МУГТ Ц.Энхжаргал чөлөөт бөхийн спортоос зодог тайллаа

Twitter Print
2020 оны 10-р сар 20-нд 18:08 цагт
Мэдээний зураг,

Чөлөөт бөхийн спортоор 20 жил хичээллэхдээ МУГТ Цогтбазарын Энхжаргал Монгол улсынхаа аварга цолыг 10 удаа өргөж байсан. Тэрээр 2005 оны ДАШТ-ээс хүрэл медаль зүүснээр эмэгтэй тамирчдаасаа амжилт ялалтын суурийг анхлан тавьсан гавьяатай нэгэн билээ.

Чөлөөт бөхийн 14 эмэгтэй тамирчин Энхжаргал гавьяатын гаргасан түүхэн замналаар тууштай хөдөлмөрлөж дэлхийн аваргаас 25 медаль зүүжээ. Иймээс МУГТ Ц.Энхжаргал нь яахын аргагүй булган сүүлтэй тамирчин юм. Өнөөдөр анхдагч Гавьяат тамирчин Ц.Энхжаргал их спортоосоо зодог тайлж мөн өөрийн нэрэмжит насанд хүрэгчдийн АШТ-ийг зохион байгууллаа. МУГТ Ц.Энхжаргал ДАШТ-ээс хүрэл, ААШТ-ий хоёр алт, 3 мөнгө, 2 хүрэл, Азийн наадмын хошой хүрэл, оюутны дэлхийн аварга хэмээх олон амжилт ялалт алдрын эзэн. Түүний амжилтуудаас харахад МУГТ Ц.Энхжаргал нь ясны тамирчин гэдгийг илтгэж байна.

Тэрбээр ээж хэмээх эрхэм алдрын эзэн болсоныхоо дараа 2016 оны Монголиа опен тэмцээнд түрүүлж үүний дараа жил нь чөлөөт бөхийн насанд хүрэгчдийн УАШТ-ээс хүрэл медаль зүүж байлаа. МУГТ Ц.Энхжаргалын нэрэмжит насанд хүрэгчдийн АШТ-ийг “Макс” групп ерөнхий ивээн тэтгэгчээр ажиллажээ. Мөн тэмцээний үеэр МУГТ Ц.Энхжаргал чөлөөт бөхийн спортын анхдагч тамирчид МУГТ Ч.Дамдиншарав, Д.Сэрээтэр нарт хүндэтгэл үзүүлэхийн зэрэгцээ УБТЗ-ын Замчин клубт харьяалагддаг байсан учраас УИХ-ын гишүүн, Зам тээврийн хөгжлийн сайд Халтарт талархал илэрхийлж хүндэтгэл үзүүлсэн юм. Мөн чөлөөт бөхийн түүхэн амжилтуудын анхдагч эзэн Энхжаргалын амжилтыг түүчээлж яваа эмэгтэй чөлөөт бөхийн тамирчдад тэрбээр хүндэтгэл үзүүлсэн юм.

Энэ л амьдралынхаа бүх л цаг үеийг Монгол улсын нэрийг тив, дэлхий, олон улсын тавцанд, Азид цуурайтуулсан МУГТ Ц.Энхжаргал олон шилдэг тамирчид бэлтгэн төрүүлэхийн төлөө чөлөөт бөхийн дасгалжуулагчийн ажилд шамдан орж байна.

А.Алтанчимэг

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.