Бээжин 7-р сар гэхэд хүн амынхаа 40 хувийг вакцинд бүрэн хамруулна

Twitter Print
2021 оны 06-р сар 21-нд 10:20 цагт
Мэдээний зураг,

Бээжин өнөөдрийн байдлаар иргэддээ коронавирусын эсрэг вакцины нийт тэрбум гаруй тунг хийгээд байна. Энэ нь дэлхий даяар хийгдсэн коронавирусын эсрэг вакцины нийт тунгийн 33 гаруй хувийг дангаараа эзэлж байна.

Бээжин коронавирусын цар тахлын тархалтыг хөл хорионы дэглэм болон коронавирус илрүүлэх шинжилгээний ачаар хяналтанд авснаас хойш тус улсын иргэд коронавирусын эсрэг вакцинд хамрагдах нь удааширчээ.

Энэтхэгт анх бүртгэгдсэн, халдварлах чадвар өндөртэй коронавирусын дельта хувилбарын тархалт Хятадын өмнөд зүгийн Гуандон мужид бүртгэгдсэнээр Хятадын иргэд коронавирусын эсрэг вакцинд идэвхтэй хамрагдаж эхэлжээ. Хятадын эрх баригчид 1.4 тэрбум хүн амынхаа 40 хувийг ирэх 7-р сар гэхэд коронавирусын эсрэг вакцинд бүрэн хамруулахаар төлөвлөөд байгаа ба иргэдэд дотоодын Синофарм болон Синовак компаниудын коронавирусын эсрэг вакциныг хийж байна. Дээрх хоёр вакцин нь хоёулаа хоёр тунт вакцин юм.

Хятадын Эрүүл мэндийн Үндэсний зөвлөлөөс мэдээлж байгаагаар хамгийн сүүлд хийгдсэн 100 сая тунг ердөө 5-хан өдөрт хийжээ. Гуанжоу хотод ажиллаж буй эмч нарын хэлж байгаагаар коронавирусын шинэ хувилбарын халдварын үед гарах шинж тэмдэг нь энгийн коронавирусын халдварын шинж тэмдгээс өөр, хүндрэх эрсдэл өндөртэй аж.

Түүнээс гадна зарим газрууд коронавирусын эсрэг вакцинд хамрагдсан иргэдэд үнэгүй өндөг, дэлгүүрийн хямдралын ваучер зэрэг урамшуулал олгож байгаа аж. Хятадын Эрүүл мэндийн Үндэсний зөвлөл энэ оны сүүл гэхэд хүн амынхаа 70 хувийг коронавирусын эсрэг вакцинд бүрэн хамруулахаар зорьж байгаа гэжээ.

Тус улсад коронавирусын эсрэг 3 вакцин яаралтай журмаар хийгдэх зөвшөөрлөө аваад байгаагаас Синофарм болон Синовак компанийн вакцинуудыг ДЭМБ албан ёсоор бүртгэн авсан билээ.

Синофарм болон Синовак компаниудын коронавирусын эсрэг вакциныг Филиппин, Чили, Бразил, Индонез, Мексик, Тайланд, Турк зэрэг олон тооны улсад хийж байгаа ба ДЭМБ-ын мэдээлснээр Синофарм компанийн вакцин коронавирусын шинж тэмдэг бүхий халдвар болон түүний хүндрэлээс 79 хувиар хамгаалдаг бол Синовак компанийн вакцин шинж тэмдэг бүхий халдвараас 51 хувь, коронавирусын халдварын хүндрэлээс 100 хувь хамгаалж байгаа нь тогтоогдсон юм.

Эх сурвалж: https://www.bbc.com/news/world-asia-china

Содномцэрэнгийн Энхзаяа

mongolcom.mn

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.