагааны хэрэгсэл дутуу байдалтай хүүхэд багачуудад үйлчилсэн байжээ. Өнгөрсөн долоодугаар сарын 24-ний өдөр уг тоглоом ажиллах явцдаа алдаа гаргаснаар хяналтын байцаагчид очиж ажилласан юм. Шалгалтын дүнг олон нийтэд нээлттэй мэдээлнэ.

Галзуу Бумаагийн дүрээр алдаршсан жүжигчин Т.Цэвээжавд хөшөө босгожээ

"Сэрэлт" киноны Бумаагийн дүрээр олноо алдаршсан 20-р зууны манлай эмэгтэй жүжигчин Т.Цэвээнжав гуайн дурсгалд зориулсан төрсөн нутаг Дорнод аймгийн Матад суманд хөшөөг нь босгожээ.

Түүнийг хөшөөг босгох гэж байгаа талаар өнгөрсөн тавдугаар сард Улсын драмын эрдмийн театрын дэд захирал, төрийн соёрхолт жүжигчин Н.Сувд, Монгол Улсын гавьяат жүжижгчин Б.Тунгалаг нар хэвлэлийн бага хурал хийж, хандивын данс нээж байсан билээ. Харин гурван сарын дараа ийнхүү хөшөөг нь босгожээ.

Иргэд нэгдэн эсэргүүцлээ илэрхийлнэ гэв

Нийслэлийн засаг дарга Э.Бат-Үүлийн санаачилгаар автомашинтай иргэд хотын төвөөр зорчихдоо 40-50 мянган төгрөг төлдөг болох журмыг энэ сарын 13-ны өдөр Нийслэлийн ИТХ-ын тэргүүлэгчдийн хуралдаанаар хэлэлцэхээр болсон билээ.
Тэгвэл энэхүү журмыг эсэргүүцэх иргэд улам нэмэгдсээр байгаа. Мөн цахим ертөнцөд нэгдсэн хөдөлгөөнүүд бий болоод байна. Тэд ирэх даваа гарагт замын хөдөлгөөнийг хааж жагсаал зохион байгуулахаар төлөвлөж байгаа аж.

Ховд аймгийн бага Олимп эхэллээ

Баруун бүсийн тулгуур төв болсон Ховд аймагт энэ сарын 06-наас 11-ны өдрүүдэд “Ховд-2014” бага олимп эхэлж байна. Хүн төрөлхтний эв нэгдэл, спортын их баяр болсон олимп, тив, дэлхийн наадамд амжилттай оролцох Монголын тамирчдынхаа залуу халааг бэлтгэх том зорилгын дор Монголд анх удаа Ховдчууд ийнхүү санаачилга гарган нутагтаа 1500 гаруй тамирчин, 90 гаруй шүүгчдийг хамруулсан спортын бага олимпийг өнөөдрөөс эхлэх зохион байгуулахаар бэлтгэл ажлаа хангалаа.

ССАЖЯ, МҮОХ, Ховд аймгийн Засаг даргын Тамгын газар, Ховд аймгийн Хөгжлийн төлөө сангаас хамтран зохион байгуулж байгаа “Ховд-2014” бага олимпд тус аймгийн 16 сум, аймгийн төвийн буюу Жаргалант сумын 12 баг, нийт 28 багийн 1500 гаруй тамирчид спортын 14 төрлөөр 6 өдрийн туршид өрсөлдөх юм. Нэг багт 50 тамирчин багтах бөгөөд үндэсний бөх, жүдо, чөлөөт бөх, сур харваа, олс таталт, буухиа гүйлт, шатар, даамны төрлүүдээс гадна сагсан бөмбөг, хөл бөмбөг, волейболын төрлүүдээр болох аж. Монгол Улсын Ардын багш, Спортын бэлтгэлийн төвийн ерөнхий дасгалжуулагч А.Басхүүгээр ахлуулсан 90 орчим шүүгч бага олимпийн наадмын үеэр ажиллахаар болжээ.

Талийгаачийг эсэн мэнд олох боломжтой байжээ

Баянхонгор аймгийн Баян-Өндөр сумын нутагт геологич Б.Мөнх-Эрдэнэ гэх залуу сураггүй алга болж, долоо хоногийн дараа түүний цогцсыг олсон харамсалтай хэрэг гарсан. Геологич залууг долдугаар сарын 24-ний шөнө төөрч алга болсныг өнгөрсөн сарын 29-ний орой Ашигт малтмалын газрынхан мэдсэн байна.

Тэгвэл талийгаачийг “алга болсноосоо тав хоногийн дараа харангадаж амиа алдсан” гэх Шүүх эмнэлгийн урьдчилсан дүгнэлт гарлаа. Өөрөөр хэлбэл эрлийн баг шуурхай ажилласан бол талийгаачийг эсэн мэнд олох боломжтой байжээ.

Жагсаал хийхийг завдсан хятад улсын иргэдийг албадан гаргалаа

“Бэрэн” ХХК-ийн барилга дээр ажиллаж байсан хятадууд жагсаал хийхдээ тулж, түүнийг цагдаагийнхан Иргэний харъяалал, шилжилт хөдөлгөөний газарт шилжүүлээд байсан.  Тэгвэл жагсаал хийхийг завдсан Хятад улсын 100 гаруй иргэнийг өнгрөгч долоо хоногт албадан хил гаргажээ. Тэдний шалгах явцад 42 нь визний зөрчилтэй болох нь тогтоогдсон байна.

АТГ-ыг ТЕГ шалгав

Төрийн тусгай хамгаалалтын газраас АТГ-ыг Төрийн нууц задруулсан хэмээн Тагнуулын ерөнхий газарт хандаж байгаа талаар мэдээлсэн. Учир нь АТГ-аас Ерөнхий сайд Н.Алтанхуягийн хорих ангид очсон бичлэгийг олон нийтэд тараасан билээ.
Энэ нь Эрүүгийн хуулийн 87-р зүйл буюу төрийн нууцыг задруулсан хэрэгт тооцогдож байгаа юм. Ерөнхий сайд Төрийн тусгай хамгаалалтын газрын I зэргийн хамгаалалтад байдаг өндөр албан тушаалтан. Тиймээс хамгаалалттай байх үед нь нууцаар бичлэг хийн, олон нийтэд тараасан нь төрийн нууцыг задруулсан гэж үзэж байна.

 

Сэтгүүлч Г.Ганчимэг

E-mail: mongolcom.mn@gmail.com
Утас: 76110303, 76110505

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.