Д.Оросоо: Зөвшөөрөлгүй барилгуудыг буулгах болно

Twitter Print
2014 оны 08-р сар 09-нд 15:56 цагт
Мэдээний зураг,

Газар эзэмших үйл ажиллагаа явуулах ямар ч зөвшөөрөлгүй Баянгол дүүргийн 40 дүгээр сургуулийн хашаанд хууль бусаар үйл ажиллагаа явуулж байсан “Нью капитал” компанийн снукер, биллярдын газрыг албадан буулгалаа. Өнгөрсөн хугацаанд дүүргийн газрын албаны зүгээс объектыг буулгах албан шаардлагыг удаа дараа өгч байсан ч тус компанийнхан биелүүлэлгүй өнөөг хүрчээ. Иймд өнөөдөр дүүргийн холбогдох хүмүүс уг барилгыг хүчээр буулгасан байна. Энэ талаар Баянгол дүүргийн засаг дарга  Д.Оросоогоос зарим зүйлийг тодрууллаа. 

Энэ компани ямар ч зөвшөөрөлгүйгээр барилга бариад, ийм олон жил үйл ажиллагаа явуулж байхад өмнө нь ямар нэг шаардлага тавьж зөрчлийг арилгуулах арга хэмжээ авч байгаагүй хэрэг үү?
 
2009 онд дүүргийн Газрын албанаас түр зөвшөөрөл олгосон байдаг юм билээ. Үүнийг нь бид хууль бус гэж үзэж байгаа. 

Сургуулийн хашаан дахь хууль бус барилгыг албадан буулгахад дүүргээс хичнээн төгрөгийн төсөв гарсан бэ?

Ойролцоогоор 10 орчим сая төгрөг шаардагдсан. Эхний ээлжинд дүүргээс төсвийг гаргаж, шүүхэд нэхэмжлэл гаргаж, “Нью капитал” компаниар нөхөн төлүүлэхээр болсон. 

“Нью Капитал” компани газраа чөлөөлж өгөлгүй их олон жил болж байгаа гэсэн. Тэгэхээр өнгөрсөн хугацаанд ямар ч зөвшөөрөлгүй үйл ажиллагаа явуулж байжээ?

Манай дүүргийн иргэдээс газартай холбоотой маш олон санал гомдол ирдэг. 40 дүгээр сургуулийн хашаанд баригдсан энэхүү “Нью Капитал” компанийн барилгын хувьд олон жил болж байна. Энэ газарт төлбөртэй үйлчилгээ үзүүлж ашиг орлого олж болохгүй, газраа чөлөөлж өгнө үү гэсэн шаардлагыг удаа дараа тавьсан боловч өдий хүртэл хариу өгөөгүй. Түүнчлэн маргаантай байгаа уг газарт манай дүүргийн спорт цогцолбор баригдах юм. Газар шорооны ажил эхлэхэд бэлэн болсон. Энэ компанийн хувьд спорт цогцолборын барилгын ажил эхлэх үед газраа ямар нэгэн саадгүйгээр чөлөөлж өгнө гэсэн боловч өнөөдрийг хүртэл чөлөөлж өгсөнгүй. Тийм учраас бид өнөөдөр газар чөлөөлөх ажиллагааг албадан гүйцэтгэж байна.

Баянгол дүүрэгт хууль бус барилгыг албадан буулгаж, төрийн газрыг чөлөөлөх өөр хичнээн барилга, байгууламж байна вэ?

Манай дүүргийн хувьд үндсэндээ нийтийн эзэмшлийн зам, талбайд зөвшөөрөлгүйгээр барьсан 1000 гаруй контейнер, гражууд бий. Тиймээс энэ оны 11 дүгээр сарын дотор албадан буулгаж төрийн газрыг чөлөөлж авах болно. Ерөнхийдөө наадмаас хойш зөшөөрөлгүй баригдсан орон сууцны өргөтгөлүүдийг буулгаж байна. Өнгөрсөн долоо хоногт гэхэд Баянгол дүүргийн 8 дугаар хороо 16-р байрны гадна нэгдүгээр давхрын зэргэлдээ 12 давхар байшингийн суурийг ухчихсан өргөтгөл барьж байсныг таслан зогсоосон. Мөн цаашдаа бид үе шаттайгаар зөвшөөрөлгүй барилгуудыг буулгах болно. 

 

Сэтгүүлч Г.Ганчимэг

E-mail: mongolcom.mn@gmail.com
Утас: 76110303, 76110505

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.