Дэлхийн хурдан хүмүүсийн өлгий - ӨМНӨГОВЬ

Twitter Print
2020 оны 11-р сар 23-нд 09:52 цагт
Мэдээний зураг,

Өмнөговь нутаг маань дэлхийн хурдан хүмүүсийн өлгий гэж овоглох болов. Өнөөдөр хэт холын зайн гүйлтийн дэлхийн аварга шалгаруулах тэмцээн (ДАШТ)-д Өмнөговь аймгийн Даланзадгад сумын уугуул Б.Буджаргал тэргүүлж, энэ төрөлд дэлхийн 5 удаагийн аваргын амжилтыг бүтээлээ.

Өнгөрсөн жил хөнгөн атлетикийн мастеруудын ДАШТ-д 85 настай Өмнөговь аймгийн Баяндалай сумын уугуул Ц.Раднаа гуай 400 метрийн зайд аваргын алтан медаль хүртэж, дэлхийн рекорд амжилтыг шинэчлэн тогтоосон билээ. Тэрбээр 60 метрийн саадтай уралдаан болон гурвын харайлтын төрөлд тус тус алтан медаль хүртэж, энэ ДАШТ-ээс 3 алтан медаль зүүсэн юм. Мөн тэрээр Австрали улсад 2019 оны 9 сард болсон хөнгөн атлетикийн аварга шалгаруулах тэмцээний гурвын харайлт, 60 метрийн гүйлт, 80 метрийн саадтай гүйлт гэсэн 3 төрөлд дэлхийн дээд амжилтыг шинэчлэн тогтоосон билээ.

Өмнөговь өймгийн Хүрмэн сумын уугуул Цолмонгийн Агваан агсан 1956-1962 онд хөнгөн атлетикийн олон төрлөөр улсын дээд амжилтыг шинэчлэн тогтоож, 1960 онд хөнгөн атлетикийн Ази тивийн аваргаар шалгарч байсан гэдэг. Өмнөговь аймгийн Номгон сумын уугуул Хөнгөн атлетикийн олон улсын хэмжээний мастер Лувсанлхундэгийн Отгонбаяр марафон гүйлтийн 5000 м-ийн улсын дээд амжилтыг эзэмшдэг. Тэрээр 2004, 2012 оны олимпийн тоглолт, 4 удаагийн ДАШТ, 2 удаагийн Ази тивийн аварга шалгаруулах тэмцээнд Монгол улсаа төлөөлөн оролцсон мэргэжлийн шилдэг тамирчин билээ.

Өмнөговь аймгийн Баяндалай сумын уугуул Монгол улсын гавъяат дасгалжуулагч, хөнгөн атлетикийн олон улсын хэмжээний мастер С.Түвшинбаяр хөнгөн атлетикийн улсын 8 удаагийн аварга, Бүх ард түмний спартикадын хошой аварга тамирчин билээ. Мөн тэрээр 1982 онд уртын харайлтын улсын рекорд амжилтыг шинэчлэн тогтоож байв. Түүний дасгалжуулсан Өмнөговь аймгийн баг тамирчид өсвөр үеийнхний хөнгөн атлетикийн УАШТ-нд завсаргүй 14 удаа, насан хүрэгчдийн УАШТ-нд 5 удаа, ахмад мастеруудын УАШТ-нд 7 удаа тус тус хошуучилсан билээ. Энэ бүх амжилтаараа тэрээр Монголын хөнгөн атлетикийн спортын хөгжилд жинтэй хувь нэмэр оруулсан юм.

Хэт холын зайн гүйлтийн шийдвэрлэх үеийн өмнө Монгол Улсын Ерөнхийлөгч Х.Баттулга Б.Буджаргалтай утсаар холбогдож, амжилт хүсэн ерөөсөн юм.

Ерөнхийлөгч тамирчиндаа амжилт хүсэхээс гадна биеийн байдал нь хэр байгааг асууж сонирхсон бол Б.Буджаргал уралдааны талаар мэдээлж, заавал түрүүлнэ гэж амлалаа.

Ерөнхийлөгч Х.Баттулга “За сайн байна уу? Хоёулаа Монголд 10 км-ын кросст хамт гүйж байсан. Адилхан спортын хүний хувьд биеийн байдал хэр байгааг тань асуух гэж холбогдож байна. Биеэ сайн бодоорой. Амрах үедээ сайн амарч байгаарай. Та туршлагатай хүн өөрөө сайн мэдэж байгаа. Дараа дараагийн тэмцээнд тань хамтран ажиллах болно. Би бүх талаар дэмжлэг үзүүлэх болно. Монголчууд танаар их бахархаж байна. Би сайн мэдээ хүлээгээд сууж байна. Амжилт хүсье” гэж сэтгэлийн дэм өгсөн юм.

А.Алтанчимэг

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.