Монгол улсын гарьд П.Сүхбат: Арслан цолны хэмжээнд барилдаж явлаа

Twitter Print
2014 оны 07-р сар 11-нд 17:21 цагт
Мэдээний зураг,

Үндэсний их баяр наадам, Ардын хувьсгалын 93 жилийн ойн хүчит бөхийн барилдаан эхэллээ. Энэ удаа шинэхэн цолоо авсан дархан аварга А.Сүхбат, Г.Өсөхбаяр болон улсын аварга О.Балжинням, С.Мөнхбат, Г.Эрхэмбаяр, улсын арслан Д.Мөнх-Эрдэнэ, Д.Ганхуяг, Д.Азжаргал, Х.Мөнхбаатар, П.Бүрэнтөгс тэргүүтэй хүчит 512 бөх зодоглож байна. Наадмын барилдааны нэгийн даваанд том цолтой бөхчүүд бүгд учраагаа давж өнгөтэй байгаагаа харуулсан. Өнөө жил залуу аварга С.Мөнхбат, Г.Эрхэмбая, улсын арслан Х.Мөнхбаатар, Д.Ганхуяг, улсын гарьд Н.Ганбаатар, Ж.Бат-Эрдэнэ, Б.Гончигдамба, улсын заан Ч.Санжаадамба, Б.Батмөнх зэрэг хүчтэнгүүдээс нэг нь түрүүлнэ гэж наадамчин олон ярьж байлаа. Наадмын нэгийн давааны үеэр улсын гарьд П.Сүхбат, улсын харцага Н.Түвшинбаяр нартай цөөн хором ярилцлаа.

 

Улсын гарьд П.Сүхбат: Гарьд цол минь хэзээ нэгэн цагт арслан болох байх

-Сайхан наадаж байна уу, таны сэтгэгдэл ямар байна вэ?

-Сайхан наадаж байна. Сэтгэгдэл өндөр байна. Хоёр дархан аварга төрлөө. Сэтгэл хөдлөөд залуу сайхан бол хүчийг үзэж барилдмаар л санагдаж байна.

-Ардын хувьсгалын 70 жилийн ойн баяр наадмын дурсамжаасаа хуваалцахгүй юу?

-Энэ тухай өнөөдөр зөндөө ярьлаа. Дархан аварга Б.Бат-Эрдэнийг өвдөг шороодуулж наадамд үзүүрлэсэн. Тэр жил О.Балжинням аварга түрүүлж байлаа. Одоо гарьд цолтой барилдаж байна. Гэхдээ тухайн үед миний амжилт үнэлэгдээгүй болохоор сэтгэлд таагүй байдаг. Гарьд цол минь хэзээ нэгэн цагт арслан цолоор үнэлэгдэх байх гэж бодож явдаг.

-Улсын арслан цол өгөхгүй байгаа шалтгааныг юу гэж бодож, тайлж явдаг вэ?

-Одоо Б.Гантогтох бид гарьд цолтой барилдаж байна. Уг нь арслангийн хэмжээний амжилт үзүүлсэн. Би Ардын хувсгалын түүх 70 жилийн ойн баяр наадамд үзүүрлэсэн, Б.Гантогтох гурван удаа үзүүрлэсэн. Нэг нь Х.Баянмөнх аваргын хүү, нөгөө нь Бөхийн холбооны тэргүүн Р.Нямдоржтой сайн муу холбоогүй болохоор өдий хүртэл арслан болоогүй юм болов уу гэж боддог.

-Барьц сонгож барилдах нь хэр зөв бэ?

-Энэ бол тийм ч зөв гарц биш. Хүний хөдөлмөрийг үгүй хийж байгаа. Одооны хүүхдүүд жин ихтэй болж. Тамирчин хүн дүрмэндээ тохируулж бэлтгэл сургууль, мэхээ бэлдэнэ. Бидний үед 100 кг-аас илүү жинтэй хүн бараг байхгүй байлаа. Би гэхэд ид барилдаж байхдаа 90 кг хүрдэггүй байсан. Гэхдээ Бөхийн холбоо энэ бүгдийг зөв зохицуулах байх.

-Наадамчин олондоо хандаж юу хэлэх вэ?

-Монголчууддаа сайхан наадаарай гэж хэлье. Ялангуяа гадаадад байгаа охиндоо, Денвер хотод байгаа “Гарьд” багийнхан, найз нөхөд та бүхэндээ баярын мэнд хүргэе.

Монгол улсын хөдөлмөрийн баатар, гавьяат тамирчин, Олимпийн алт, мөнгөн медальт, улсын харцага Н.Түвшинбаяр: Дархан аварга Г.Өсөхбаярыг тахимаа өгнө гэж бодоогүй байсан

-Сайхан наадаж байна уу?

-Сайхан, Сайхан наадаж байна уу?

-Энэ жил бэлтгэл хэр хангагдсан бэ?

-Ер нь дажгүй, боложмийн сайн бэлтгэлээ хийлээ. Булган нутгийн бөхчүүдтэй наадмын бэлтгээ хийсэн.

-Харцага цолоо ахиулах бодол байна уу?

-Барилдаж байгаа бөхчүүд бүгд давахын төлөө байдаг. Би ч гэсэн сайхан барилдаж цолоо ахиулах бодол бол байгаа. Гэхдээ наадамчин олноо хүндэтгэж сайхан л барилдхыг бодно.

-Анх харцага цол авах барилдаанд дархан аварга Г.Өсөхбаяр барилдалгүй тахимаа өгнө гэж бодож байв уу?

-Тэр ёстой санаанд ороогүй. Намайг аварга амлаж авсан байна. Сайхан барилдах тухай л бодож байсан.

-Долоогийн даваанд улсан аварга С.Мөнхбат таныг амлаж авсан. Ер нь аваргатай сайн барилдаж байгаа харагдсан?

-Би хүүхэд байхаасаа л үндэсний бөхөд дуртай, барилдах хоббитай байсан. Сайхан улсын цол авлаа. Гэхдээ аваргатай эн тэнцүү барилдах болоогүй байна. Санасан мэхээ хийж барилдъя гэж бодсон.

-Наадамчин олонд хандаж юу гэж хэлэх вэ?

-Наадам сайхан болж байна. Монгол түмэндээ баярын мэнд хүргэж, сайхан наадаарай гэж хэлье.

 

Сэтгүүлч М.Золбаатар

E-mail: mongolcom.mn@gmail.com
Утас: 76110303, 76110505

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.