Гэр бүлийн чанартай цагийг үүсгэх

Шаргуу ажиллаж хөдөлмөрлөх нь амжилтын гол үндэс гэсэн буруу ойлголт зарим хүмүүст байдаг. Ажилтай, завгүй гэсэн шалтгаануудаас үүдэн хүүхдийн нийгмийн болоод гэр бүлийн харилцаа дутсанаас болж сэтгэл зүйн гэмтэл, үл ойлголцол үүсдэг.

Зарим гэр бүл энэхүү тогтсон дадлаа өөрчлөхийн тулд амралтын өдрүүдийг тусгайлан гэр бүлтэйгээ сонирхолтой зүйл хамтдаа хийх цагийг бий болгох болжээ. Гэр бүлтэйгээ өнгөрөөх цагийг энгийн бөгөөд утга учиртай, өдөр тутмын амьдралынхаа нэг хэсэг болгох боломжтой сонирхолтой санаануудыг та бүхэнтэйгээ хуваалцаж байна.

Гэр бүлээрээ дараах зүйлсийг хийн гэр бүлийн цагаа сонирхолтой, хөгжилтэй, дурсамжтай өнгөрүүлээрэй.

• ОРОЙН ХООЛ БОЛОН ӨГЛӨӨНИЙ ЦАЙГАА ХАМТ ИДЭХ – Хамгийн халуун дулаан уур амьсгал, сонирхолтой яриа хоолны ширээний ард өрнөдөг. Иймээс гэр бүлээрээ өглөө бүр хамт ширээ тойрон суун өглөөний цайгаа уугаарай. Мөн оройн хоолны цаг дээр бүгд утас, телевиз гэх мэт технологиос хол хамтдаа хооллож заншаарай.

• ТЕХНОЛОГИГҮЙ ӨДӨР ЭСВЭЛ ЦАГУУД – Техник технологийн хэт хараат байдал бидний амьдралыг хэвшил, гэр бүлийн халуун дулаан уур амьсгалд сөрөг нөлөө бий болгож байна. Хамтдаа байгаа мөртлөө хоорондоо ярилцдаггүй бүгд утас эсвэл дэлгэцэд анхаарлаа хандуулсаар. Иймээс энэ хэв маягаа эвдэн гэр бүлдээ огт технологигүй өдөр эсвэл цагийг бий болгоод үзээрэй. Танай гэр бүлийн харилцаа илүү ойр дотно болж байгааг та яваандаа анзаарах болно.

• ХАМТДАА ДАСГАЛ ХИЙХ – Гэр бүлийн гишүүн бүр хийх боломжтой хөнгөн дасгалыг хамтдаа хийгээрэй. Youtube дээр гэр бүлийн дасгал /family exercise/ гэж хайвал сонирхолтой олон хайлт гарч ирдэг шүү.

• ХАМТДАА ДОЛОО ХОНОГИЙН ХООЛНЫ МЕНЮ ГАРГАХ – Өдөр бүр ямар хоол хийх вэ? Гэж бодохгүйгээр гэр бүлээрээ долоо хоногт хийж идэх хоолны меню гаргах тун хөгжилтэй шүү. Меню дагуу хоолны хольцоо худалдан авалт хийн өдөр бүр өөр бас амттай хоолоо хийж идээрэй.

• ГЭР БҮЛЭЭРЭЭ ХАМТДАА ОРОЛЦООТОЙ ХООЛ ХИЙХ – Гэр бүлийн гишүүн бүрийн оролцоотой орон хоолыг хамтдаа хийх ч сонирхолтой шүү. Хүүхэд бүрийнхээ насанд тохирсон бяцхан туслалцааг авч хамтдаа гэр бүлийн хоол хийгээрэй.

• ШИНЭ ЗҮЙЛ ТУРШИХ – Хамтдаа өмнө нь огт туршиж үзээгүй шинэ зүйлс хийж туршаарай. Гэр бүлээрээ иог хийх, шинэ хэл сурах, шинэ төрлийн кино үзэх, шинэ хоолны газрыг нээх, хоолны шинэ жор турших гээд юу ч байж болно.

• ГЭР БҮЛИЙН ТЭМЦЭЭН УРАЛДААН ЗОХИОХ – Гэр бүлийн бяцхан тэмцээн уралдаан зохион байгуулах тун хөгжилтэй шүү. Жишээ нь гэр бүлээрээ 2 баг болоод сэдвээ сонгоод дуугаар өрсөлдөж болох юм. Жишээ нь: Ээжийн тухай дуу, эсвэл ээж гэдэг үг орсон бол доод тал нь дууны нэг мөрийг алдалгүй яг дуулах ёстой. Эсвэл янз бүрийн хөгжилтэй тоглоом олж болох юм. Усаар байлдах ч юм уу.

• АЯЛАЛ ТӨЛӨВЛӨХ – Гэр бүлээрээ өмнө нь очиж байгаагүй газарт очих. Үүнийгээ бяцхан аялал гэж нэрлэн юу, юу хийх талаарх төлөвлөгөөг хүүхэдтэйгээ нийлж гаргаарай. Музей үзэх, паркаар аялах, ууланд алхах гээд аялал эхлэхээс дуусах хүртлээ юу хийхээ төлөвлөөрэй.

• TIK TOK БҮЖИГ СУРАХ – Сошиалд трэнд болж буй tik tok бичлэгүүдийг дууриан хийх эсвэл бүжгийг суран гэр бүлээрээ хөгжилтэй видео хийгээрэй. Хийсэн видеог та заавал сошиалд байршуулахгүй байж болох бөгөөд гэр бүлийнхээ дурсамжийн санд хадгалаарай.

Цэндийн Одонтуяа

 

Энэ мэдээ танд таалагдаж байвал LIKE хийгээрэй. Танд баярлалаа.