Шри Ланкийн хэд хэдэн сайд огцрох хүсэлтээ өгчээ

Шри Ланкийн Ерөнхийлөгч Готабаяа Ражапакса улс даяар онц байдал зарласны дараагаар Шри Ланкийн засгийн газрын хэд хэдэн гишүүн түүний дотор Шри Ланкийн Ерөнхий сайдын хүү, Залуус ба Спортын сайд Намал Ражапакса нар огцрох хүсэлтээ өгчээ.

Орон нутгийн хэвлэлд өгсөн ярилцлагадаа Боловсролын сайл Динэш Гунавардена Ерөнхий сайдад огцрох хүсэлтээ өгсөн, хүсэлтийг нь Ерөнхийлөгч Ерөнхий сайдын хамт хэлэлцэж байгаад зохих шийдээ гаргана хэмээн мэдэгджээ. Огцрох хүсэлтээ Шри Ланкийн загийн газрын гишүүд бүгд өгсөн эсэх нь тодорхойгүй байна.

Залуус ба Спортын сайд Намал Ражапаксагийн хувьд Шри Ланкийн Ерөнхийлөгчийн ач дүү, Ерөнхий сайд Махинда Ражапаксагийн хүү бөгөөд албан тушаалаасаа огцорсноо өөрийн твиттер хуудаснаа бичжээ. Тэрээр уг шийдвэр нь ард иргэд болон засгийн газрын тогтвортой байдлыг хангахад тусална хэмээн найдаж байгаа аж.

Шри Ланка улсын хувьд гадаадын валютын нөөцгүй болсны улмаас шатахуун түлш, хоол хүнс, эм тариа зэрэг нэн шаардлагатай бараа бүтээгдэхүүнүүдээ импортлож авч чадахгүйд хүрээд байгаа юм.

Шри Ланкийн ард иргэд үүссэн нөхцөл байдалд улсынхаа эрх баригчдыг буруутгаж байгаа ба Ерөнхийлөгч Готабаяа Ражапакса төрийн дээд албан тушаалд өөрийн хамаатан саднуудаа томилсон нь Шри Ланкийн эдийн засаг хямралын гол шалтгааны нэг гэж үзэж, жагсаал цуглаан зохион байгуулсаар байгаа билээ.

Эх сурвалж:Reuters

Содномцэрэнгийн Энхзаяа 

mongolcom.mn 

 

Энэ мэдээ танд таалагдаж байвал LIKE хийгээрэй. Танд баярлалаа.