Судалгаагаар АSTRAZENECA вакцинжуулалт хоорондын зай урт байх тусмаа үр нөлөө нь нэмэгдэж байна гэлээ

Twitter Print
2021 оны 02-р сар 27-нд 14:30 цагт
Мэдээний зураг,

ИХ БРИТАНИЙН ОКСФОРД/ASTRAZENECA-ИЙН "AZD1222" ВАКЦИНЖУУЛАЛТЫН ИНТЕРВАЛ УРТ БАЙХ ТУСАМ ҮР НӨЛӨӨ НЬ НЭМЭГДЭЖ БАЙГАА ЮМ БАЙНА

Их Британийн Оксфордын их сургуулийн судалгааны баг AstraZeneca компанитай хамтран хөгжүүлсэн COVID-19-ийн эсрэг ChAdOx1 nCoV-19 (AZD1222) вакцины үр ашиг, аюулгүй байдлын талаар 4 ширхэг санамсаргүй хяналттай туршилтат (RCT) судалгаа хийсэн үр дүнгээ 2 сарын 19-ны өдөр Lancet сэтгүүлд нийтлүүлж.

Уг вакцин эхний тарилга хийснээс хойш 90 хоногийн дараа шинэ коронавирус (SARS-CoV-2)-ийн өвөрмөц IgG эсрэгбиеийн титр хэвээр хадгалагдаж үлдсэн бөгөөд эхний ба хоёр дахь тарилгын хоорондын зай урт байх тусам үр дүн нь өндөр байгаа гэнэ.

ВАКЦИН ХИЙЛГЭСЭН БҮЛЭГТ ЭМНЭЛЭГТ ХЭВТЭЛТ БАЙХГҮЙ, ҮР ДҮНГИЙН ТҮВШИН 66.7%

Судалгааны үр дүнд COVID-19 өвчлөл AZD1222 вакцин бүлэгт 84 тохиолдол (1.0%), хяналтын бүлэгт 248 тохиолдол (2.9%), нийт 332 тохиолдол батлагдаж, вакцины үр дүнгийн ерөнхий түвшин 66.7% байсан байна.

Эхний тарилга хийснээс хойш 22 хоногийн дараа COVID-19 шалтгаанаар эмнэлэгт хэвтсэн тохиолдол AZD1222 вакцины бүлэгт нэг ч гараагүй бол хяналтын бүлэгт 15 тохиолдол гарчээ. Ноцтой сөрөг урвал AZD1222 вакцины бүлэгт 0.9%, хяналтын бүлэгт 1.1% гарсан байна.

ТАРИЛГА ХООРОНДЫН ЗАВСАРЛАГА 12 ДОЛОО ХОНОГООС ДЭЭШ БАЙХ ҮЕД ҮР ДҮНГИЙН ТҮВШИН 81.3% БОЛЖ ИЛҮҮ САЙЖИРСАН БАЙНА

Дүн шинжилгээгээр нэг удаагийн тунгийн үр дүн, хоёр тунгийн хоорондох интервалын үр нөлөөг судалж үзсэн байгаа бөгөөд нэг тунгийн дараах үр нөлөө 3 сарын дараа ч буураагүй болох нь тогтоогдсон байна. Нэг удаагийн стандарт тунг хэрэглэснээс хойш 22-90 хоног дахь үр дүнгийн түвшин 76.0%, нэг тунг хэрэглэснээс хойш 90 хоногийн дараа SARS-CoV-2 өвөрмөц IgG эсрэгбиеийн титр 28 хоног дахь хамгийн өндөр хэмжээтэй харьцуулахад ердөө 34%-иар бага (GMR) 0.66 байгаа үр дүн гарчээ.

Мөн хоёр стандарт тунгаар хэрэглэсний дараах үр нөлөө нь тарилга хоорондын хугацаа 6 долоо хоног дотор буюу богинохон байх тохиолдолд үр дүнгийн түвшин 55.1%. Харин 12 долоо хоног буюу түүнээс дээш байгаа тохиолдолд 81.3% буюу хамаагүй өндөр байгаа нь тогтоогджээ. SARS-CoV-2 вирусийн өвөрмөц IgG эсрэгбиеийн титрүүд 12 долоо хоногоос дээш хугацааны завсарлагатай тарьсан тохиолдолд 6 долоо хоногоос бага хугацаанд тарьснаас 2 дахин ихэссэн (GMR 2.32) үр дүнтэй байна.

Эдгээр үр дүнгээсүндэслэн судалгааны баг "AZD1222 вакцины үр нөлөө, аюулгүй байдал нь үүгээр баталгаажлаа. Энэ вакцин эхний болон хоёр дахь вакцинжуулалтын хоорондын хугацаа урт байх тусам үр нөлөө нь өндөр байна. Нэг удаагийн вакцины үр нөлөө 90 хоног үргэлжилж байна” гэж дүгнэсэн байна.

Үүн дээр "Вакцины хүртээмж хангалтгүй байгаа нөхцөлд аль болох түргэн хугацаанд хамгийн олон хүнд нэг тунг тарьж, 3 сарын дараа хоёр дахь тунг тарих хөтөлбөрөөр хэрэгжүүлэх нь богино хугацаанд тал хувьд нь 2 тунгаар тарьснаас илүү давуу талтай байж болох юм" гэж бас хэлжээ.

Миний бодол:

Судалгааны үр дүнгээс харахад НЭГ ХҮНД ЗААВАЛ 2 ТУНГ тарих гэж цаг алдах шаардлагагүй юм шиг байна.

Тэгэхээр манайхан одоо Энэтхэгээс ирсэн ASTRAZENECA вакцины 150 мянган тунгаа 1 хүнд 2 тунг тарина гэлгүй эхний ээлжинд 150 мянган хүндээ эхний тунг нь тарьчих боломжтой юм шиг байна.

Дараа нь COVAX хөтөлбөрөөр орж ирэх 163 мянган тунгаа 3 сарын дараа 2 дахь тун болгоод тарих боломжтой. Эрүүл мэндийн салбарын 56 мянга, онцгой байдалд ажиллаж буй 52 мянга үүн дээр нь суурь өвчтэй 276 мянган хүнээсээ эхний ээлжинд зайошгүй хийлгэх шаардлагаар нь эрэмбэлээд 40 орчим мянган хүнийг сонгоод нийт 150 мянга орчим хүнийг эхний тунгаар хамруулчих боломжтой юм шиг байна.

Уг нь дарааллаараа бол эрүүл мэнд онцгойгийн дараа 50-иас дээш насны 583 мянган хүн байгаа ч тэрнийгээ жаахан хойш ухраагаад, суурь өвчтэй хүмүүсээ эхлүүлсэн дээр байх гэж бодлоо.

 
 
 
 
 
 
Эх сурвалж: Lancet. 2021 Feb 19;S0140-6736(21)00432-3. doi: 10.1016/S0140-6736(21)00432-3.
 
Ойдовын Батгэрэл Ph.D
 
 
Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.