Төрийн өмчит компаниуд Хөгжлийн банкинд тавьсан өрөө өөрсдөө төл!

Төрийн өмчит компаниуд Хөгжлийн банкинд 1 их наяд төгрөгийн өр тавьжээ. Нийт зээлийн гуравны нэгтэй тэнцэж байна. Энэ зээлийг хэн хэзээ төлүүлэх талаар хэн ч шаардахгүй болохоор давраад улсын төсвөөс буюу та бидний татвараас төлөх төлөвлөгөөг Хөгжлийн банкны шинэ удирдлагууд боловсруулжээ. Ёстой уучлаарай. Эрх баригчид, тэдний цүнх баригчид, долоогчид, эхнэр, ах дүүс, нууц амрагуудын тансагласан мөнгийг бид хэзээ ч төлөхгүй.

Хөгжлийн банк, Эрдэнэс Монгол, Эгийн голын цахилгаан станцын төсөл, Монголын газрын тос боловсруулах үйлдвэрийн төсөлд ажиллах нэрээр сар бүр өндөр цалин авч юу ч хийгээгүй, хийсэн ажил нь зөвхөн цаасан дээр үлдсэн хүмүүсийн тавьсан өрийг бид төлөх ёсгүй.

Тэгээд ч төрийн өмчит компаниуд тендэр нэртэй ямар шахаа явж, яаж идэж уудгийг бүгд мэднэ. Шивээ-Овоогийн нүүрсний уурхайд гэхэд ажиллаж байсан кранаа 43 саяар актлангуутаа дарга нар нь хувьдаа авч буцаагаад уурхайдаа сарын 17 саяар түрээсэлсэн баримт байна. Энэ бол наад захынх. Өөрсдийн олсон ашиг орлогоосоо төлөх ёстой.

1. Говийн замаас 300 гаруй тэрбум төгрөг хураасан "Эрдэнэс Монгол" Хөгжлийн банкнаас зээлсэн 150 тэрбум төгрөгөө төлөөгүй байна.

Төрийн өмчит Эрдэнэс Монгол Хөгжлийн банкнаас 170 тэрбумыг зээлж, нүүрс тээврийн замыг "Энержи ресурс"-ээс худалдаж авсан. Дараа нь энэ замаар зорчсон нүүрс тээврийн машин бүрээс 250,000-350,000 төгрөг зам ашигласны төлбөр болгож авсан. Дунджаар 300 гаруй тэрбум төгрөг жолооч нараас авчээ. Энэ мөнгө хаашаа орчихоод Хөгжлийн банкинд тавьсан өрөө төлөхгүй, татвар төлөгчдөөр төлүүлэх тухай ярина вэ? Хамгийн ашигтай ажилласан компани гээд дарга нь шагнуулаад байл уу?

2. Цахилгаан станц цаасан дээр барьсан өртөг 43,9 тэрбум байж болох уу?

Эгийн голын усан цахилгаан станц барихаар Хөгжлийн банкнаас 43.9 тэрбумыг авчээ. Станцыг ердөө цаасан дээр барьсан юм даа. Эндээс цалин авч, цаас үйлдвэрлэхээс өөрийг хийгээгүй хүмүүсийн өрийг бид төлөх үү?

3. Газрын тос боловсруулах үйлдвэрт 205 тэрбумыг зарцуулсан ч үйлдвэр байхгүй, бүр татах хоолой нь ч байхгүй

Энэ мөнгийг зүгээр л төмөр зам, засмал зам, ажилчдын орон сууц, дэд бүтцэд зориулсан. Үйлдвэрийн хувьд тоосго ч тавиагүй, газрын тосоо 600 гаруй км-ийн цаанаас татах хоолойгоо ч бариагүй байгаа шүү

4. ТОСК-ийн зээлүүд бол ямар улс төрчдийн гараар орж, юу болсныг бид бүгдээрээ мэднэ.

Тэгээд ч төрийн өмчит компаниуд тендэр нэртэй ямар шахаа явж, яаж идэж уудгийг бүгд мэднэ. Эрдэнэтийн шахаа гэж ухаан алдмаар юм явдаг.Шивээ-Овоогийн нүүрсний уурхайд гэхэд ажиллаж байсан кранаа 43 саяар актлангуутаа дарга нар нь хувьдаа авч буцаагаад уурхайдаа сарын 17 саяар түрээсэлсэн баримт байна. Энэ бол наад захынх. Гадаад дотоодод зугаалсан,том машин худалдаж авч тансагласныг тоочоод барахгүй. Төрийн өмчит компаниуд өөрсдийн олсон ашиг орлогоосоо төлөх ёстой. Үүний тулд шахаа, зугаалга, хурал зөвлөгөөн, хэрэггүй зардлуудаа тана. Тэгээд өрөө төл!

Сэтгүүлч Б.Отгон

 

Энэ мэдээ танд таалагдаж байвал LIKE хийгээрэй. Танд баярлалаа.