Монгол бахархлын өдрийн барилдаанд улсын начин Н.Баярбаатар түрүүллээ

Twitter Print
2019 оны 11-р сар 27-нд 18:58 цагт
Мэдээний зураг,

Их эзэн Чингис хааны мэндэлсний 857 жилийн ой, Монгол бахархлын өдөр, Бүгд найрамдах улс тунхагласны 95 жилийн ойд зориулсан чансаа өндөр 128  бөхийн барилдаанд улсын аварга Н.Батсуурь, Улсын арслан П.Бүрэнтөгс, Р.Пүрэвдагва тэргүүтэй 128 хүчит бөх зодоглов.

Өнгөрсөн жилүүдэд Улс тунхагласны баяр болон “Монгол бахархлын өдөр”-т зориулсан хүчит бөхийн барилдааныг тус тусад нь зохион байгуулдаг байсан. Харин энэ жил дээрх хоёр баяр энэ сарын 26, 27-нд дараалан болж буй тул хамтад нь зохион байгуулж буйгаараа онцлог юм.

Өнөөдрийн барилдаанд Сэлэнгэ нутгийн хоёр хүчтэн болох Сэлэнгэ аймгийн Цагааннуур сумын харьяат, “Таван хан” дэвжээ, “Хос түрүү” компанийн бөх, улсын начин Б.Орхонбаяр, Мандал сумын харьяат, ОБЕГ-ын “Аврагч” спорт хороо, “Таван хан” бөхийн дэвжээ, “Монзол” компанийн бөх, улсын начин Н.Баярбаатар нар түрүү булаалдаж, Н.Баярбаатар давлаа. Харин их шөвөгт улсын аварга Н.Батсуурь, улсын харцага О.Хангай нар шалгарсан юм. 

Өнгөрсөн жилийн “Монгол бахархлын өдөр”-ийн хүчит бөхийн барилдаанд Дорнод аймгийн Дашбалбар сумын харьяат, Онцгой байдлын ерөнхий газрын “Аврагч” спорт хороо, “Дорнын хүчтэн” дэвжээний бөх, улсын харцага Д.Анар түрүүлсэн юм. Тухайн үед Д.Анар улсын начин цолтой байв. Харин Монгол Улс анхдугаар Үндсэн хуулиа баталж, Бүгд Найрамдах улсаа тунхагласны 94 жилийн ойн хүчит бөхийн барилдаанд Завхан аймгийн Их-Уул сумын харьяат, “Алдар” биеийн тамир, спортын хороо, “Жем Интернэшнл” группийн бөх, Улсын гарьд Б.Гончигдамба түрүүлж байв.

Г.Ганаа 

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.