УИХ-ын гишүүн асан Д.Эрдэнэбатад 4.6 жил, Сангийн сайд асан Б.Болорт 3.6 жилийн хорих ял оноожээ

Twitter Print
2020 оны 08-р сар 28-нд 09:24 цагт
Мэдээний зураг,

“Эрдэнэт үйлдвэр”-ийн 49 хувийн хувьцааг авах Засгийн газрын эрхээсээ татгалзаж, Худалдаа хөгжлийн банкны эзэн Д.Эрдэнэбилэгийн байгуулсан, Ц.Пүрэвтүвшин захиралтай "Монголын зэс корпорац"-ад даваа байдал бий болгосон гэх хэрэгт холбогдсон УИХ-ын гишүүн, Аж үйлдвэрийн сайд асан Дондогдоржийн Эрдэнэбат, Зам, тээврийн сайд, “Монголын төмөр зам” ХК, “Эрдэнэт үйлдвэр”-т эрх бүхий албан тушаал хашиж байсан Дангаагийн Ганбат, тухайн үеийн Монголбанкны ерөнхийлөгч асан Найдансүрэнгийн Золжаргал, Сангийн сайдаар ажиллаж байсан Баярбаатарын Болор нарт холбогдох хэргийг Сүхбаатар дүүргийн Эрүүгийн хэргийн анхан шатны шүүх 9 хоног хэлэлцлээ.

Улмаар Аж үйлдвэрийн сайд асан, уг хэрэгт эрх мэдэл албан тушаалаа урвуулан ашиглаж, хамжигчаар оролцсон гэх үндэслэлээр яллагдагчаар татагдсан, УИХ-ын гишүүн, АН-ын зөвлөлийн дарга зэрэг албан тушаал хашиж байсан Д.Эрдэнэбат болон тухайн үеийн Сангийн сайд асан Б.Болор нарыг "Монголын зэс корпорац"-ынханд давуу байдал бий болгосон гэм буруутайд тооцлоо. Дээрх хүмүүсийг улсад 9 их наяд төгрөгийн хохирол учруулсан хэмээн буруутгасан.

Аж үйлдвэрийн сайд асан Д.Эрдэнэбатыг уг албан тушаалыг хашиж байхдаа эрх мэдлээ урвуулан “Эрдэнэт үйлдвэр”, “Монголросцветмет” компанийн 49 хувийн хувьцааг тэргүүн ээлжид Засгийн газар авах давуу эрхээсээ татгалзаж, “Монголын зэс” ХХК-д худалдах тухай саналыг зөвшөөрөх нь зүйтэй гэсэн танилцуулгыг эдийн засгийн ямар ч тооцоо, судалгаагүй бэлтгэн Засгийн газрын ээлжит бус хурлаар хэлэлцүүлж, бусдад давуу байдал олгосон, төрийн хууль ёсны ашиг сонирхолд хохирол учруулсан” хэмээн буруутган НПГ-аас яллах дүгнэлт үйлдсэн юм.

Улмаар шүүхээс дараах шийдвэрийг гаргав. Тодруулбал, Эрүүгийн хуулийн тусгай ангийн 22.1 дүгээр 1 дахь зааснаар шүүгдэгч Д.Эрдэнэбатад нийтийн албанд томилогдох эрхийг 5 жилийн хугацаагаар хасаж 4 жил 6 сарын хугацаагаар, шүүгдэгч Б.Болорт нийтийн албанд томилогдох эрхийг 4 жилийн хугацаагаар хасаж 3 жил 6 сарын хугацаагаар тус тус хорих ял оногдуулж, шүүгдэгч нарт оногдуулсан тус бүрийн хорих ялыг нээлттэй хорих байгууллагад эдлүүлэхээр шийдвэрлэв.

Шүүх хурлын явцад Зам тээврийн сайд зэрэг өндөр албан тушаал хашиж байсан Д.Ганбатын эрх мэдэл, албан тушаалаа урвуулсан үйлдэлд холбогдсон Б.Минжбадамын бие муудаж, шүүх хурлын завсарлуулж байсан бөгөөд түүнээс хойш нэлээд хэд хоног Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны шүүхийн Тамгын газрын эмчийн хяналтад байв. Д.Ганбат болон Б.Минжбадам, Д.Доржханд, Л.Санжаадорж нар нь Төв аймагт "Ялгуусан" гэх компанийн барьсан замын төсөвт өртгийг нэмж завшсан, хээл хахууль авсан хэрэгт холбогдсон билээ. Гэвч шүүхээс Н.Золжаргалын Улаанбаатар хотын болон Худалдаа хөгжлийн банкныханд давуу байдал олгосон, Д.Ганбат тэргүүтэй хүмүүсийн эрх мэдэл албан тушаалаа урвуулсан үйлдлийг тусгаарлан нэмэлт ажиллагаа хийлгэхээр прокурорын хяналтад буцаалаа.

Энэ хэрэгт холбогдсон Ерөнхий сайд асан Ч.Сайханбилэг хил давж зугтсан бөгөөд түүнд холбогдох үйлдлийг нь тусгаарлаад байгаа. Мөн дээр нь нэмж Ерөнхийлөгч асан Ц.Элбэгдоржийг хамтран оролцсон хэмээн буруутган шалгаж буй билээ.

 

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.