Делид дахиад л хөл хорио тогтоолоо

Twitter Print
2022 оны 01-р сар 05-нд 11:49 цагт
Мэдээний зураг,

Энэтхэгт коронавирусын халдварын 3 дахь давалгаа эхэлж, нийслэл Дели, эдийн засгийн төв Мумбай хотуудад халдварын тохиолдлууд огцом нэмэгджээ. Мягмар гарагт Энэтхэгт коронавирусын халдварын 37 379 тохиолдол шинээр бүртгэгдсэн ба тохиолдлуудын тоо долоо хоногийн өмнөх үзүүлэлтээс 5 дахин нэмэгджээ. Шинээр бүртгэгдсэн тохиолдлуудын 1/3 нь Дели болон Мумбай хотуудад бүртгэгдсэн байна. Үүнтэй холбоотойгоор дээрх хоёр хотод халдварын тархалтыг зогсоохоор хөл хорио тогтоогоод байна.

Энэтхэгийн иргэдийг коронавирусын эсрэг вакцинжуулах ажлыг хариуцан ажиллаж байгаа мэргэжилтнүүд тус улсад коронавирусын халдварын 3 дахь давалгаа эхэлснийг онцолж, 3 дахь давалгаа нь омикрон хувилбарын халдварын тархалттай холбоотой гэж үзэж байгаа аж.

Омикрон хувилбарын халдварын дийлэнх тохиолдлууд Махараштра мужид бүртгэгдээд байна. Дели хотын Эрүүл мэндийн сайдын мэдээлснээр тус хотод бүртгэгдсэн коронавирусын халдварын тохиолдлуудын 81 хувь нь омикрон хувилбарын халдвар болох нь тогтоогджээ.

Энэтхэгийн томоохон эмнэлгүүдийн нэг болох Дели хотод байрлах Бүх Энэтхэгийн Анагаахын Шинжлэх Ухааны институт нь эмч нарынхаа өвлийн амралтыг цуцалжээ.

Судалгаагаар омикрон хувилбарын халдвараар өвдсөн иргэд эмнэлэгт хэвтэн эмчлүүлэх магадлал бага ч Өнгөрсөн мягмар гарагт Дели хотын удирдлагууд долоо хоног бүр баасан гарагаас даваа гараг хүртэл хөл хорио тогтоох шийдвэр гаргажээ.

Өмнө нь эрх баригчид Дели хотын фитнессийн төвүүд болон кинотеатруудыг хаасан билээ.

Мумбай хотын удирдлагууд өдөрт бүртгэгдэх халдварын тоо 20 мянгыг давсан тохиолдолд хөл хорио тогтооно гэжээ. Жуулчдын ихээр очдог Гоа мужид мөн адил коронавирусын халдварын тархалт нэмэгдсэн ба энэ нь Зул сарын баяр, Шинэ жилийн баярын үеэр хүмүүс нэг дор олноорол цугларч, баяр тэмдэглэсэнтэй холбоотой гэж мэргэжилтнүүд үзэж байна.

Энэтхэгийн засгийн газар коронавирусын эсрэг вакцины нэмэлт тун хийх тадаар албан ёсны мэдэгдэл гаргаагүй байгаа ч Ерөнхий сайд Нарендра Моди энэ сарын 10-наас эрүүл мэндийн салбарын ажилчид болон 60-аас дээш насныханд вакцины нэмэлт тун хийж эхлэх талаар дурдсан аж.

Энэтхэгийн хүн амын насанд хүрэгчдийн 63 хувь нь коронавирусын эсрэг вакцинд бүрэн хамрагдсан ба 90 гаруй хувь нь вакцины эхний тунгаа хийлгээд байгаа аж. Цар тахал эхэлснээс хойш тус улсад коронавирусын халдварын нийт 34 сая гаруй тохиолдол бүртгэгдэж, уг вирусын халдварын улмаас 482 мянган хүн нас барсан билээ.

Эх сурвалж: BBC

Содномцэрэнгийн Энхзаяа 

mongolcom.mn

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.