Түймрийн утаанаас болж зарим тоглогчид тэмцээнээ зогсоохоос аргагүйд хүрчээ

Twitter Print
2020 оны 01-р сар 15-нд 13:57 цагт
Мэдээний зураг,

Австралийн Мельбурн хотноо болж буй талбайн теннисний Австралийн нээлттэй тэмцээнд оролцож буй Словенийн теннисчин Далила Якупович теннисний талбайг бүрхсэн утааны улмаас тэмцээнээ дуусгаж чадаагүй байна.

Өнгөрсөн 9-р сараас хойш Австрали тив ой хээрийн түймэрт автаад байгаа ба талбайн теннисний Австралийн нээлттэй тэмцээн явагдаж буй талбайг түймрийн утаа бүрхжээ. Чансаагаараа дэлхийд 180-д бичигддэг Далила Якупович Швейцарийн теннисчин Стефани Фогельтэй тоглож байх үеэрээ ханиалгаж эхэлсэн ба тэрээр амьсгалахад нь хүндрэлтэй болж, хөл дээрээ тогтож чадахгүй болж эхэлсэн талаараа ярьсан байна.

Цаг агаарын нөхцөл байдлыг үл харгалзан зохион байгуулагчид тэмцээнийг анхнаас нь зогсоохгүй байх шийдвэр гаргасан нь шударга бус санагдсан гэдгийг ч Якупович онцолжээ. Далила Якуповичийг тэмцээнээс хасахаас өмнө зохион байгуулагчид тоглогчид, ажилчид болон үзэгчдийн эрүүл мэнд, аюулгүй байдлыг тэргүүнд тавьж буйгаа онцолж, эмч нарын баг, цаг уурын алба болон Виктория мужийн байгаль орчин хамгаалах агентлагийн эрдэмтэдтэй зөвлөлдсөний үндсэн дээр цааш цаашдын шийдвэрээ гаргах болно гэдгээ мэдэгдсэн байна. Украины теннисчин Элина Свитолина өөрийн твиттер хуудаснаа Мельбурн хотын агаарын чанарын үзүүлэлт бүхий скрийншотыг "Заавал ямар нэг муу зүйл болсоны дараа л арга хэмжээ авдаг юм бэ" гэсэн тайлбартайгаар нийтэлжээ.

Dalila Jakupovic hits out at Australian Open organizers after bushfire smoke forces her to quit зурган илэрцүүд

Уг скрийншотод Мельбурн хотын агаарын чанарын индексийн үзүүлэлт 200 буюу эрүүл мэндэд хортой түвшинд хүрсэн болохыг харуулсан байсан аж. Ой хээрийн түймрийн утаа Мельбурн хотыг бүрхсэнтэй холбоотойгоор хотын удирдлагууд иргэдийг гэрээсээ гарахгүй байх, гэрийн тэжээмэл амьтдаа гадаа салхилуулахгүй байхыг зөвлөжээ. Түүнчлэн Оросын талбайн теннисний тамирчин Мария Шарапова болон Германы теннисчин Лаура Зигемунд нар агаарын нөхцөл байдлын талаар гомдол мэдүүлсэн бол Канадын теннисчин Эжени Бушар тоглолтын дундуур завсарлага авч, эмчийн тусламж авахад хүрчээ.

Австралийн нээлттэй тэмцээний гол тоглолтууд энэ сарын 20-ноос эхлэх ба зохион байгуулагчид тоглолт хуваарийн дагуу явагдахад шаардлагатай нэмэлт арга хэмжээнүүдийг авсан гэдгээ мэдэгджээ. Зохион байгуулагчдын мэдэгдсэнээр утаа нэмэгдсэн тохиолдолд тэмцээн явагдаж буй стадионуудын дээврийг хааж, стадион доторх агаарыг цэвэршүүлэх аж. 

Эх сурвалж: CNN

Содномцэрэнгийн Энхзаяа 

mongolcom.mn 

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.