Казах түмний идээний дээд казын талаар бичье. Казгүйгээр найр наадмыг төсөөлөх аргагүй. Адууны махыг зуны улиралд муутгахгүй байх, манайхны борц шиг удаан хугацаагаар хэрэглэх зорилгоор анх каз үүсчээ.
Булганы айлуудын айраг өөр өөр. Каз яг тийм юм. Казчин бүрийн технологи өөр. Бас мөнгө улаан, нүд цагаан болсон орчин үед технологийн бус аргаар хийдэг хүмүүс ч олширч. Үхрийн хавиргаар хийх, адууны гуяны мах чихэх гэх мэт.
Казыг зөвхөн адууны хавиргаар хийнэ. Адуунаас гарах 12 хавиргаа хагас өдөр сэврээнэ. Нарийн гэдсээ сайтар угаагаад давстай усанд 2-3 цаг байлгана. Хавиргаа сонгино, сармис, чинжүү зэргээр амтлаад нарийн гэдсэндээ хийнэ, тэгээд 2 үзүүрийг нь боогоод багадаа 3 хоног байлгана. Энэ хооронд нарийн гэдэсний гадна талаар давс нь тодорч цагаан өнгөтэй болж ирдэг. Энэ үед За одоо л гоё болж ирж бн гэж ярьдаг. Тэгээл хөлдөөнө дөө.
Тарган адуугаар хийж байж өөх мах нь ойролцоо гарч ирнэ. Мөн адууны сонголт хамгийн чухал гэнэ. Зөвхөн Баян-Өлгий, Ховдын адуу хамгийн сайн шаардлага хангадаг аж. Говь-Алтай, Увсын уулархаг газрын адуу бас тохирно. Завхан, Говь-Алтай, Увсын элсэрхэг газар, Баянхонгороос адуу авч хийхээр амт нь цаанаа сулбагар бдаг гэнэ. Тэгэхээр Алтайн нурууны өвс тэжээл, агаарын температур их чухал нөлөөтэй байх нь. Хот тойроод казчид нэлээн бий ч амт нь Өлгийн казыг гүйцдэггүй учир ийм аж.
Аль удаан дарах тусам амт чанар нь илүү сайжирдаг гэх. Заримдаа 2-3 жил дарсан казыг ч хүмүүс гаргаад ирдэг гэнэ. Яг л нөгөө сайн дарс удах тусам амттай гэдэг шиг. Адууны мах царцдгүй тул өвлийн улиралд аян замд явахад каз хамгийн сайн хүнс. Адууны маханд бусад малын махнаас ялгарах онцлог их. Өвлийг зутрахгүй давахад адууны мах их рольтой.
Маш их давсархаг тул идэж үзээгүй хүмүүс эхлээд багаар идвэл зүгээр. Нэг амтанд нь татагдчихвал тэгээд өвөлжингөө л идэж таарах бх даа. Хүнс бол гайхамшиг, хүнс бол төр гэдгийн нэг жишээ нь каз билээ.
Эх сурвалж: Олноо
Энэ мэдээ танд таалагдаж байвал LIKE хийгээрэй. Танд баярлалаа.
