БХЯ-ны дэд сайд А.Баттөр Францад айлчлаад иржээ

Twitter Print
2014 оны 06-р сар 19-нд 15:59 цагт
Мэдээний зураг,

Монгол Улсын Батлан хамгаалахын дэд сайд А.Баттөр Бүгд Найрамдах Франц Улсын Парис хотноо 2014 оны энэ сарын 12-13-нд ажлын айлчлал хийж, 16-17-ны өдрүүдэд зохион байгуулсан "Евросатор 2014" олон улсын батлан хамгаалахын аж үйлдвэрийн үзэсгэлэнд оролцоод иржээ.

Айлчлах хугацаандаа Дэд сайд А.Баттөр БНФУ-ын БХЯ-ны Төрийн нарийн бичгийн дарга Кадер Арифтай хоёр талын уулзалт хийж, хоёр улсын батлан хамгаалах салбарын харилцаа, хамтын ажиллагааны хэрэгжилт, хэтийн төлөвийн талаар ярилцаж, уулзалтын төгсгөлд батлан хамгаалах салбарт хамтран ажиллах тухай хоёр талын техникийн тохиролцоонд гарын үсэг зурав. Тус тохиролцоо нь Монгол Улс, БНФУ-ын хоорондын батлан хамгаалах салбар дахь харилцаа, хамтын ажиллагааны үндэс болсон анхны баримт бичиг болов.

Түүнчлэн дэд сайд А.Баттөр БНФУ-ын БХЯ-ны Зэвсэглэлийн ерөнхий газрын Олон улсын хамтын ажиллагааны газрын дарга генерал С.Рэбтай хоёр талын уулзалт хийж, хоёр талын батлан хамгаалах салбарын харилцааны талаар санал солилцов.

Мөн тэрээр Ази Номхон далайн бүс нутгийн орнуудыг хариуцсан газрын дэд дарга адмирал П.Осёр, Японы Батлан хамгаалахын дэд сайд Рёто Такета нартай тус тус уулзсан байна.

Энэ жилийн "Евросатор 2014"-д 58 улс оролцож, 1.502 төрлийн сүүлийн үеийн зэвсэг, техник, тоног төхөөрөмжөө танилцуулсан нь өмнөх жилүүдээс харьцангуй өргөжсөнийг харуулав. "Thales", "Airbus", "Safran", "MBDA", "Vaylon", "Thalys" компаний удирдлага Дэд сайд А.Баттөрийг хүлээн авч уулзаж, үйл ажиллагааныхаа талаар танилцуулга хийв.

 

Х.Эрдэнэсолонго

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.