Ираны хамгийн халуун бүс нутгуудын нэг, газрын тосоор баялаг Хузестан мужийн иргэд ундны цэвэр усны ноцтой хомсдолд оржээ. Баруун өмнөд зүгийн Хузестан мужийн иргэд бүс нутагт нь усгүй болсон явдалд улсынхаа эрх баригчдыг буруутган сүүлийн 10 гаруй хоног дараалан шөнөөр жагсаж байна.
Учир нь өдрийн цагаар тус бүс нутагт агаар Цельсийн 50 хэм хүртэл халдаг ба иргэд агаарын хэм буурсан үед буюу шөнийн цагаар жагсаж байгаа аж.
Жагсагчид усны хомсдлын эсрэг арга хэмжээ авахыг эрх баригчдаас шаардаж байгаа бол Ираны эрх баригчид усны хомсдол үүссэн нь бүс нутагт ган гачиг нүүрлэж, өнгөрсөн жилийнхтэй харьцуулахад тухайн бүс нутагт энэ жил орсон хур тунадасны хэмжээ 50 орчим хувиар буурсантай холбоотой аж.
Усны хомсдлын улмаас жагсаж буй иргэдийн эсрэг цагдаа нар гал нээж, эх сурвалжуудын мэдээлж байгаагаар жагсагчид болон хууль сахиулагчдын хооронд үүссэн мөргөлдөөний улмаас хэд хэдэн иргэд амь үрэгдсэн байна.
Хүний эрхийг хамгаалах Human Rights Watch байгууллагаас мэдээлж байгаагаар Хузестаны 5 сая орчим иргэн ундны цэвэр усны хомсдолд орсон ба Ираны засгийн газар иргэдийнхээ эрхийг хамгаалж, цэвэр усаар хангаж чадахгүй байгаа аж.
Хузестаны иргэдийн эсэргүүцлийн жасгаал нь өргөжиж, Ираны бусад бүс нутгуудад иргэд Ираны засгийн газрыг эсэргүүцэн жагсаж байна. Үүнтэй холбоотойгоор Ираны эрх баригчид зарим бүс нутагт интернет сүлжээг тасалжээ.
Ираны эрх баригчид Хузестан мужийн нутаг дэвсгэрт олон тооны далан барьж, байгаль орчны менежмент буруу явуулснаас болж бүс нутгийн ундны усны асуудал хурцджээ.
Иранчууд зөвхөн усны асуудлаар бус цахилгаан эрчим хүчний хязгаарлалтыг эсэргүүцэж, ажлын байрны орчин нөхцөл, цалин хөлсийг сайжруулах, ажилгүйдлийг бууруулахыг шаардан жагссаар байгаа юм.
Эх сурвалж: https://www.bbc.com/news/av/world-middle-east
Содномцэрэнгийн Энхзаяа
mongolcom.mn
Энэ мэдээ танд таалагдаж байвал LIKE хийгээрэй. Танд баярлалаа.
