С. Лавров ОХУ-ын арми давшилтаа үргэлжлүүлнэ гэв

ОХУ-ын Гадаад харилцааны сайд Сергей Лавров Вашингтон Украинд алсын зайн тусгалт пуужин нэмж илгээнэ гэж мэдэгдсэнтэй холбоотойгоор Москвагийн Украин дахь "цэргийн тусгай ажиллагаа"-ных нь стратеги өөрчлөгдсөн талаар Оросйн төрийн өмчит телевизийн сувагт өгсөн ярилцлагадаа онцолжээ.

Түүний хэлснээр Оросын арми зөвхөн Украины зүүн хязгаарт төвлөрөөд зогсохгүй, аюулгүй байдлаа хангах үүднээс давшилтаа цааш үргэлжлүүлэх аж. Өмнө нь Пентагоны тэргүүн Ллойд Остин Вашингтон Украинд Оросын армийн эсрэг үр дүнтэй тулалдахад нь зориулж алсын зайн тусгалт пуужингийн 4 систем нэмж илгээнэ хэмээн мэдэгдсэн ба ингэснээр Украины арми алсын зайн пуужингийн нийт 16 системтэй болох аж.

Украины тэргүүн хатагтай Ольга Зеленская өнгөрсөн лхагва гарагт АНУ-ын Конгресст хандан "украинчуудын эсрэг үйлдэгдэж буй хэрцгий балмад үйлдлийг зогсооход тусалж" Украины армид агаарын аюулгүй байдлыг хангах зэр зэвсэг нэмж илгээхийг хүссэн байна.

Өнгөрсөн 2-р сараас хойш барууны орнууд Украины армид төрөл бүрийн зэр зэвсэг илгээсээр байгаа нь ОХУ стратегиэ өөрчлөхөд хүргэсэн хэмээн С. Лавров онцолсон байна.

Тэрээр, "В. Зеленскийн хяналтанд байгаа Украины нутаг дэвсгэр манай улсын аюулгүй байдалд заналхийлсэн зэр зэвсэгтэй байхыг бид зөвшөөрөхгүй." хэмээн мэдэгджээ.

Түүний хэлж байгаагаар ОХУ-ын зэвсэгт хүчин Украины өмнөд зүгийн Херсон болон Запорожье мужийг хяналтандаа авах зорилго тавьсан аж.

Эх сурвалж: BBC

Содномцэрэнгийн Энхзаяа 

mongolcom.mn 

Энэ мэдээ танд таалагдаж байвал LIKE хийгээрэй. Танд баярлалаа.