“Ковидгүй зуныг Л.Оюун-Эрдэнэ, С.Амарсайхан хоёр л үзнэ”

Twitter Print
2021 оны 04-р сар 21-нд 17:52 цагт
Мэдээний зураг,

Хөл хорио тогтоосон гол зорилго нь өвчтэй иргэдээ илрүүлж, эмчлэх замаар халдварыг хумих явдал биз дээ. Үүнийгээ ч Л.Оюун-Эрдэнэ уламжилсан, С.Амарсайхан уба ч мэдэгдсэн байх аа. Гэтэл яаж байна аа таануус, хөөрхий муу иргэдийг ээ? Хогийн бункерт ингээд шидчих байсан юм уу? Золбин нохой адил гаслуулаад гудамжинд хаячих байсан хэрэг үү?

Уг нь иргэд чинь үнэхээр өндөр ухамсартай байгаашт. Тийм байгаагаа үйлдлээрээ харуулж ч байнашт. Эрсдэлээ бодоод өөрсдөө гүйгээд очиж байна, эмчилгээ хийлгэе гээд өөрсдөө хөөцөлдөөд явж байна. Гэтэл шинжилгээний цэгт нь шинжилгээ өгнө гэдэг жинхэнэ аймшиг, бас гамшиг. Үүрээс авахуулаад очерлоно, алалцсаар очиход сорьц нь дуусчихна. Иргэдийн хэлснээр өдөрт ердөө 300 гаруй ширхэг сорьц нэг шинжилгээний газарт хуваарилагддаг юм байна. Маргааш өглөө нь дахиад очно. Дахиад л хамрынхаа урдуур очер таслуулчихна.

Аргаа барсан хүмүүс 119 гэх утас руу залгана. 100, 200, бүр 1000 удаа залгаад холбогдоноо гэж гонж. Бүхэл бүтэн улсын Онцгой комисстоо Засгийн газар шуу юм нь хангалттай тооны оператор суулгаад иргэдтэйгээ нэгэн зэрэг холбоо тогтоолгочихож болдоггүй хэцүү ажил уу. 18001109-ынхөн энэ тал дээр мундаг ажилладаг шүү дээ. Тэднийг дайчилдаггүй юмаа гэхэд зөвлөхөөр ажиллуулахгүй дээ, тэр Амарсайхантангууд. 119 гээч утастай нь холбогдож чадсан хүн байвал энэ жилийн Супер азтан гэнэ шүү.

Бас нэг иргэний бас нэг жишээ байна. Дээрх замаар яваад, явсаар залхаж гүйцсэн тус иргэн захиалаад, яриад олддоггүй өнөөх Явуулын шинжилгээний машиныг араас нь явган хөөсөөр гүйцээд очиж. Хэрэг явдлаа хэлж, яаж зүдэрч яваагаа учирлаад "Ар гэрээ эрсдэлд оруулмааргүй байна. Эгчээсээ шинжилгээ аваад өгөөч" гэж гуйхад "Эгч минь, бид аваад өгчихмөөр л байна. Даанч 1-р хавьтлуудыг л шинжлэх заавартай, тэгээд ч сорьц маань яг тоогоороо байдаг юмаа" гэж эмч нар учирлажээ. Гэхдээ хамгийн хөөрхөн нь "Эгчээ тантай дахиад таарвал шинжилгээг тань заавал авч өгнө өө" гээд явсан гэнэ. ХӨСҮТ-ийг том жижиггүй, толгойтой бүхэн зүхээд л байдаг. Гэтэл ажлаа хамгийн сайн хийж байгаа нь тэд л байна шүү дээ. Иргэдтэйгээ хамгийн сайн холбогдож байна, иргэддээ хамгийн сайн зөвлөж байна, тэгээд бас УОК-той холбоод өгч байна. Харин УОК гуай нь дуншиж дуншиж нэг ярих чинээ болдог юм гэнэ. Ярихаараа маршрут энэ тэрхэн асуугаад алга болдог юм гэнэ.

Товчхондоо бол Улаанбаатар дахь 1.5 сая иргэн хөл хорионы энэ өдрүүдэд золбин нохой адил гудамжинд зүгээр л орхигдчихож. "Орхидос" киноны 3-р анги өрнөөд байгаа ч юм шиг. Орхигдсоныг батлах олон зуун стори, хэдэн мянган пост энэ өдрүүдэд цаг тутам хөвөрч байна. Энэ бол гутамшиг. Энэ бол хар түүх. Монголчууд түүхэндээ ингэж нохой шиг хаягдаж байгаагүй юм, засаг төрдөө. Хагас өлсгөлөнгийн 90-ээд онд ч ийм байгаагүй. Төр маань ямар ч бэрхшээлийн учрыг олж ард түмнээ бүтэн ходоодтой хонуулж байсан л юм даа. Үүний ачаар Ганган яригч Л.Оюун-Эрдэнэ та, Сүржин өгүүлэгч С.Амарсайхан мөн та гэдэс цатгалан эрүүл саруул өсч бойжсон бус уу. Тэгвэл одоо өөрсдөө Төрийн толгойд заларсаных түмнийхээ эрүүл мэндийг анхаарсан шиг анхаарах замаар тэр үеийн төрдөө талархлаа илэрхийлчихээч.

Гэтэл... Юун аварга төлөвлөгөө, юуны чинь Алсын хараа энэ тэр. Хоншоор доорх ажлаа амжуулж барахгүй байж хэдэн жилийн цаадахыг харах тань зүгээр л лөөлөө юм байна. Нөгөө талаас нь хэлвээс "Алсын хараа-2050"-ын чинь хувь заяа иргэд олны чинь амь насаас хамаарч байна шүү. Шударга залуу гарч ирлээ, ярьдаг шигээ шуурхай, бас мэдрэмжтэй ажиллах болов уу гэж найдаж, итгэж бас дэмжиж байсан юм. Олон талаас тань элдвээр дайрч боргож байх ахуйд найдаж, итгэж, дэмжсээр л байгаа. Гэвч төрийн чинь энэ эс үйлдэл, энэ мэдрэмжгүй байдал чинь үнэхээр гайхшруулж байна, бас бачууруулж байна. Бачуурч байгаа нь л би болохоос галзуурах дөхөж буй хүн мянга, мянгаараа болчихоод байна. Бусдын яриад, хөндөөд байгаа вакцин энэ тэр, зөрүүтэй мэдээлэл гэх зэргийг энд ярих гэсэнгүй. Гагцхүү халдвараас сэргийлэх гэж, эмчлүүлэх гэж хэрэндээ хичээж байгаа иргэд түмнээ ядаж л

-Шинжилгээ сорьцоор нь,

-Холбоо харилцаагаар нь,

-Амьд зөвлөгөөгөөр нь 100% хангаад яагаад өгчихгүй байгаа юм бэ?!

Тэгсэн сэн бол иргэд түмэн ингэтлээ их сандрахгүй байсан, ингэтлээ их бужигнахгүй байлаа. Шинжилгээний цэг дээрээ очоод хараарай. Сорьц үнэхээр хүрэлцэхгүй байгаа учраас л иргэдийн бөөгнөрөл улам нэмэгдээд байна. Халдвар тархалтын эрсдэл илүү тэлээд байна. Товчхондоо, туслах эмчгүй, зөвлүүлчих мэргэжилтэнгүй аргаа барсан улсуудын нягтаршил л тэнд үүсээд байна. Түүнээс биш очоод зориуд бөөгнөрөөд зогсч байдаг мал гэж байх уу.

Эрхэм Ерөнхий сайдын хөл хорио тогтоохынхоо өмнө хийсэн мэдэгдлийг иргэд түмэн маань тодоос тод санаж байгаа. Яг юуг, яг ямар утгаар хэлэв гэдгийг бүр задаргаагаар нь санаж байгаа. Тиймээс та тэр мэдэгдлээ сэргээж нэг үзээд одоо өрнөж байгаа зүйлстэй зэрэгцүүлж нэг харьцуулчих. Хэр зэргийн том зөрүү байгааг өөрөө нэг тодорхойлчихоорой. Хэл зүйн шинжээчдийг дэргэдээ суулгаж байгаад үг, үсгээр нь давхар тодорхойлуулчихгүй юу тээ.

Ээ дээ, үүссэн асуудлыг, бодит нөхцөл байдлыг доод шат руугаа л чихдэггүй юм шүү. Эмнэлгийнхэн, Цагдаагийнхан, Онцгойгийнхон маань иргэдээ гэсэн сэтгэл, түмнээ гэсэн зүтгэлээр хүн бүрт хүрч ажиллах гэж хэрхэндээ л хичээж байгааг ард олон бэлхэнээ харж байгаа. Тэдний маань хичээл зүтгэлийг өмнөө бамбай хийж Төрийн толгой дахь идэвхгүй байдал ард нь нуугдаж байгааг ч бид бас харахтайгаа байгаа. Үгүй ээ, үгүй. Эрхэм том дарга нарыг хөдөлсөнгүй, ажилласангүй гэж хэлэх гэсэнгүй. Зүгээр л дээрээсээ доошоо удирдаж чадахгүй байна, зохион байгуулж бүр ч барахгүй байгааг нь дээрх бүх баримтаар илэрхийлэх гэсэн юм. Тийм байгааг тань хөл хорионы энэ өдрүүд шахаад, базаад, гаргаад ил тавьчихлаа шүү дээ. Новшийн зохион байгуулалт, заваарсан гүйцэтгэл чинь ковидыг хумих биш тэлээд байгаа юм биш үү. Тэлэхийн хэрээр ард түмэн чинь гудамжинд, орцонд, гэртээ бужигнаад байна. Өвчлөгсдийн энэ том тоо, нас барагсдын тэр их өсөлтийн хэмжээг түрүүн өгүүлсэн бүхэнтэй нийлүүлж тооцоод бодоорой, эрхэм Ерөнхий сайд аа.

Арифметикийн аргаар бодвол илүү зөв дүн гарах байх даа. Сангийн сайдаасаа тусламж авахгүй юу. Эрүүл мэндийн сайд чинь духлаа л бодно гэдгийг мэдэж байгаа байлгүй дээ, эрх биш. Амараа ах тань тоонд бүр таг байх өө. Барин тавин ярьдаг хүн яаж ч сайн байх билээ. Нээрээ санаснаас; юуг, яаж, хэзээ, хаана гэдэг асуултуудад энэ хүнээ яг таг хариулуулж сургах хэрэгтэй юм байна л ээ шөө. Таныг чинь сэтгүүлч гэдэг биз дээ. Сэтгүүлч хүний зүрх нийгмийн төлөө цохилдог юм гэсэн. Минийх лав хэмжээндээ цохилдог бололтой юм, иргэдийнхээ өмнөөс ингээд бичээд сууж байхыг бодоход. Таных харин овоо битүү бололтой дог оо тээ? Нийслэл даяараа шинжилгээ, эмчилгээ, зөвлөгөөний асуудалтай бужигнаж байхад ганц ч үг ган хийгээгүйг бодоход. За за, Эрхэм хүндэт Ерөнхий сайд маань лаагаа иднэ үү луувангаа зууна уу босгоны боол, түрүйний бөөс мань мэтэд юуны хамаатай билээ. Гэлээ ч иргэдийн хэлсэн нэг үгийг дайж дамжуулаад хэлчихье.

"Юуны чинь Ковидгүй зун. Энэ маягаараа байвал тийм зуныг Л.Оюун-Эрдэнэ, С.Амарсайхан хоёр л үзнэ" гэж.

Жалсрайн БАЯРЖАРГАЛ

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.
    • Иргэн

      (103.57.94.60) 2021-04-21 18:54
      • 0
      • 1

      Зөв,Ерөнхий сайд Оюун эрдэнэ нэн даруй огцрхгүй бол байдал ноцтой боллоо. Цаашид бүр хэцүү болох нь тодорхой боллоо. Ерөнхий сайд энэ олон хоног ганц ч үг дуугарсангүй.Ард түмнээ басаж доромжлох нь хэтэрлээ.

      Хариулах

    • Зочин

      (103.57.94.60) 2021-04-21 10:46
      • 0
      • 1

      Оюун эрдэнэ Ерөнхий сайд хийж чадахгүй нь тодорхой боллоо. Мэдлэг боловсрол муу, туршлага бахйгүй, өөрийн толгойгүй, алсын хараагүй, хий хоосон мөрөөдөж, гоё үг хэлэх дуртай, улсаа боддоггүй, хар амиа боддог, шоучин гээд маш олон муу шиж чанар нь энэ хэд хоногт ил боллоо. Одоо бушуухан чаддаг хүнд зайгаа тавьж өгөх хэрэгтэй байна. Тэгэж байж Монгол сэхнэ.

      Хариулах

    • Зочин

      (202.179.21.226) 2021-04-21 07:56
      • 0
      • 1

      Харьцангуй хяналттай цөөн тоотой тэдгээрийн хавьталаа бүртгээд байж болж байсан юмыг Оюун-эрдэнэ гэдэг ерөнхий сайд царайлсан шоучин гарч ирээд биеийн амрыг харж хорио тогтоохгүй гэж бүх юм задгайруулсан, эрүүл мэнд салбараас өгсөн зөвлөмжийг хэдэн ч удаа хэрэгсэхгүй зоргоороо авирлаж нарантуулаар хоёр ч удаа очиж шоудсанаас улсаараа хориол амсч сүйрэх нь. МАН-ын мангаруудаа наад хэлээ зажилсан бацаанаа арай ажлын туршлагатай монгол шашин номтой хүнээр солио бүтэхгүй нь.

      Хариулах