“Тэтгэлгээ зургаан сар аваагүй нь талийгаачийн сэтгэл санаанд нөлөөлсөн байх”

Twitter Print
2020 оны 06-р сар 10-нд 16:51 цагт
Мэдээний зураг,

Польш улсад сурч байсан Монгол оюутан өндрөөс үсэрч амиа алдсан харамсалтай хэрэг гарчээ. Хэргийг тодруулбал зургадугаар сарын 7-ноос 8-нд шилжих шөнө Польш улсын Краков хотод суралцдаг монгол оюутан сургуулийнхаа оюутны байрны зургаан давхраас үсэрч амиа хорлосон байна.

Тэгвэл УОК-ын Шуурхай штабын хэвлэлийн хурлын үеэр ГХЯ-ны Консулын газрын дарга Л.Мөнхтүшиг Польшид өндрөөс унаж амиа алдсан оюутны талаар мэдээлэл өгөхдөө "Гадаадад манай улсын иргэдийн амь нас, эрх ашиг хохирсон тухай мэдээлэл болгон элчин сайдын яамд, тухайн улсын цагдаагийн байгууллагаар дамжин Консулын газарт тухай бүр ирдэг. Энэ мэдээллийг бид авсан даруйдаа Варшав дахь элчин сайдын яамтай холбогдож тэнд буй өргөмжит консул цагдаагийн байгууллага, оюутнуудтай уулзсан. Авсан мэдээллээ ар гэрт нь яаралтай өгч буй. Мэдээлэл болгоод хэлэхэд манай улсын 128 иргэн нас барсан. Бид тухай бүрт нь арга хэмжээ авдаг.

Тэгэхээр ар гэрт нь энэ их хүнд уй гашуу тохиолдсон байхад тухайн хүүхэд нь амиа хорлосон гэж эцсийн шийдвэр гарсан мэтээр олон нийтэд ярих, түгээх, улс төрийн зорилгоор ашиглах нь маш хариуцлагагүй үйлдэл. Ар гэр нь үүнд маш их эмзэглэж буй. Амиа хорлосныг нь хэн тогтоосон юм бэ гэсэн. Тус 21 настай залуу өндрөөс унасан байдалтай нас барсан цагдаагийн байгууллага хэрэг үүсгэн шалгаж байна. Шалгалт хийж буй тул дэлгэрэнгүй мэдээлэл өгөх боломжгүй" гэсэн юм. 

Харин Польшид төгсөгчдийн холбооны тэргүүлэгч Х.Батхишигээс зарим зүйлийг тодруулахад “Польшид сурч буй монгол оюутнуудын нөхцөл байдал хүнд байна. Заримынх нь хичээл цахимаар ороод өнөөдрөөс дууссан. Тэд дотуур байрнаасаа гарч чадахгүй хөл хорионд байгаа. Өнгөрсөн долоо хоногт тэнд ажилладаг монгол эмч нар оюутнуудыг хооллосон гэсэн. Сүүлийн зургаан сарын хугацаанд тэтгэлэг олгоогүй. Оюутнуудын сургалтын болон дотуур байрны төлбөр нь нэхэгдээд хүнд байгаа гэсэн. Зургаан сар тэтгэлгээ авч чадаагүй нь талийгаачийн сэтгэл санаанд сөргөөр нөлөөлсөн байх. Гэхдээ энэ нь үхлийн шалтгаан болсон гэж шууд хэлэх боломжгүй. Польшийн цагдаагийн байгууллага хэргийг шалгаж байгаа” гэв. “Ковид-19” тахлын улмаас Польшид хоёрдугаар сараас хөл хорио тогтоож, монгол оюутнууд ажил хийх боломжгүй болжээ. 

Г.Ганаа

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.