Камчатскд зорчигч тээврийн онгоц осолдож, бүх зорчигч амиа алдлаа

Twitter Print
2021 оны 07-р сар 07-нд 12:57 цагт
Мэдээний зураг,

Камчатск бүс нутгийн амбан захирагч Владимир Солодов зорчигч тээврийн Ан-26 онгоц осолдож, тус онгоцоор зорчиж байсан 28 зорчигч бүгд амиа алдсантай холбоотойгоор Камчатск бүс нутагт гурван өдрийн гашуудал зарлажээ. 

Камчатск бүс нутгийн засаг захиргааны хурлаар хохирогчдын ар гэрт олгох нөхөн төлбөрийн хэмжээг 3.5 сая гаруй рубль байхаар тогтоожээ. Үүний 2 025 000 рублийг даатгалаас, 1 сая рублийг Ан-26 зорчигч тээврийн онгоцны ажиллагааг хариуцаж байсан агаарын тээврийн компаниас, 500 мянган рублийг Камчатск мужаас тус тус олгохоор болжээ. 

Түүнээс гадна ослын шалтгаан одоогоор тодорхойгүй байгаа гэдгийг амбан захирагч Владимир Солодов онцолжээ. Түүний хэлж байгаагаар агаарын тээврийн салбарын мэргэжилтнүүд онгоцны хар хайрцгийг судалсны үндсэн дээр дүгнэлтээ гаргана гэжээ. 

Өнгөрсөн мягмар гарагт Петропавловск-Камчатскаас Палана тосгоны чиглэлтэй зорчиж байсан зорчигч тээврийн Ан-26 онгоц буух цагаасаа 10 минутын өмнө холбоо тасарчээ. Онгоцны эвдэрсэн хэсгүүд нисэх онгоцны буудлаас холгүй хадны ирмэг болон эргээс 4 км зайд далайгаас олджээ. Осол гарах үед тус онгоцонд 28 хүн зорчиж байсан аж. 

Онгоц газардах үед цаг агаарын нөхцөл байдал хүнд байсан болохыг албаны хүмүүс онцолж байна. Аврагчид ослын газраас зорчигчдын цогцоснуудыг гаргах ажлыг эхлүүлээд байгаа ба аврагчид одоогийн байдлаар 6 хүний цогцсыг гаргаад байна.

Эх сурвалж: interfax.ru

Содномцэрэнгийн Энхзаяа

mongolcom.mn

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.