Э.Макрон сүүлийн хорин жилд Францын ерөнхийлөгчөөр дахин сонгогдсон анхны хүн боллоо

Twitter Print
2022 оны 04-р сар 25-нд 08:20 цагт
Мэдээний зураг,

Францын Ерөнхийлөгчийн сонгуулийн 2-р шатны санал хураалт энэ сарын 24-нд болж өнгөрлөө. Францын Ерөнхийлөгчийн сонгуульд одоогийн Ерөнхийлөгч Эммануэл Макрон 58.5% саналаар ялалт байгуулсан нь санал өгсөн сонгогчдоос авсан судалгаа буюу exit poll үр дүнгээр тодорхой болжээ. Макрон сүүлийн 20 жилд дахин сонгогдсон анхны Ерөнхийлөгч болов.

Түүний өрсөлдөгч Ли Пен 41.5% санал авсан ба хэрэв ялсан бол ОХУ-ын Ерөнхийлөгч Путинтэй ойр гэдгээрээ Европ, Оросын харилцаанд өөрчлөлт орох байсан гэж судлаачид үзэж байв.

Нөгөөтэйгүүр иргэд эрчим хүчний үнэ, инфляцийн түвшин огцом нэмэгдсэнтэй холбоотойгоор худалдан авах чадвартаа ихээр санаа зовох болсон нь санал асуулгын үеэр тодорхой болсон ба нэр дэвшигч Марин Ле Пэн кампанит ажлынхаа үеэр уг асуудал дээр анхаарахаа удаа дараа онцолсон бол Э.Макроны хувьд Украинд болж буй асуудал, Украины асуудалд Европын холбоо ямар байр суурь илэрхийлэх тал дээр л анхаарсаар байгааг ажиглагчид онцолж байв.

Марин Ле Пэн, Э.Макрон нарын хувьд 2017 оны сонгуулийн 2-р шатны санал хураалтанд өрсөлдөж байсан ба тухайн үед Марин Ле Пэн 33 хувь, Э. Макрон 66 хувийн санал авч байсан билээ. 

44 настай Э.Макрон Францын төрийн тэргүүний хувиар хэд хэдэн өөрчлөлт шинэчлэлт хийсэн ба татварыг бууруулж, алан хядах үйл ажиллагаатай тэмцэхэд зориулж аюулгүй байдлын тухай хуулиа чангатгасан юм. 

Францын Ерөнхийлөгч Э.Макрон, төрийн тэргүүний сонгуульд түүнтэй өрсөлдөж буй барууны популист “Үндэсний нэгдэл” намын тэргүүн Марин Ле Пен нар сонгуулийн хоёрдахь шатны санал хураалт болохоос 4 хоногийн өмнө эхний бөгөөд сүүлчийн телевизийн мэтгэлцээнд оролцсон нь сонгуулийн үр дүнд хүчтэй нөлөөлсөн хэмээн ажиглагчид үзэж байна. Учир нь, францчуудын 10 гаруй хувь нь хэний төлөө саналаа өгөхөө шийдэж чадалгүй тээнэгэлзж байна хэмээн судалгаагаар гарсан байдаг.

Хоёр улстөрчийн хувьд Оростой харилцаж байсан түүх нь арвин учраас мэтгэлцээний гол сэдэв нь Орос-Украины дайн байлаа.

Оросын цэргүүд Украинд нэвтрэхээс өмнөхөн Москвад айлчилсан барууны цөөхөн улстөрчдийн нэг бол Макрон юм. Харин дайн эхэлснээс хойш Макрон Оросын үйл ажиллагааг эрс буруушааж, Барууны хориг арга хэмжээнүүд ба Киевт зэвсэг нийлүүлэх явдлыг тууштай дэмжиж байна. Үүний зэрэгцээ тэрбээр ерөнхийлөгч В.Путинтэй олон цагийн турш утсаар ярьжээ. Францын эх сурвалжуудын мэдээлснээр, Оросын удирдагч Орос, Украины үүсэл гарлын талаарх өөрийн бодлыг Макронд нэлээд удаан тайлбарлан ярьсан аж.

Харин Ле Пений хувьд, түүнийг Европ дахь Путиний гол холбоотон дэмжигчдийн нэг хэмээн үздэг. 2017 оны сонгуулийн өмнө тэрбээр хэлэхдээ “Орос улс Крымыг өөртөө нэгтгэсэн явдлыг хууль бус үйлдэл хэмээн үзэхгүй байна” гэж байжээ.  Мөн 2016 оны 11 дүгээр сард ВВС-д ярилцлага өгөх үеэрээ, В.Путиний удирдлагын арга барил бол ухаалаг протекционист бодлогод тулгуурласан бөгөөд улс орныхоо эрх ашиг, үндэсний онцлогийг хамгаалж байна гэж дүгнэн хэлсэн удаа бий.

Энэ удаагийн мэтгэлцээний үеэр Макрон урьд нь ярьж байсан зүйлүүдийг нь Ле Пенд сануулан сөхөж түүнийг хатуухан шүүмжлэв. Түүгээр ч үл барам Ле Пен 2014 онд Оросын эрх баригчдад ойр байдаг “Орос-Чехийн банк”-наас 9 сая еврогийн зээл авсан гэдгийг нь ч сануулаад авав. “Та бол Оросын эрх баригчдаас, Путинээс хамааралтай хүн, Оростой харилцахдаа та өөрт тань зээл өгсөн банкны эзэнтэй ярилцдаг” гэж Макрон ширүүхэн хэлжээ.   

Хариуд нь, Ле Пен “би өөрийгөө бүх талаар эрх чөлөөтэй эмэгтэй гэж үздэг, Францын банкууд бүгдээрээ надад зээл өгөхөөс татгалзсан тул Орос-Чехийн банкинд хандсан” гэдгээ хэлсэн байна. Эдийн засгийн амаргүй нөхцөлд амьжиргаагаа залгуулж буй олон сая францчуудын адилаар зээл авахаас аргагүйд хүрсэн гэж Ле Пен тайлбарласны хариуд Макрон “танаас ялгаатай нь гэвэл, францчууд зээл авах гэж Оросод ханддаггүй” гэжээ.

Эх сурвалж: BBC

Содномцэрэнгийн Энхзаяа

mongolcom.mn

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.