Хотын экс дарга Ц.Батбаяр нарт холбогдох хэрэг шүүхэд шилжлээ

Twitter Print
2014 оны 06-р сар 29-нд 09:40 цагт
Мэдээний зураг,

Ерөнхийлөгч асан Н.Энхбаярын дуулиант хэрэг өнөөг хүртэл шийдвэрлэгдэж амжаагүй байгаа. Экс ерөнхийлөгчийг яллах гол шалтгаан болсон “Өргөө” зочид буудал, “Улаанбаатар таймс” сонины хувьчлалыг гардан гүйцэтгэсэн гэх Нийслэлийн засаг даргаар ажиллаж байсан Ц.Батбаяр, ИТХ-ын дарга асан Т.Билэгт, Нийслэлийн өмчийн харилцааны газрын өмч хувьчлалын хэлтсийн дарга н.Маналжав, Ц.Батбаярын төрсөн дүү Ц.Чанцал, Ерөнхийлөгч асан Н.Энхбаярын төрсөн дүү Н.Энхтуяа нарт холбогдох хэргийг бүтэн хоёр жилийн хугацаанд шалгаж байгаа юм.

Ерөнхийлөгч асан Н.Энхбаярыг энэ хэрэгт буруутгах үед Т.Билэгт, Н.Энхтуяа нарыг интерполоор эрэн сурвалжилж эхэлсэн. АНУ-ын иргэн болох хүсэлт гаргаад байсан Т.Билэгтийг өнгөрсөн оны долдугаар сард эх орондоо ирэхэд нь Буянт-Ухаагаас баривчилсан. Харин Н.Энхтуяагийн сураг одоо хүртэл гараагүй байна. Гэсэн ч Прокурорын байгууллагын зүгээс нотлох баримт хангалттай бүрдсэн гэж үзээд эдгээр нэр бүхий 5 хүнд Эрүүгийн хуулийн тусгай ангийн 148.4-т зааснаар яллах дүгнэлт үйлдэн хэргийг шүүхэд шилжүүлсэн байна.

Улмаар Нийслэлийн Засаг дарга асан Ц.Батбаяр, ИТХ-ын дарга асан Т.Билэгт нарт холбогдох хэргийг энэ сарын 16-нд шүүхэд шилжүүлсэн байна. Тэднийг 2012 оноос хойш МАХН-ын дарга Н.Энхбаярын гэгддэг “Өргөө” зочид буудлын хувьчлалыг хууль бусаар явуулж, нийслэлийн өмчөөс хувьдаа завшсан хэргээр буруутган шалгасан.

Тодруулбал УИХ гишүүн байсан Ц.Батбаяр, Нийслэлийн өмч хувьчлалын комиссын даргаар ажиллаж байхдаа албан тушаалаа урвуулан ашиглаж 605 сая төгрөгийн үнэлгээтэй Нийслэлийн өмчит “Өргөө” зочид буудлыг татан буулгаж Н.Энхбаярын хүү, одоогийн Монгол Банкны Дэд ерөнхийлөгч Э.Батшугарын нэр дээр байгуулсан “Хар дун” компанийн өмчлөлд шилжүүлсэн байна. Улмаар тус компанийг Н.Энхбаярын үүсгэн байгуулсан “Эском” компанийн охин компани болгон үрэгдүүлсэн байдаг.

Ц.Батбаяр нь хотын захирагчаар ажиллаж байхдаа Нийслэлийн өмчийн харилцааны газрын Өмч хувьчлалын хэлтсийн дарга Маналжавтай бүлэглэн өөрийн төрсөн дүү Ц.Чанцалд 779 сая 724 мянган төгрөгийн өртөг бүхий Сэргээн засах клиник эмнэлэг НӨҮГ-ыг 256 сая 771 мянган төгрөгөөр хувьчилан өгч 360 сая төгрөгийн хохирол учруулсан хэрэгт буруутгагдаад байгаа юм.

Харин НИТХ-ын дарга асан Т.Билэгтийн хувьд 2 тэрбум 125 сая төгрөгийн үнэлгээтэй Нийслэлийн өмчийн “Улаанбаатар таймс” сонинг хууль бусаар Н.Энхбаярын төрсөн дүү Н.Энхтуяагийн “Медиа Холдинг” компанид хувьчилсан байдаг. Улмаар тус байгууллагыг Н.Энхбаярын “Эском” компанийн охин компани болгон шилжүүлж, нийслэлийн өмчид онц их хэмжээний хохирол учруулсан болохыг хуулийн байгууллага тогтоогоод байна. Одоогоор шүүх хурлын тов зарлагдаагүй байна.

Х.Хулан

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.