Испанийн Мадрид хотын 300 мянга орчим иргэд энэ даваа гарагаас эхлэн ажилдаа эргэн оржээ. Мадрид хотын орон нутгийн удирдлагаас мэдээлж байгаагаар энэ нь коронавирусын халдварын дэгдэлттэй холбоотойгоор улс даяар тогтоосон хорио цээрийн дэглэмийг хэсэгчлэн сулруулж байгаатай холбоотой аж.
Хөл хорионы дэглэмийг хэсэгчлэн сулруулснаар гэрээсээ ажиллах боломжгүй барилга болон үйлдвэрийн салбарын ажилчид ажилдаа эргэн орох боломжтой болжээ. Харин дэлгүүр, худалдааны төвүүд, баар, зоогийн газрууд хаалттай хэвээр байх гэнэ. Испани улс коронавирусын халдварт хамгийн ихээр өртсөн улс орнуудын нэг бөгөөд тус улсад уг вирусын халдварыг авсан 169 мянга гаруй тохиолдол бүртгэгдсэн билээ. Түүнчлэн тус улсад коронавирусын халдварын улмаас нийт 17 400 хүн нас бараад байгаа ба өнгөрсөн даваа гарагт л гэхэд 517 хүн нас баржээ.
Испанийн Ерөнхий сайд Педро Санчез хэвийн амьдрал руугаа эргэн орох үйл явцыг үе шаттайгаар явуулах ба коронавирусын халдварын тархалтыг хянах, халдвараас урьдчилан сэргийлэх арга хэмжээнүүдийг давхар авна гэдгээ анхааруулсан байна. Испанийн хууль сахиулагчид метроны буудал, нийтийн тээвэрт 10 сая амны хаалт тарааж, иргэдэд зай барих, гар угаах талаар заавар зөвлөмжийг өгөх гэнэ. Испанийн засгийн газраас улс даяар коронавирусын 1 сая оношлуурыг тараасан ба ирэх долоо хоногуудад дахин 5 саяыг тараахаар төлөвлөжээ.
Үйлдвэр, барилгын ажилчид ажилдаа эргэн орж байгаатай холбоотойгоор Испанийн Үйлдвэрчний эвлэл ажилдаа эргэн орж байгаа иргэдийн аюулгүй байдалд сэтгэл зовниж буйгаа илэрхийлжээ. 940 мянган гишүүнтэй тус үйлдвэрчний эвлэл ажил олгогчдод хандан ажилчдаа халдвар хамгааллын хувцас, хэрэгслээр хариуцлагатайгаар хангахыг уриалсан байна. Анагаах ухааны The Lancet сэтгүүлд гарсан судалгаагаар коронавирусын эсрэг вакцин гартал хөл хориог үргэлжлүүлэх нь зөв хэмээн бичжээ. Тус сэтгүүлд гарсан судалгаанд БНХАУ дахь коронавирусын халдварын дэгдэлтийг нарийвчлан авч судалсан ба хөл хорионы дэглэмийг эрт цуцалснаар халдварын хоёр дахь давалгаа үүсч болзошгүйг олж тогтоожээ.
Европын хэд хэдэн улс хөл хорионы дэглэмээ хэсэгчлэн сулруулахаар бэлтгэж байгаа ба Австри улс Улаан өндөгний баярын дараа зарим дэлгүүр, худалдааны төвүүдээ нээхээр төлөвлөсөн бол Данид коронавирусын халдварын тархалт тогтвортой хэвээр байвал ирэх өдрүүдэд цэцэрлэг, сургуулиудаа нээхээр болжээ. Харин Норвегийн хүүхдүүд ирэх долоо хоногт цэцэрлэгтээ явж эхлэх аж.
Эх сурвалж: CNN
Содномцэрэнгийн Энхзаяа
mongolcom.mn
Энэ мэдээ танд таалагдаж байвал LIKE хийгээрэй. Танд баярлалаа.
