Европын холбоо ОХУ-ын онгоцуудыг хилээрээ нэвтрүүлэхийг хоригложээ

Twitter Print
2022 оны 02-р сар 28-нд 10:00 цагт
Мэдээний зураг,

Украины эрх баригчдын мэдээлж байгаагаар Украины зэвсэгт хүчний хувьд өнгөрсөн ням гараг хүндхэн өнгөрчээ. ОХУ-ын зэвсэгт хүчнийхэн Украины хотууд руу бүх талаас зогсолтгүй довтолсоор байна. 

Украинд үүссэн нөхцөл байдалтай холбоотойгоор Европын холбоо Украинд 450 сая еврогийн үнэ бүхий зэвсэг нийлүүлэхээр болсон талаар Европын холбооны Гадаад харилцаа хариуцсан сайд Жосеф Боррель мэдэгджээ. Канадын засгийн газар мөн адил Украинд 19.6 сая ам. долларын үнэ бүхий зэвсэг нийлүүлэхээр болсон байна. 

Түүнчлэн Европын холбооны 27 гишүүн орны Гадаад харилцааны сайд нар  ОХУ-ын онгоцнуудыг агаарын хилээрээ нэвтрүүлэхийг, Оросын төрийн өмчит хэвлэл мэдээллийн хэрэгслүүдийг Европын холбооны нутаг дэвсгэрт үйл ажиллагаа явуулахыг нь тус тус хоригложээ. 

ОХУ-ын Ерөнхийлөгч Владимир Путин өнгөрсөн ням гарагт НАТО-гийн түрэмгийлэл нэмэгдэж байгаатай холбоотойгоор цөмийн зэвсгийн өндөржүүлсэн бэлэн байдал зарласж буйгаа мэдэгдсэн байна. 

Украины Харьков болон Киев хотууд ОХУ-ын зэвсэгт хүчнийхэнд эзлэгдээгүй гэдгийг Украины эрх баригчид онцолж байна. Киев хотын дарга В. Кличко нийслэл Киев бүх талаасаа бүслэгдсэн учраас хотын оршин суугчдыг нүүлгэн шилжүүлэх боломжгүй хэмээн мэдэгджээ. 

ОХУ-ын дайралт эхэлснээс хойш Оросын тал 4300 иргэнээ алдсан хэмээн Украины эрх баригчид мэдээлж байгаа ч  Оросын талаас энэ талаар ямар нэг мэдэгдэл хийгээгүй байна. 

ОХУ болон Беларусийн албаны хүмүүс Украин-Беларусийн хил дээр хэлэлцээр хийхээр бэлтгэж байна. 

Европын холбоо ОХУ-ын санхүүгийн нөөцийн 50 орчим хувийг царцааснаас гадна ОХУ-ын хэд хэдэн банкийг олон улсын төлбөрийн S.W.I.F.T системээс хасах дээр санал нэгдээд байна. 

Оросын хэд хэдэн хотод дайны эсрэг жагсаал цуглаан зохион байгуулагдаж, "ОВД-Инфо" байгууллагаас мэдээлж байгаагаар жагсаалын үеэр цагдаа нар нийт 1400 гаруй хүнийг баривчилжээ. 

НҮБ-аас мэдээлснээр сүүлийн өдрүүдэд нийт 360 мянга гаруй украинчууд Европын холбооны улс орнууд руу дүрвэжээ.

ОХУ-ын Украин дахь цэргийн ажиллагаа эхэлснээс хойш ОХУ-ын рублийн ханш 20 хувиар унасан байна.

Эх сурвалж: CNN

Содномцэрэнгийн Энхзаяа

mongolcom.mn

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.