Сэтгэл гутралаас гарах нь

Twitter Print
2022 оны 08-р сар 27-нд 09:22 цагт
Мэдээний зураг,

Сэтгэл гутралаас гарахын тулд миний ойлгосон 10 зүйл

1. Сэтгэл гутралд орсон гэдгээ хүлээн зөвшөөрөх маш чухал. Хүлээн зөвшөөрөхгүй бол хэзээ ч эхлэхгүй бас эдгэхгүй... Хамгийн харамсалтай нь улам бүр муудсаар л байх болно. Цаг хугацаа хөнгөн асуудлыг анагаадаг байж болох ч хүнд асуудлыг улам бүр төвөгтэй болгодог.

2. Миний муухай бодлууд минийх биш сэтгэл гутралд орсон миний ухамсаргүй оюун ухааных юм байна гэдгээ ойлгосон. Муухай бодолдоо хууртаад бүх зүйл боломжгүй, чадахгүй, бүтэхгүй гээд өөрийгөө хуураад байвал үхэлд хүртэл өөрийгөө хуурсаар дуусгах болно.

3. Бодол бүрээ миний эрүүл ухааных, сэтгэл гутралынх гэж ялгаж ач холбогдол өгөх эсэхээ шийдэж эхэлсэн. Бүх бодлоо ач холбогдол өгөөд байвал амьдаараа тарчлах болно. Нэр нь хүртэл СЭТГЭЛ ГУТРАХ ӨВЧИН гэж байгаа юм. Олон эрүүл бус бодолд ач холбогдол өгөхөө болих үед харанхуй өрөөнд хөшиг татах мэт хонгилын үзүүрт гэрэл орж эхэлнэ. Яваандаа гэрэлтэй бодлууд зуршил болох болно.

4. Сэтгэл зүй гэдэг үгнээс айгаагүй, зоригтой байсан. Айгаад зугтаад байвал там руу л зугтаах хэрэгтэй болно. Айж, зугтаах тусам аймшигтай асар том мэт санагдаж байсан.

5. Сэтгэл судлалын талаар нээлттэй судалж эхэлсэн. Юутай нүүр тулснаа мэдэхгүй, ойлгохгүй юуг эдгээж, ямар дайснаа дарах вэ дээ. Амьдралын хамгийн том дайсан бол сэтгэл гутрал.

6. Боломжтой бүх оролдлогыг хийсэн. Фитнесст бүртгүүлснээ турсан гэж ойлгож болохгүй гэдэг шиг, сэтгэл гутралыг ойлгосноо эдгэсэн гэж бодож болохгүй. Ойлгох нь асуудлыг маш жижиг болгосон үлдсэн багахан хэсэг нь үйлдэл байсан.

7. Болохгүй бол тэр цаг хугацаа, зардал мөнгөнд харамсахгүй шууд хаяад дахин шинийг оролдсон. Хаях ёстой бүхний хаясан...

8. Бүх зүйлийг сэтгэл зүйчээс хүлээгээгүй. Өөртөө л хамгийн ихээр тусална гэдгээ ойлгоод миний ухамсар, миний ухамсаргүйтэй харилцаж, өөртэйгөө ярилцаж, аргадаж эхэлснээр гэрлийн хурдаар хүлээснээс гарч эхэлсэн. 20 жил шаналгадаг байсан мэдрэмж хоёрхон жилийн дотор урсаад гараад явчихсан.

9. Эцэст нь сайхан мэдээ хэлэхэд сэтгэл гутрал бол маш сайн эмчилгээ авдаг өвчин бөгөөд 80-90 хувь нь эдгэдэг. Тиймээс та өөртөө тусалж бас өөртөө туслах, таарах сэтгэл зүйчээ олоорой.

10. Эцсийн эцэст сэтгэл гутралд орсон хүнийг сэтгэл зүйн боловсролгүй эргэн тойрны хатуу сэтгэлтэй хүмүүс маш ихээр хэмлэж зовоодог юм шүү... Бусад нь энэрэнгүй байгаарай.

Б.Эрдэнэтуяа

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.