Ёс ёмбогор...

Twitter Print
2020 оны 02-р сар 09-нд 11:19 цагт
Мэдээний зураг,

Өвчин, зовлон хоёр хэлж биш хийсэж ирдэг гэдэг. Хүчирхэг хөршийг сандаргаж, хөвчин дэлхийг түгшээж буй энэ өвчнөөс төр ч, түмэн ч бултаараа сэргийлж, хичээх нь зүйн хэрэг.

Энэ үеэр Монгол түмний нэгэн их баяр Цагаан сар ч давхцаж, тэмдэглэхгүй, тэмдэглэнэ гэлцэн маргаж мэтгээд эхлэв үү дээ. Уг нь маргаад байх ч юм үгүй санагдах.

- Хавтгай золголтыг хязгаарлаж, /Төрийн золголт ч орно/

- Бөхийн барилдаан зэрэг нийтийг хамарсан арга хэмжээг хориглох ёстой.

Түүнээс нэг гэртээ хамтдаа амьдарсаар буй аав ээжээ хоймроо суулгаад золгох, эцэг эх нь үр хүүхдээ татаж үнсэх, орон гэртээ идээ будаагаа өрөөд, гэр бүл дотроо сайн сайхан үгсээ хэлэлцээд суух, гал голомт, тэнгэр хангайдаа дээж юугаа өргөн, ёсоо ёслохыг хориглоно, цуцлана, хойтон давхар золгоно гэвэл тэр хэтрүүлэг ч, хийрхэл ч болно. Энэ чинь хэн нэгний хүслээр хойшлуулчихдаг, хойтон болгочихдог, бас цуцалчихдаг зүйл биш, цагтай, зүгтэй ёс. Ёс гэдэг мухар сүсэг биш. Хуулийн эх нь ёс, бүр оршихуйн эх нь ч ёс.

Гагцхүү зах хязгаартай байж, цадиггүй хэсдэгээ татаж, ариутгал энэ тэрээгээ сайтар хийхэд л анхаарах юм. Нэг хашаанд, эсвэл нэг өвөлжөөнд, нэг хаалганд нэг нэгнийдээ орж гарсаар байгаа хөгшид дээрээ гэнэтхэн Шинийн нэгний өглөө орохоо больчих уу?

Нэг ширээний ард зэрэгцэж суугаад хоол ундаа идэж, үнэрлээд унтуулж байгаа үр хүүхэддээ гэнэтхэн Шинийн нэгэнд хошуу хүргэхээ больчих уу?

Одоо бид автобусанд хамтдаа суудгаараа сууж, албан ажил явдгаараа явж, дэлгүүр хоршоогоор үйлчлүүлж, нэг нэгнээрээ орж гарсаар л байгаа санагдана. Ийм нөхцөлд орон гэртээ тэрүүхэндээ ёсоо ёслоод өнгөрөхөд ер Хорооноо вирусын хамаатан болчихгүй.

Хятад шиг хүмүүс гадагшаа гарахгүй хөл хориод, хоол хүнсийг нь гаднаас тусгай хүмүүс хүргэж өгдөг нөхцөлд ч, бүр ганц ганцаараа тусгаарлагдсан нөхцөлд ч нөхцөл байдалдаа тохируулаад ёсоо ёсолж л таарна. Ёс ёмбогор. Одоо ч хятадууд цаасан буугаа тагтан дээрээсээ буудуулж л байна.

Холд зүтгэж очдог хөгшиддөө утсаар ч болов мэнд мэдэж, бүр боломгүй бол хэдэн төгрөг дансаар шилжүүлчихсэн ч болохгүй юмгүй. Хавраас цаг наашлахаар уулзаж учирна биз. Ер нь ч амжилгүй бол тэгдэг л байж.

Энэ чинь ёсолж буй болохоос цуцалж буй хэрэг биш шүү дээ. Ор тас дүлий дүмбэн суух, хориглох, цуцлах боломжгүй. Тийм атал цуцлах, хориглох тухай сэвж шуугиан маргаан дэгдээхгүй л баймаар...

Харин 3 сар гартал байдал сайжрахгүй бол Мартын 8, Цэргийн баяр зэрэг баяруудыг ёстой тас цуцалж, хориглож болно. Март, цэргийн баяр бол уламжлалт их ёс биш.

Нийтлэлч Б.Наминчимэд 

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.
    • Zochin

      (66.181.179.82) 2020-02-09 12:54
      • 0
      • 0

      Zolgolt hereggui gd bhd yun es tur bee urd huchirheg uls darj chadahgui bhd ene jildee teseed ungurch bno shuu dee

      Хариулах