Төрдөө баярлаж түмпэн нулимс нэрээд, ардын засагтаа баярлаж алгаа хорстол ташаад...

Twitter Print
2020 оны 08-р сар 28-нд 12:18 цагт
Мэдээний зураг,

Хөөрхий хоёр настангууд цэцэрлэгээс мултарч, аав ээжүүд нь ардаа нуух уу, урдаа зүүх үү, тэврээд ажилдаа явах уу, тэргэнд хийгээд гудамжинд үлдээх үү мэдэхээ болив. Хүрэлцэхгүй байгаа хүүхдийн цэцэрлэгийн асуудлыг зөөллөж анх 2015 онд УИХ-ын гишүүн С.Ганбаатар, Л.Эрдэнэчимэг нар санаачлан Хүүхэд харах үйлчилгээний хуулийг батлуулж байсан түүхтэй.

За ингээд хүүхэд харагч гэдэг ажлын байр бий болж, 18-65 насны сайн дурынхныг түр сургалтад хамруулж, хүүхэд харах төвүүд үүдээ нээж, цэцэрлэгийн ачаалал цэмцийх талдаа оров. Улс даяар 1000 гаруй хүүхэд харагч, 500 орчим төв нээгдсэн хэрэг. Жилд 5000 гаруй хүүхэд энэ үйлчилгээнд хамрагдсан байдаг юм. Энэ ажилд улсаас 5,8-10 хүртэл тэрбум төгрөг төсөвлөн, нэг хүүхдийн хоолны сарын зардлыг 113 мянган төгрөгөөр тооцон тус төвүүдэд олгож байв. Хүүхдүүдийн аав ээж нар үлдсэн мөнгийг тухайн төвд хүссэнийх нь дагуу төлөх ёстой.

Нэг үгээр хэлбэл хувийн цэцэрлэгийн хялбаршуулсан, төрийн дэмжлэгтэй хувилбар гэж ойлгож болно. Тухайн үед мэргэжлийн бус хүүхэд харагч, шаардлага хангаагүй, улсын хяналт сахилга батгүй байр савтай, стандарт бус Хүүхэд харах төв хэмээх завсар дундын бүсэд балчируудаа үлдээхээс олон ээж айж, аав нар болгоомжилж байсан. Хүүхэд харах үйлчилгээний хуульд түрээсийн байр, гэр зэрэг орчинд 15 хүртэлх хүүхдийг нэг дор харах эрхийн тухай заасан байгаа. Хэдэн тэрбумын сургаар борооны дараах мөөг шиг инээд алдаж тос гялтайлгасан хүүхэд харагчид олширч, харьяа дүүрэгтээ түр сургалтанд хамрагдан гэрчилгээ авч эхэлсэн дээ.

2017 онд эрх баригч МАН Хүүхэд харах үйлчилгээг 2021 он хүртэл царцааж байгаагаа мэдэгдсэнээр энэ ажил эл хуль зогсов. За одоо 2020 он. Дахиад л хүүхэд харах үйлчилгээ. Тэгэхдээ коронагаас болоод цэцэрлэгээс шахагдсан хоёр настангууд хүүхэд харах үйлчилгээнд хамрагдах эрхтэй болж, энэ ажилд 2.0 тэрбум төгрөг төсөвлөх боллоо гээд л амтай болгон нь ардын баатар шиг мэдэгдэж, ард олон нь дагаж баясан, алгаа хорстол ташив. За зүгээр баруун гараараа алгадаад, зүүн гараараа хөөрхийлөөд, дээгүүрээ толгой илээд, доогуураа өшиглөөд байгаагаас өөрцгүй байна гээд шулуухан хэлчихмээр байна. Хоёр настангуудаас эхлээд цэцэрлэгийг нь хураачихаж байгаа юм. Цэцэрлэгт очихоор корона тусна гэнэ ээ. Тэгснээ төдөлгүй хүүхэд харах үйлчилгээг сэргээлээ, 2.0 тэрбум төгрөг өглөө гээд шоудаад эхэлж байгаа юм. Нөгөө муу хоёр настан улсын цэцэрлэгт очихоор корона тусаад, энд тэндэхийн түрээсийн байр, гэрт, мэргэжлийн бус хүүхэд харагчийн гар дээр очихоороо яах ч үгүй гэж байна.

Тэгээд нөгөө 2017 онд хэрэггүй, болохгүй гээд хаагаад, хураагаад хаясан хүүхэд харах үйлчилгээг одоо чухам сэргээгээд, 2.0 тэрбум төгрөг өгөхөөр боллоо гэж өндөлзөж мэдэгдээд, учраа олоогүй олон түмэн өрсөж алга ташаад, за зарим ээжүүд 2.0 тэрбум төгрөгийг хоёр настантай айлуудад хувааж өгөх юм уу гэж буруу ойлгож, зөрүү баярлаад...улс даяараа төрдөө талархаж түмпэн түмпэн нулимс нэрж, ардын засагтаа баярлаж алгаа хорстол ташиж хонохдоо тулав. Үүнийг чинь л шоу гээд байгаа юм. Шоучин гээд байгаа юм. Төдөлгүй хоёр настангуудын ээж аавын холбоо гэж хаанаас ч юм, хар нүд цавчлах зуур байгуулагдаад, нөгөө эмэгтэй гишүүдэд алд хадаг, алт мөнгөн аяга, өргөмжлөл талархал гардуулж давхиад, тэгснээ дээлийнх нь хормойд нүүрээ нааж бархирч уйлаад, баясан дэвхцээд...за иймдээ л тулахгүй шүү манайхаан. Хүүхдүүдэд цэцэрлэг хэрэгтэй байна. Албан ёсны, мэргэжлийн, сургуулийн өмнөх боловсролыг шаардлагын дагуу олгодог цэцэрлэгүүд л хэрэгтэй байна. Хувийнхантайгаа хүч хавсраад, улсаас санаачлаад аль болох олон цэцэрлэг ар араас нь ашиглалтад оруулмаар байна.

Хүүхэд харах үйлчилгээ яах вэ, аргаа барахад аавынхаа толгойг маажив гэгчээр гал намжааж, амь торгоох төдий аргална. Та нарын ойлгуулж байгаагаар корона гэдэг вирус хэт ухаажаад, цэцэрлэгийг таньж орж үймүүлээд, хүүхэд харах төвүүдийн хажуугаар гүлдийгээд гараад явчихдаг юм байна. Хүүхэд харагчийн гэр бүлийн хэн нэгэн тусгаарлалтаас дөнгөж гараад гэртээ ирвэл нөгөө 15 хүүхэд хамт бужигнаад, хамт хооллоод байж байх уу? Энэ жилдээ энэ мэтээр коронатайгаа хольж хутгаад, холион бантангаа зуураад, 2017 онд хурааж авсан авдар чихрийнхээ оронд 2020 онд атга чихэр тараасан болж шоудаад өнгөрч болно. 5.8 тэрбум төгрөг төсөвлөсөн 2016 онд есөн дүүрэг, гурван аймагт 5496 хүүхэд энэ үйлчилгээнд хамрагдсан юм билээ. 2.0 тэрбумаар 80 мянган ээжийн асуудлыг шийдчихлээ юү? Бид хууртая. Ядаж хууртсан царайлъя. Баярлая, ядаж баярласан царайлъя. Хүсээд байгаагаар чинь алгаа ташья, бүр хүзүү нүүрийг чинь улайтал, ичихгүй бол ингээд үргэлжлүүлээд шоудаад байтал чинь алгаа ташья.

Бахархаж баярлаад дороо дэвхцэе, бахардаж хөлд чинь ойчъё. Болж байна уу? Гоё байна уу? Гэхдээ цаашдаа яах юм бэ? Жилээс жилд цэцэрлэгийн асуудал улам бүр хүндэрнэ, жижигхэн аргаар торгооход хэцүү болно шүү.

Р.Эмүжин

 

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.