Тайландын хааны гэр бүлийг доромжилсон хэргээр 43 жилийн хорих ял авчээ

Twitter Print
2021 оны 01-р сар 20-нд 13:31 цагт
Мэдээний зураг,

Тайландад хааны гэр бүлийг доромжилсон хэргээр 63 настай эмэгтэйд 43 жилийн хорих ял оноожээ.

Төрийн албан хаагчаар ажиллаж байсан Анчан нэртэй эмэгтэйг шүүхээс 29 зүйл заалтаар ялласан ба түүнийг 2014-2015 онд YouTube болон Facebook нийгмийн сүлжээнд Тайландын хааны гэр бүлийг шүүмжилсэн утга агуулгатай подкаст болон бичлэгүүдийг нийтэлсэн хэмээн буруутгажээ. Тайландын хааны гэр бүлиптэй холбоотой хууль дэлхийд хамгийн хатууд тооцогддог ба Тайландын сөрөг хүчнийхэн эрх баригчид уг хуулийг улс төрийн зорилготой ашигладаг хэмээн үздэг аж.

Шүүхээс Анчанд 87 жилээр хорих ял өгөх шийдвэр гаргасан ч Анчаныг буруугаа хүлээсэн гэж үзэн ялын хугацааг багасгасан гэнэ. Тэрээр 2014 онд болсон цэргийн эргэлтийн дараа хааны гэр бүлийг доромжилсон хэргээр баривчлагдсан 14 хүний нэг бөгөөд түүнийг энэ олон жил өнгөрсний дараагаар ийнхүү ялласанаар Тайландын эрх баригчид эсэргүүцлийн хөдөлгөөнийг зохион байгуулагчид болон сөрөг хүчнийхэнд анхааруулга өгч байна хэмээн мэргэжилтнүүд үзэж байна. Тайландын шүүхээс өнгөрсөн оны 2-р сард сөрөг хүчний намыг тараах шийдвэр гаргасан нь иргэдийн бухимдлыг төрүүлсэн юм. Үүнтэй холбоотойгоор оюутнууд эсэргүүцлийн хөдөлгөөнийг эхлүүлж, урьд өмнө нь хэзээ ч яригдаж байгаагүй Тайландын хаан Важиралонгкорны хөрөнгө, улс төрийн эрх мэдэл болон хувийн амьдралын тухай асуудлуудыг хөндөж эхэлсэн юм.

Жагсагчид хааны гэр бүлийн эрх мэдлийг хязгаарлах, хааны гэр бүлийн үе үеийн хөрөнгийг хаан Важиралонгкорн өөрийн хувийн хөрөнгө болгох шийдвэр гаргасан явдлыг цуцлах, хаан Важиралонгкорн Бангкок дахь бүх цэргийн анги хэсгүүдийг удирдах явдлыг зогсоохыг шаардаж байгаа юм. Өнгөрсөн долоо хоногуудад хааны гэр бүлийг доромжилсон хэргээр 40 гаруй хүнийг ялласаны дийлэнх нь оюутан залуус байгаа байгаа аж. Хааны гэр бүлийг доромжлох гэдэгт чухам ямар үг үйлдэл орох зэрэг нь тодорхойгүй байдаг ба хүний эрхийг хамгаалах байгууллагууд уг хуулийн заалтыг ашиглаж Тайландын эрх баригчид сөрөг хүчний өөрчлөлт шинэчлэлтийг шаардсан дуу хоолойг таслан зогсоох улс төрийн зорилгоор ашигладаг хэмээн үздэг байна.

Эх сурвалж: BBC

Содномцэрэнгийн Энхзаяа

Mongolcom.mn 

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.