А.Сүхбат дархан аварга болсон ч наадамд зодоглохгүй

Twitter Print
2014 оны 07-р сар 07-нд 12:40 цагт
Мэдээний зураг,

Өнөөдөр Монгол улсын Ерөнхийлөгчийн зарлигаар даян аварга А.Сүхбат, Г.Өсөхбаяр нарт “Дархан аварга” цол олголоо. Үндэсний бөхийн тухай хуулинд өөрчлөлт оруулж улсын наадамд дөрөв түрүүлсэн Г.Өсөхбаяр, гурав түрүүлсэн А.Сүхбат нарт “дархан аварга” цол хүртээв. Ийнхүү Монгол үндэсний бөхийн түүхэнд есөн дархан аварга төрөн гарлаа. Тэдгээрээс Төв аймаг хоёр дархан аваргатай болж байгаа нь онцлог юм.

 

Дархан аварга А.Сүхбат: Миний амжилтыг зохих ёсоор нь үнэллээ

-Та сэтгэгдлээ хуваалцахгүй юу?

-Би улсын баяр наадамд гурван удаа түрүүлсэн. Үүнээс 2001 онд тэгш ойн жил арав даван түрүүлсэн. Энэ жил “дархан аварга” цол олгосонд баяртай байна. Миний гаргасан амжилтыг бататгаж байна. Монгол бөхийн цаашдын хөгжлийн төлөө улам ихийг хийх болно.

-Энэ жилийн баяр наадамд зодоглох уу?

-Зодог тайлаад найман жил боллоо. Гэхдээ энэ хугацаанд бэлтгэл сургуулиа таслаагүй, бөхийн ертөнцөөс огтхон ч холдоогүй байгаа. Хамгийн сайн багш гэдэг бол өөрөө өөртөө байдаг. Миний хувьд бэлтгэл сайн байгаа.

-Барилдах шийдвэрээ хэзээ гаргах вэ?

-Монголын ард түмэндээ сайхан наадаарай гэж хэлье. Би шийдвэрээ гаргаагүй байна.

 

 

Дархан аварга Г.Өсөхбаяр: Залуу бөхчүүддээ үлгэр дуурайл болж явах хүндтэй үүрэг хүлээлээ

-Дархан аварга болсонд баяр хүргэе?

-Баярлалаа. Монголын ард түмний олон мянган жилийн түүхтэй, том өв соёл болсон үндэсний бөхийн хамгийн дээд цол “дархан аварга” цол хүртсэндээ баяртай байна.

-Наадмын бэлтгэл хэр хангагдсан бэ?

-Бэлтгэл сайн хангагдсан. Бөхийн гал Улаанбаатараас баруун тийшээ манай нутгийн зүгт ойрхон байрлаж байгаа.

-Ард түмэндээ хандаж юу хэлэх вэ?

-Дархан аварга цолоо ёс жудагтай, Монгол түмнээ хүндэтгэж, залуу бөхчүүдэд үлгэр дуурайлтай авч явах болно. Ард түмэндээ удахгүй болох наадмын мэнд хүргэе.

-Архангай аймгаас дөрвөн аварга цолтой бөх төрөн гарсан, та анхны дархан аварга боллоо?

-Манай Архангай аймгаас даян аварга Н.Жамьян, Ц.Чимэд-Очир, улсын аварга Г.Вандан тэгээд миний бие даян аварга цол хүртээд байсан. Өнөөдөр энэ өндөр цол авч байгаад баяртай байна.

 

 

Сэтгүүлч М.Золбаатар

E-mail: mongolcom.mn@gmail.com
Утас: 76110303, 76110505

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.