Иракийн хойд зүгийн Ниневе мужид хуримын хүлээн авалт болж байсан танхимд гал гарсаны улмаас 113 гаруй хүн амь үрэгдэж, 150 гаруй шархджээ.
Нинене мужийн захирагчийн орлогч Хассан аль Аллах Ройтерс агентлагт өгсөн ярилцлагадаа 113 хүн амь үрэгдсэн нь тогтоогдсон, гал орон нутгийн цагаар мягмар гарагийн оройны 10 цаг 45 минутанд гарсан тухай дурджээ.
Иракийн INA агентлагийн мэдээлснээр уг явдал нийслэл Багдад хотоос баруун хойд зүгт 400 орчим км зайд байрлах Аль Хамдания дүүрэгт болсон ба хүлээн авалтын танхимд гал гарах болсон шалтгаан нь хуримын хүлээн авалтын үеэр салют буудуулсантай холбоотой гэж урьдчилан тогтоогоод байгаа аж.
Иракийн эрх баригчдын ярьж байгаагаар хуримын ёслолын үеэр салют буудуулах нь нийтлэг үзэгдэл аж. Ниневе мужийн хүлээн авалтын танхимд гал гарах үеэр танхимд 1000 орчим хүн байсан аж.
Хууль сахиулагчид хүлээн авалтын танхимыг барихад ашигласан галд амархан шатдаг материалууд мөн л гал хурдацтай тархахад нөлөөлсөн гэж үзэж байгаа ба барилгыг барихдаа аюулгүй байдлын стандартад заасан арга хэмжээг аваагүй, барилгад ослын гарц байгаагүй аж.
Түүнчлэн барилга барихдаа хямд, чанаргүй материал ашиглах нь гал түймрийн осол гарахад нөлөөлдөг болохыг мэргэжилтнүүд онцолжээ.
Иракийн Ерөнхий сайд Мохаммед Шиа Аль Судани мөрдөн шалгах ажиллагаа явуулж, амиа алдсан иргэдийн ар гэр болон шархдсан иргэдэд тусламж дэмжлэг үзүүлэхийг даалгажээ.
Эх сурвалж: aljazeera.com
Содномцэрэнгийн Энхзаяа
mongolcom.mn
Энэ мэдээ танд таалагдаж байвал LIKE хийгээрэй. Танд баярлалаа.
