Байцаа нь бие махбодийг цэвэрлэгч юм

Twitter Print
2019 оны 10-р сар 29-нд 13:00 цагт
Мэдээний зураг,

Дэлхийн хүн ардын тарималжуулсан ургамлаас хамгийн эртний таримлын нэг бол байцааны төрлийн ургамлууд юм. Байцааны олон төрөл байдаг. Үүнээс хамгийн их хэрэглэгддэг нь бөөрөнхий цагаан голт, бөөрөнхий улаан голт, цэцэгт, хятад, урт байцаа бөгөөд бас навчит, олон толгойт, бужгар, булцуут, залаат байцаа, далайн, чөмгөн байцаа  гэж байдаг. 

Орчин үеийн анагаах ухаанд байцааны эмчлэх онцгой чадлын тухай тайлбарлахдаа түүнд Менделеевын үелэх системийн 10 элемент байдаг ба хүний дархлааг сайжруулдаг, эрт хөгшрөлтөөс сэргийлдэг бодистой гэжээ.

Бөөрөнхий цагаан голт байцаа

Шинэ бөөрөнхий цагаан голт байцаанд  ус, сахар, уураг,  эслэг агуулагддаг бол улаан голт  байцаанд эдгээрээс гадна С, В, РР амин дэм агуулагдана. Байцаанд ходоод гэдэсний шархыг анагаах үйлчилгээтэй аминдэм агуулагдана. Байцаанд 50 мг % хүртэл аскорбины хүчил агуулагдах бөгөөд энэ нь халуун ажиллагаа хийхэд ч бараг өөрчлөгддөггүй байна. Цагаан болон улаан голт байцаа нь

- Хавдар, өмөн өвчнөөс сэргийлнэ.

Өтгөн хатахаас сэргийлнэ.

Жин хасахад тустай.

Зүрхний үйл ажиллагааг тэтгэнэ.

Шамбарамыг анагаахад тустай

Цэцэгт байцаа

Цэцэгт байцаанд  ус,  сахар, уураг,  эслэг, эрдэс давс, С амин дэм, мөн В1, В2, РР, К амин дэмүүд агуулагдана. Цэцэгт байцаа нь

- Түрүү булчирхай өвчлөхөөс сэргийлнэ.

- Цээж, хөхний өвчнөөс сэргийлнэ.

- Яс бэхжүүлнэ.

- Хөхрөлт, бяцралтыг анагаахад тустай.

- Зүрх судасны өвчлөл, цус харвалтын аюулыг багасгана.

Броколли байцаа

Энэ байцааг мөчрийн цэцгэн байцаа, итали байцаа, цэцгэн толгойт байцаа гэхчилэн янз бүрээр нэрлэдэг ч англи, орос хэлний броколли гэсэн нэрээр нь нэрлэж заншжээ. Италиас гаралтай энэ байцаа нь амт болон тэжээллэг чанараараа цэцэгт байцаанаас илүү, эмчилгээ, сувилгааны зориулалтаар хэрэглэх нь их бөгөөд түүнд уураг,  аскорбины хүчил, каротин, Е аминдэм түүнчлэн фолийн хүчил, В,РР бүлгийн амин дэм агуулагдана. Энэ байцаанд кальци, магни, хром, төмөр, фосфор, цайр зэрэг эрдэс бодис агуулагдана. Броколлид харшил, үрэвслийн эсрэг хамгийн хүчтэй бодис болох каемпферол агуулагддаг. Броколли нь

- Яс бэхжүүлэх үйлчилгээтэй.

- Нүдний хараанд сайн.

- Хавдар, өмөн өвчнөөс сэргийлнэ.

- Зүрхний үйл ажиллагааг тэтгэнэ.

- Цусны даралтыг тогтворжуулна.

Хятад байцаа

Өөр ямар ч ургамалд байдаггүй лизин хэмээх үл орлогдох аминхүчил ихээр агуулдаг энэ ногоо нь биологийн идэвхит нэмэлтийн найрлагад ордог. Биеийн эсэргүүцлийг сайжруулах, цусанд нэвтэрсэн өөр төрлийн уургийг уусгаж ариутгадаг тул энэ байцааг эмчилгээ сувиллын зориулалттай хоол хийхэд өргөн хэрэглэнэ. Хятад байцааны навчаар байцааны сорс (голубцы), шанцай, шөлтэй хоол хийх ба харин булцуугаар нь шарсан, жигнэсэн хоол хийнэ. Хятад байцаа нь

- Цусны даралтыг тогтворжуулна.

- Жин хасахад тустай.

- Ходоод гэдэсний үйл ажиллагааг идэвхжүүлнэ.

Юуцай

Бид юуцай хэмээдэг энэ ногоо бол навчит байцааны төрөлд хамаарна. Хятад сортын байцааны нэг бөгөөд маш хурдан болдог. Ердөө 5 хүртэлх минут жигнэх, чанах ёстой. Ингэхгүй бол элдэв ашигт зүйлс нь алга болдог.

Савой байцаа

Арай зузаан, судал ихтэй навчнуудаараа цагаан байцаанаас ялгагдах энэ ногоо үнэндээ зөөлөн. Италиас гаралтай. Гичний тостой нийлэхээрээ жинхэнэ эм болдог. Яс шөрмөс булчингийн үйл ажиллагаанд тустай кали, кальци, магни зэрэг эрдэс бодисоор баялаг.

Брюссель байцаа

Энэ ногоо нь С аминдэм, кали, магни зэрэг эрдсээр баялаг. Бага зэрэг гашуун амттай. Сүүн сүмс, майонез зэргээр амталбал исгэлэн амт нь дарагддаг.

Эх сурвалж: www.mongolcom.mn 

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.