Сумъяабазар аа, автобусаар хоёулаа хамт зорчих уу, үгүй бол бид унаагаа уная

Twitter Print
2020 оны 12-р сар 04-нд 09:17 цагт
Мэдээний зураг,

Сумъяабазар аа, автобусаар хоёулаа хамт зорчих уу, үгүй бол бид унаагаа уная.

Тэр тусмаа Автобус-1 компанийн автобусаар хамт зорчих уу. Ямар ч дагуул, хамгаалагчгүйгээр, бас нөгөө хаалган дээр зоодог халуун хэмжигчгүйгээр суугаад үзэх үү? Автобус-1-ийн жолооч "Энхсаран"-гаас үүсэлтэй, иргэн Д-гийн гэх голомтод аль 12 дугаар сарын 1-нд бүртгэгдсэн хүн юм билээ.

Эмнэлэг болон хүчнийхэн хувь хүний эрх, нэр төрийг эрхэмлэн халдвартай хүний ажил, мэргэжлийг зарлахгүй байгаа. Иргэн Д гэж анх зарлаад л хангалттай хаширсан шүү дээ. "Энхсаран"-гаас болоод тэр залууг үндсэндээ хэлмэгдүүлсэн.

Гэтэл таны автобусаар яв гээд хашаад байгаа нийслэлийн иргэд чинь хэлмэгдэхэд ойрхон байсныг хотын мээр та харж байна уу? Автобус хүлээж буудал дээр даарна, ороод чихэлдэнэ, дээр нь жолооч, зорчигчид бүгд халдваргүй гэдгийг хэн нотлох уу?

Шадар сайд Я.Содбаатар голомтыг цурманд оруулснаа хэлж байгаа ч дахиад энд тэндээс үсрээд гараад ирэхгүй гэх баталгаа байхгүй. Яаж ч бодсон та өөрийнхөө машинаар явбал аюулгүй, халдвар авахгүй. Нийтийн унаанд суувал эрсдэл чинь шууд өснө. Гэртээ вирус тээгээд очиж ч мэднэ. Дээр нь та гаргасан шийдвэрүүдээсээ үргэлж буцаж байх юм, булзааруулаад байдаг юм уу, будлиу болоо юу?

Тэгэхээр ингэж болох уу? Хоёулаа нийтийн унаагаар өдөржин хамт явъя, буудал дээр бас дааръя. Гадаа -26 хэм байгаа. Хорио эхэлснээс хойш би автобусанд ганц ч суугаагүй. Суухгүй гэж бодоод 5,6 буудал газар хааяа гарахдаа алхаж байна. Та ч автобусдаагүй. Адилхан юм чинь одоо хамт суучих уу? Чадахгүй бол энэ нэг хорион дээр хорио нэмсэн тэнэглэлээ зогсоож болох уу? Уг нь нэг хүнийг нэгээс илүү шүүмжилж бичмээргүй л байх юм. Болж бүтвэл ажлаа хийгээд ард түмэнд зөв шийдвэр гаргаад явж л байвал би тантай автобусдаад хаана ч хүрэх билээ, яах ч юм билээ. Бүүр бичих, бичихгүйг бичүүлээд, битгий ингэж зовоо л доо. Бүүр болдоггүй юм бол та нийслэлчүүдийн дунд нөгөө экс мээр Амарсайхан шиг санал асуулга явуулчих, яршиг зүгээр. Тэгээд асуудлаа хамтдаа шийдэж авъя. Нэг бол та вирустай хүч хавсарч байгаад Онц байдал зарлуулах гээд улс төрийн хожоо хараад сууна уу. Бөглөрөлгүй хот болгоно гэсэн амлалтандаа хүрчих гээд бөглөө болоод гүрийгээд байгаа юм уу?

Яадаг ч байсан та нарын дажингаас болоод хүмүүс даарч, хэлмэгдэж, эрсдэл дундуур туучих ёсгүй. Эсвэл энэ зүг чиг, зорилго ажил нь харсаар байтал зөрөөд, нэг нэгэндээ шавар хаагаад, шавхай болоод байгаа УОК, НОК хоёрынхоо учрыг Ерөнхий сайд У.Хүрэлсүх та олж, нэг шугам дээр, нэг зам дээр гаргаж тавина уу?

Яаж ч бодсон таардаггүй эр, эм хоёрын дунд тарж унаж байгаа айл биш дээ, энэ улс орон.

Эмүжин

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.