Солонгосын охид, эмэгтэйчүүд цахим орчин дахь бэлгийн хүчирхийллийн гэмт хэргийн хохирогчид болсоор байна

Twitter Print
2021 оны 06-р сар 16-нд 11:40 цагт
Мэдээний зураг,

Солонгосын охид, эмэгтэйчүүд цахим орчин дахь бэлгийн хүчирхийллийн гэмт хэргийн хохирогчид болсоор байна Цахим орчин дахь бэлгийн хүчирхийллийн гэмт хэрэг БНСУ-д түгээмэл байдаг нь тус улсад амьдарч буй охид, эмэгтэйчүүдийн амьдралын чанарт сөргөөр нөлөөлж, тухайн гэмт хэргийн хохирогч болсон эмэгтэйчүүдийн дийлэнх нь амиа егүүтгэх эсвэл эх орноосоо зугтах тухай боддог тухай Human Rights Watch хүнтй эрхийг хамгаалах байгууллагаас мэдээлж байна. Өмнөд Солонгос нь жижиг нууц камер ашиглан охид, эмэгтэйчүүдийн зургийг хууль бусаар авч, хууль бус бичлэг хийж тараадаг явдлаараа дэлхийд тэргүүлж байна.

Ихэнх тохиолдолд охид, эмэгтэйчүүдийн бие засч байгаа, нүцгэн байгаа мөн дотно харилцаанд орж буй, бэлгийн хүчирхийлэлд өртөж буй бичлэгийг зөвшөөрөлгүйгээр цахим орчинд тараах явдал маш элбэг байдаг байна.

Түүнээс гадна дээрх гэмт хэргийн хохирогч болсон эмэгтэйчүүд цагдаа нарын болон хууль сахиулах бусад албаны хүмүүсийн байцаалтанд удаа дараа орж, өөрсдийнхөө зураг эсвэл бичлэгийг цахим орчинд дахин тархсан эсэхийг өөрсдөө шалгаж, баримт нотолгоогоо өөрсдөө цуглуулах шаардлагатай болдог нь хохирогчдыг дахин "хүчирхийлсэн"-тэй адил сэтгэл санааны дарамтанд улам ихээр оруулдаг гэжээ.

Human Rights Watch байгууллагаас явуулсан дээрх судалгааг удирдсан Хизёр Барр, "Цахим орчин дахь бэлгийн дарамтын гэмт хэрэг Өмнөд Солонгост элбэг болсон нь тус улсад амьдарч буй бүх охид, эмэгтэйчүүдийн амьдралын чанарт нөлөөлж байна. Охид, эмэгтэйчүүдийн хэлж байгаагаар тэд нийтийн ариун цэврийн өрөө орохоос зайлсхийдэг, олон нийтийн газруудад бүр гэрт нь хүртэл нууц камер байх вий гэсэн үргэлжийн айдастай байдаг. Тэрчлэн дээрх гэмт хэргийн хохирогчид амиа егүүтгэх тухай боддог тухайгаа илэрхийлсэн нь маш ноцтой асуудал юм." хэмээн онцолжээ.

Судалгаагаар 2008-2017 оны хооронд шүүх дээр хэлэлцсэн бэлгийн хүчирхийллийн гэмт хэргүүдийн тоо 11 дахин өсчээ. Эдгээр гэмт хэргүүдийн дотор цахим орчин дахь бэлгийн хүчирхийллийн гэмт хэргүүд мөн багтаж байгаа аж.

БНСУ-ын Ерөнхийлөгч Мүн Жэ Ин сүүлийн жилүүдэд хурдацтайгаар нэмэгдэж буй бэлгийн хүчирхийллийн гэмт хэргүүдийг шалгахыг үүрэг болгоод байгаа билээ.

Өнгөрсөн жил Өмнөд Солонгосын цагдаа нар цахим орчинд зураг бичлэгийг нь тараана хэмээн эмэгтэйчүүдийг заналхийлж, дахин өөр зураг бичлэгээ явуулахыг шаардаж, эмэгтэйчүүдийг "цахим бэлгийн мөлжлөгт" ашиглаж байсан цахим сүлжээг илрүүлжээ.

Human Rights Watch байгууллагаас Өмнөд Солонгосын засгийн газар дээрх гэмт хэргийг үйлдсэн этгээтүүдэд тогтоох ялыг чангатгаж, цагдаа, прокурор, шүүхийг байгууллагад ажиллах эмэгтэй албан хаагчдын тоог нэмэх, жендерийн эрх тэгш байдлыг тогтоохыг зөвлөсөн байна.

2019 онд л гэхэд прокурорын алба цахим орчин дахь бэлгийн хүчирхийллийн гэмт хэргүүдийн 43.5 хувийг хэрэгсэхгүй болгожээ. Үүнтэй хартцуулахад хүн амины гэмт хэргүүдийн зөвхөн 27.7 хувь, хулгайн гэмт хэргүүдийн 19 хувийг л хэрэгсэхгүй болгожээ.

Эх сурвалж: https://www.reuters.com/world/asia-pacific/watchdog-says

Содномцэрэнгийн Энхзаяа

mongolcom.mn

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.