"Түмэн эх" чуулгын хөөмэйч Х.Дамдин: ОХУ-д болсон фестивальд манай тоглолт шилдэг нь байлаа

Twitter Print
2014 оны 07-р сар 06-нд 10:00 цагт
Мэдээний зураг,

Монгол түмний их өв соёл, бахархал болсон ардын урлаг зөвхөн Монголчуудын маань төдийгүй гадаадын жуулчдын үзэх, харах сонсох дуртай үзвэрийн нэг. Ардын урлагаа хөгжүүлж, түүнийгээ гадаад болон дотоодод танилцуулан сурталчлахад их үүрэг гүйцэтгэж яваа хамтлаг бол яах аргагүй “Түмэн эх” чуулга гэдэгтэй та ч санал нийлэх буй заа. Энэ чуулгын тоглолтыг үзэн суугаа хэн ч гайхан бахдахаас гадна Монголын язгуур ардын урлаг ямар олон төрөл жанртайг мэдрэнэ. "Түмэн эх" чуулга үнэхээр чадварлаг уран бүтээлч хамт олныг бүрдүүлж чаджээ. Иймээс тэдний гайхамшигт тоглолтыг үзсэн гадаадын жуулчид үнэхээр сэтгэл өндөр байх аж. Авъяас чадвараараа Монголынхоо нэрийг гаргаж яваа “Түмэн эх” чуулгын морин хуурч, хөөмэйч Х.Дамдинтай уулзаж яриа өрнүүллээ.

-Саяхан ОХУ-д болсон фестивальд оролцоод ирсэн. Энэ талаараа сонирхуулаач?

-Ази, Европын 11 орны уран бүтээлчид оролцсон фестивальд манайх шилдэг нь байж чадсан. Учир нь Азийн орнуудын хувьд байнга л үзүүлдэг, хоорондоо онцын ялгарах зүйлгүй адилхан шахуу бөмбөртэй, бүжигтэй үзүүлбэртэйгээ л ирсэн. Харин манайхны хувьд хөгжим нь амьд, маш өвөрмөц бөгөөл шинэлэг, өөрсдөө тоглож байгаа нь тэнд ирсэн зочдыг их гайхшруулсан. Ер нь ямар ч фонаграммгүй хөгжмийг тайзан дээрээс үзэгчид рүү шууд хүргэнэ гэдэг гоё.

-Тус фестивальд танай чуулга хэдэн үзүүлбэр үзүүлэв?

-Анх удаа зохиогдож байгаа Оросын Цагаан шөнийн баярт зориулсан тоглолт. Тус тоглолтын өдрүүдэд Санктпетербургийн цагаан шөнө тохиосон тул шөнө бололхгүй өдөр шөнөгүй л гэгээтэй, гайхамшигтай сайхан цаг үетэй давхацлаа. Бидний хэлж заншсанаар Ленинградын Цагаан шөнийг үзэх завшаан давхар тохиосонд маш их баяртай байна. Энэ баяр нь нэг сарын хугацаанд үргэлжилдэг. Манайх өдөр бүр 30-40 минутын тоглолтыг 7 хоногийн турш үзүүлсэн. Биднийг амжилттай оролцсонд зохион байгуулагчдын зүгээс маш талархалтай хандсан.

-Тоглолтын үйл явцаас сонирхуулбал?

-Задгай том паркад болсон. Бидний хувьд 7 өдөр оролцсон. Манай монголчуудын үндэсний баяр наадам адил өргөн цар хүрээтэй, сайхан фестиваль болсон гэж бодож байна.

-Таны хөөмэйн аялгуу жуулчдыг их бишрүүлэх юм. Та хөөмэйг хэрхэн сурав?

-Би уул нь СУИС-ийг морин хуурч багшийн мэргэжлээр төгссөн. Энэ чуулгадаа ажиллаад нэг жил болж байна. СУИС-д ороод үе тэнгийн хөөмэйн ангийн найз нөхдөөсөө өөрийн сонирхлоороо суралцсан. Би хичээж л байна, мэргэжлийн хөөмэйч бол болоогүй байна.

-Хөөмэйч хүн хоолойгоо гамнах хэрэгтэй байх?

-Тэгэлгүй яахав. Хэт  хүйтэн зүйл уух ёсгүй. Хааяа өвдчих гээд байдаг тал бий.

-Жуулчид танай чуулгын ямар үзүүлбэрийг илүү сонирдог вэ?

-Бидний ажигласнаар жуулчдын дийлэнх нь буюу 70-80 хувь хөөмэй, уран нугаралтын үзүүлбэрийг илүүд сонирхож, таашааж байгаа нь харагддаг. Манайх 30 гаруй  уран бүтээлчтэй, дор бүрнээ л ардын урлагынхаа сайхныг харуулж, мэдрүүлэх гэж чин сэтгэлээсээ хичээн ажилладаг даа. 

-Танайх хэдий үед их ачаалалтай байдаг вэ?

-Долдугаар сараас  наймдугаар сар хүртэлх хугацаанд жуулчид  ихтэй байдаг. Ер нь Монголд ирж байгаа жуулчдын дийлэнх нь манай чуулгын тоглолтыг үздэг юм. Зуны сарууддаа өдөрт 2 тоглолтыг тогтмол үзүүлдэг.

-Монгол Улс Соёл урлагийн тусдаа статустай яамтай болоод багагүй хугацааг өнгөрөөж байна. Яамны зүгээс язгуур урлагийг хөгжүүлж байгаа уран бүтээлчдээ хэр дэмждэг вэ?

-Ер нь биднийг суралцаж байхад язгуур урлагаа тийм сайн дэмждэггүй байсан гэж сонссон. Харин одоо бол харьцангуй ойлгодог болсон  байна. Гэхдээ "Түмэн эх" чуулга улсын биш хувйн статустай болохоор улсаа төлөөлж олон улсын арга хэмжээ, тэмцээн уралдаанд оролцлоо ч тусламж дэмжлэг авч байгаагүй. Орост болсон саяын фестивальд гэхэд л манай чуулга хувийн зардлаараа оролцоод ирсэн. Чуулга өөрөө үзэгчээ олно, орлогоороо уран бүтээлчдээ цалинжуулдаг. Улсаас ямар нэгэн тусламж байхгүй. Хувийн гэдэг үүднээс орхигддог байх.

-Танай тоглолтийн үргэжлэх хугацаа нь хэр байдаг вэ?

-Манай тоглолт 1 цаг 10 минутын номертой. Хүсвэл тэр хугацааг сунгаж болно. Яг цагтаа эхэлдэгээрээ онцлогтой. Манай хөтөлбөрт дуу бүжиг, уран нугаралт, уртын болон ардын дуу, хөөмэй, хөгжмийн номер, дууны хоршил, бие биелгээ, цан масктай бүжиг гэх Монголын ардын урлагийн бүх төрлийг үзүүлдэг. 

 

Х.Эрдэнэсолонго

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.