ОХУ-ын Украинтай хиллэдэг Белгород мужийн Грайворонск хот руу Украины талаас орж ирсэн зэвсэгт бүлэглэлүүд халдсантай холбоотойгоор энэ сарын 22-ноос тус мужид онц байдал зарлаж, алан хядах үйл ажиллагааг таслан зогсоох ажиллагааг эхлүүлсэн байна.
Зэвсэгт бүлэглэлүүдийг устгах ажиллагаанд ОХУ-ын зэвсэгт хүчин, Оросын хилийн цэргийн алба, Үндэсний гварди, Аюулгүй байдлын албаны албан хаагчид оролцож байгаа тухай Белгород мужийн амбан захирагч Вячеслав Гладков мэдээлжээ.
Зэвсэгт бүлэглэлүүдийн халдлагын улмаас Грайворонск хотын оршин суугчдаас 8 хүн шархджээ. Украины талд байлдаж буй "Оросын Эрх Чөлөө", "Оросын сайн дурын корпус" нэртэй бүлэглэлүүд уг халдлагыг үйлдсэнээ мэдэгдсэн байна. Харин Украины Ерөнхийлөгчийн тамгын газраас Белгородод болж буй үйл явдалд Украины тал хамаагүй гэдгийг онцолжээ.
Baza, Shot зэрэг Telegram сувгуудад бичсэнээр алан хядах ажиллагааг таслан зогсоох ажиллагааны үеэр дээрх хоёр бүлэглэлийн 39 албан хаагч амь үрэгдэж, 5 албан хаагчийг олзолжээ. Үүссэн нөхцөл байдлын талаар ОХУ-ын Ерөнхийлөгч В. Путинд мэдээлсэн хэмээн Кремлийн зүгээс мэдэгдсэн байна.
ОХУ Украин руу довтолсноос хойш хоёр улсын хилийн ойролцоо байрлах Белгород болон бусад мужууд их бууны болон дроны халдлагад хэд хэдэн удаа өртсөн билээ.
Украинд төвтэй "Оросын Эрх Чөлөө" бүлэглэл нь Твиттер дэх хуудаснаа хилийн Козинка хотыг бүрэн чөлөөлсөн хэмээн бичсэн байна.
Оросын тал ОХУ-ын хилийн бүс нутагт гарсан халдлага нь Бахмут хот дээр төвлөрсөн анхаарлыг сарниулах гэсэн украинчуудын явуулга, Бахмут хотыг оросуудад эзлэгдсэний улс төрийн нөлөөг бууруулах гэсэн зорилготой хэмээн үзэж байгаа аж.
Эх сурвалж: BBC
Содномцэрэнгийн Энхзаяа
mongolcom.mn
Энэ мэдээ танд таалагдаж байвал LIKE хийгээрэй. Танд баярлалаа.
