Хямралаас зайлсхийх санаатай барууныханы солиорол

Twitter Print
2014 оны 08-р сар 08-нд 17:29 цагт
Мэдээний зураг,

Украиныг тойрсон хямралаас ямар арга замаар зайлсхийж болох вэ? Дэлхий дахины тэргүүлэх улс төр шинжээчид, эрдэмтэн тоймчид өнөөдөр үүнд тохирох арга зам, гарц хайх болсон бөгөөд өдрөөс өдөрт өргөжин тэлэх болсон энэ хямрал хэр удаан үргэлжилж, юунд хүрч төгсөхийг урьдчилсан харсан дүн шинжилгээ хийхийг хичээж байна. Нэг талаас Америк тэргүүтэй өрнөдийн орнууд ОХУ-ыг улам шахаж хавчихын тулд Азийн орнууд, тэр дундаа стратегийн ойрын түнш болсон Хятадыг Оросын эсрэг хориг арга хэмжээ авахыг уриалж байгаа энэ цаг үед Оросууд харин ямар хариу барих бол?

Өнгөрсөн жил Барак Обамагийн засаг захиргаанаас Сирид агаараас цохилт өгөх шийдвэр гаргасны дараа ОХУ-ын ерөнхийлөгч Владимир Путин төрийн нарийн бичгийн дарга Жон Керритэй уулзаж хурцадмал нөхцөл байдлыг тун зохистой аргаар өөрчилж Сирийн химийн зэвсгийг устгах шийдвэрт хүргэсэн билээ. Харин үүний хариуд Америкчууд Украины хямралаар далимдуулан Путинд хариу барих арга сэдэх хэрэгтэй гэж Brookings Institution-ны эрдэм шинжилгээний ажилтан, Тафтс их сургуулийн профессор Дэниэл У.Дрезнер үзэж байгаагаа  The Washington Post сонинд тэмдэглэсэн байна.

Түүний онцолж байгаагаар Украинаас салан тусгаарлахаар босогчид одоогоор ялагдал хүлээж байгаа боловч Украины цэргийн хүчин хэсэг хугацааны дараа маш хүчтэй эсэргүүцэлтэй тулгарах болно. ОХУ "Дорнод Украинд хүмүүлэгийн болоод энхийг сахиулах ажиллагаа явуулах нэрийн дор цэргийн хүч оруулахаар төлөвлөж байгаа" хэмээн НАТО-гийн төлөөлөгч болон Польшийн Ерөнхий сайд болгоомжилсон байр сууринаас мэдэгдэл хийж байсан. Гэхдээ Путины хувьд энэ нь тийм сайн арга зам биш, учир нь Украинд цөмөрч орох асуудал цус урсгалгүйгээр бүтэх ажил биш болохоор Путин өөрийгөө гарах гарцгүй байдалд оруулах болно гэж тэрээр үзэж байгаа аж.

Оросууд уг мөргөлдөөнд оролцоно гэдэг Донецк, Луганск дахь хүмүүнлэгийн нөхцөл байдлыг илт дордуулна. Тиймээс Дрезнер: "НҮБ-ын энхийг сахиулагчдыг Дорнод Украинд оруулж, энгийн оршин суугчдыг хамгаалах үйл ажиллагаа явуулж яагаад болохгүй байхав?" гэсэн санaл тавьж байгаа аж. Хэрвээ Оросууд үүнийг зөвшөөрвөл энхийг сахиулах үйл ажиллагаанд ихээхэн дэвшил гарна. Үүнд:

1) Хүчирхийлэлийг зогсоож, хүмүүнлэгийн тусламж хүргэх зурвас гарган Донецк, Луганскаас энгийн оршин суугчдыг нүүлгэн шилжүүлэх боломжтой болно.

2) "НҮБ-ын энхийг сахиулагчид очсон даруй ОХУ бүс нутагт хүч хэрэглэх боломжыг таслан зогсооно" гэж профессор үзэж байгаа аж.

3) Бүх талууд цаг хожих болно. Украины засгийн газарт энэ нь нэн чухал шаардлагатай байгаа. Төрийн байгуулалтаа тэд шинэчлэн өөрчилж, армиа бэхжүүлэн дараагийн болзошгүй хямралыг сөрөн зогсох чадвартай болох юм.

4) Путин мөн арьсаа хамгаалж, уснаас хуурай гарахын тулд яриа хэлэлцээр хийж эхэлнэ. "Хэрвээ салан тусгаарлагчид бүрэн ялагдал хүлээсэн тохиолдолд, ОХУ дипломат арга замаар ялалтад хүрсэн мэтээр Путины ухуулга сурталчилгааны машин дуугарч эхэлнэ".

5) Порошенко мөн магадгүй алсаа бодож, Дорнод Украины хот суурингуудыг цус асгаруулан булааж авахаас зайлсхийх болно.

Энэ маягийн төлөвлөгөө гүйцэлдэх эсэх нь эргэлзээтэй хэдий ч үзээд алдахад илүүдэхгүй гэж Дрезнер үзэж байгаа бөгөөд эс тохиолдолд Путин наад зах нь "тал тохой татсан байр суурь баримталж, Сирид баримталж байгаа бодлогоосоо татгалзахад хүрнэ". Цаанадаж олон хүний амь насыг аврах үйл хэрэг болно гэж тэмдэглэжээ.

Оросууд болоод Дорнод Европыг Америк, Өрнөдийнхөн огт мэдэхгүй, ойлгохгүй байдаг нь эндээс харагдаж байгаа бөгөөд өрнөдийн улс төрчдөөр зогсохгүй улс төр, эдийн засгийн нэр нөлөө бүхий шинжээч, тоймчид хүртэл Орос зан төлөвийг ойлгодоггүй тул Оросуудын нийгэм улс төрийн бодлого, нөхцөл байдлын талаар хэт эндүү ташаа мэдээлэл өгдөгөөс олон нийтийн санаа бодол ч Сибирийн шивэр их хөвчид төөрсөн анааш мэт төөрөлдөж хоцордог байна. Харин энэ хөвчийн хүрэн баавгай  өрнөдийн иргэншсэн нийгэмд заналхийлсэн харь гарагийн амьтан мэт сэтгэхүй тогтоосон байдаг аж. Хүйтэн дайны үед ийм байсан, одоо ч ийм сэтгэхүй амь бөхтэй зууралдсаар байгаа учир барууны хэвлэл мэдээллийн тоймоос дэлхий дахин үнэн зөв үзэл баримтлалтай, бодит мэдээлэл олж авна гэж найдалтгүй. Сирийн хувьд Оросын баримталж ирсэн бодлого Америкчуудын урдаа барьдаг хүмүүлэгийн эрх зүйтэй яв цав нийцэж байгаа боловч өнөөдөр бүх талаараа нэгэнт хямралд хүлэгдэж, шалзанд баригдсан утсан улаан гол мэт болсон Америкийн нийгэм бүс нутгуудын хямралаар гол зогоож, дэлхийн эдийн засагт дахин ноёрхлоо тогтоохыг хичээж байгааг бүгд мэднэ. Дайн тулаан гэдэг мөнгө үйлдвэрлэх машин гэдэг ч үнэн юм.

 

Сэтгүүлч Л.Отгонбат

E-mail: mongolcom.mn@gmail.com
Утас: 76110303, 76110505

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.