Шанхайд КОВИД-19 өвчний 13 мянган тохиолдол бүртгэгджээ

Twitter Print
2022 оны 04-р сар 05-нд 12:48 цагт
Мэдээний зураг,

БНХАУ-ын эдийн засгийн төв гэгддэг Шанхай хотод өнгөрсөн мягмар гарагт коронавирусын халдварын 13 мянга гаруй тохиолдол бүртгэгджээ.

Эдийн засгийн хор хохирлыг бууруулах зорилгоор өнгөрсөн долоо хоногт Хятадын эрх баригчид Шанхай хотод хөл хориог 2 үе шаттайгаар хэсэгчилж тогтоосон ба энэ мягмар гарагт Шанхай хотын баруун дүүргүүдэд хөл хорионы дэглэм цуцлагдах байсан ч коронавирусын халдварын тохиолдлуудын тоо нэмэгдэж байгаатай холбоотойгоор хөл хорионы дэглэмийг нь сунгаад байна.

Шанхай хотын захиргаанаас мэдээлснээр өнгөрсөн даваа гарагт тус хотод КОВИД-19 өвчний шинж тэмдэггүй 8581 тохиолдол бүртгэгдсэн бол энэ мягмар гарагт энэ тоо 13 086 болтлоо өсчээ.

Шанхай хотод 24 цаг тутамд 25 сая гаруй хүнээс коронавирусын шинжилгээ авч байгаа ба коронавирусын халдварын шинж тэмдэг бүхий тохиолдол өнгөрсөн даваа гарагт 268 бүртгэгдсэн нь бусад улс орнуудтай харьцуулахад харьцангуй бага тоо билээ.

Эрх баригчид Шанхай хот руу коронавирусын шинжилгээ авах цэг, тусгаарлах байранд ажиллуулахаар 38 мянга гаруй ажилчдыг илгээсэн ба 2020 оны эхэнд Ухань хотод тогтоосон хөл хорионоос хойш БНХАУ-д зохион байгуулагдсан хамгийн том эрүүл мэндийн ажиллагаа Шанхай хотод болж байна.

Шанхай хотын удирдлагууд энэ мягмар гарагаас эхлэн метроны хэд хэдэн шугамын үйл ажиллагааг зогсоож, нэмж хязгаарлалт тогтоохоо мэдэгдсэн бол БНХАУ-ын коронавирусын цар тахалтай тэмцэх албыг хариуцан ажиллаж буй Сүн Чүнлан халдвараас урьдчилан сэргийлэх, халдварын тархалтыг хянах явдал эгзэгтэй үе шатандаа явж байгааг онцолж, Шанхай хотын оршин суугчдыг бүгдийг нь коронавирусын шинжилгээнд хамруулах нь чухал ач холбогдолтой гэжээ.

БНХАУ даяар өнгөрсөн мягмар гарагт коронавирусын халдварын шинж тэмдэг бүхий 1235 тохиолдол, шинж тэмдэггүй 15 355 тохиолдол бүртгэгджээ.

Эх сурвалж: Reuters

Содномцэрэнгийн Энхзаяа 

mongolcom.mn 

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.