Монгол хүний багш нь мал юм...

Twitter Print
2020 оны 08-р сар 02-нд 18:36 цагт
Мэдээний зураг,

Монгол хүний багш нь мал гэж хэлсэн Жанцанноров гуайн үгтэй би санал нийлэв. Яахав зарим хүнд ойлгомжгүй байж магадгүй. Баярламаар, гунигламаар, бүүр уйлмаар өчнөөн зүйл болдог юм.

Зовж зүдэрч буй амьтдыг хүүхэд ахуй насандаа зөндөө харж байлаа. Тэр болгонд өрөвдөх, энэрэх, хайрлах сэтгэл төрдөг байсан. Ботго нь үхсэн ингэ өдөржин ботгоо босоод ирэх юм шиг хүлээж зогсохыг харах ... Сэтгэл гээч бол нураад унадаг л байв. Дэмий л байн байн орж гаран сэмхэн харна.

Эх нь үхсэн ботгыг өөр ингэнд авахуулах гэж хэдэн өдөр ноцолдохыг харах... Тийрч тойрч зугатаад байсан ингэ нь хөөслөхийг сонсон нүднээс нь нулимс унаган уярч "хүний үр"-ийг хүлээж авахыг харах...

Хурга нь үхсэн хонь ишиг хөхүүлэхийг харах... Эхэндээ голоод сүйд болно. Аргаа барахдаа үхсэн хурганы арьсыг ишгэнд тохож хуурахыг харах ... Гэхдээ л 10-д хоногийн уйгагүй хөдөлмөрийн дараа өнөөх хонь ишгээ хөхүүлээд явж л байдаг. Дутуу төрсөн ишгийг томчуул "хаячихсан" байхад хүүхдүүд бид арчилсаар тордсоор босгоод л ирдэг. Тоглож наадаад хад дамжаад гүйхийг харах... Аав ээж магтаж л байдаг. Анчны хавханд ороод хөлөө хугалуулсан хургыг хараад өөртэйгөө зүйрлүүлэн бодож өрөөсөн хөл дээрээ хол явж үзэх ...

Өтчихсөн малыг хүнийх ч хамаагүй тууж ирээд өтнөөс салгаж санаа амарч, ямар гоё байгаа бол доо хэмээн баярлан бодон унтах...

Энэ бүхэн монголчуудыг өрөвдөх сэтгэлтэй, өршөөх тэнхээтэй хүн болоход нөлөөлдөг ажээ.

Жанцанноров: Мал бол монгол хүний багш гэж заримдаа би хэлдэг. Өөрөөр хэлбэл, мал малласан хүн даарахын, өлсөхийн, өнчрөхийн, ядрахын, зовохын бүх зовлонг юуны түрүүнд малаасаа мэдэрдэг. Эндээс хайр бий болдог. Энэ хайр монголчуудыг бусад үндэстнүүдээс хамаагүй өндөрт авч явдаг гэж би итгэдэг. Хөдөө хээр өнчирсөн ботгоо дотроо эзэн хүн бодохдоо үр хүүхэдтэйгээ зүйрлэн боддог. Тэр нь монгол хүнийг хүнлэг, энэрэнгүй байх, орчлон ертөнцтэйгөө зөв харилцах харьцааг бидэнд суулгасан гэжээ.

Д.Оюунгэрэл 

 

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.