Украины Дотоод хэргийн сайд нисдэг тэрэгний ослын улмаас нас баржээ

Twitter Print
2023 оны 01-р сар 19-нд 10:20 цагт
Мэдээний зураг,

Өнгөрсөн лхагва гарагт Украины нийслэл Киевт нисдэг тэрэг осолдож, тус нисдэг тэргэнд зорчиж байсан Украины Дотоод хэргийн сайд Денис Монастырски, түүний орлогч сайд Евгений Енин, нарийн бичгийн дарга Юрий Лубкович нараас гадна 11 хүн амиа алджээ.

Уг осол гарахад ОХУ нөлөөлсөн гэх баримт нотолгоо байхгүй байгаа ч Украины Ерөнхийлөгч Володимир Зеленский Давост болж буй Дэлхийн эдийн засгийн чуулганы үеэр үг хэлэхдээ "дайны үед санамсаргүй осол гэсэн ойлголт байхгүй", дээрх осол нь дайны үр дагавар хэмээн мэдэгджээ.

Нисдэг тэрэг орон нутгийн цагаар өглөөний 08 цаг 30 минутанд хүүхдийн цэцэрлэгийн ойролцоо осолдсон ба ослын улмаас нисдэг тэргэнд зорчиж байсан 10 хүн, гадаа явж байсан 4 хүн амиа алджээ.

42 настай Денис Монастырски нь Ерөнхийлөгч В. Зеленскийн зөвлөхөөр хамгийн удаан хугацаанд ажиллаж байсан ба Дотоод хэргийн сайдын хувиар дайн тулааны үеэр аюулгүй байдлыг хангах, дотоодын цагдаагийн албаны үйл ажиллагааг хариуцах чухал үүргийг гүйцэтгэж байжээ.

Украины Ерөнхийлөгчийн тамгын газрын орлогч дарга Кирило Тимошенкогийн мэдээлснээр Д. Монастырски дайны "халуун цэг" рүү буюу Харьков хотыг зорьж байсан аж. Д. Монастырски нас барсантай холбоотойгоор Украины Цагдаагийн газрын дарга Игорь Клименко Дотоод хэргийн сайдын үүрэг гүйцэтгэгчээр томилогджээ.

АНУ-ын Ерөнхийлөгч Жо Байден ослын улмаас амиа алдсан иргэдийн ар гэр, ойр дотныхонд эмгэнэл илэрхийлсэн байна.

Осол өглөө эрт эцэг эхчүүд хүүхдүүдээ цэцэрлэг нь хүргэж өгөх цагаар болсон ба ослын улмаас шархдаж, бэртэж гэмтсэн 25 хүний 11 нь хүүхдүүд байгаа аж.

Осол болохыг харсан гэрчүүд ОХУ-ыг буруутгаж байна. Тэдний хэлж байгаагаар цаг агаар манантай байснаас гадна цахилгаан эрчим хүчгүйн улмаас байшин барилгууд ямар ч гэрэлгүй байсан нь осол гарах шалтгаан болжээ.

Эх сурвалж: The Guardian

Содномцэрэнгийн Энхзаяа

mongolcom.mn

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.