Бидний нэг том алдаа бол өөрийгөө нөгөө хүндээ 100% ойлгуулж чаддаггүй

Twitter Print
2021 оны 03-р сар 04-нд 16:52 цагт
Мэдээний зураг,

Бидний амьдралын бүхий л түвшинд, бүх хүрээлэлд бүгдээрээ шахуу гаргадаг нэг том алдаа бол яв цав ойлголцож огт чаддаггүй байдал юм. Энэ нь хэлний бэрхшээл энэ тэртэй огт хамаагүй. Гол нь бид бодсон санасан зүйлээ, өөрийн төлөвлөгөө, яах хүсэлтэй, саналтай байгаа зэргээ нөгөө хүндээ 100% ойлгуулж чаддаггүй.

Хаагдмал сэтгэлгээтэй, хар багаасаа айж ичиж, загнуулж өссөн гэмээр, цаад хүндээ яаж сайхан ойлгуулах вэ гэж жаахан хичээхэд л болох зүйл дээр ууртай уцаартай хэдэн ширүүн үг нэг бол хашгирч орхиод, нэг бол хэн ч сонсохооргүй амандаа бувтнаад үлдэхээр тэнд хэвийн сайхан харилцан яриа яаж үүсэх вэ. Нэг талаасаа бүгд л стресс бухимдалтай байгаа нь үнэн. Гэхдээ тэрийгээ байнга сэтгэлдээ тээж явах нь жинхэнэ тээртэй баймаар л юм.

Бас хэдхэн үг хагас дутуу хэлчихээд, нөгөө хүнээ мэргэн цэцнийг нь сорьж байгаа мэт, ингэж хэлэхэд ойлгох л ёстой гэж ханддаг нөхдүүд ч байна. Хамгийн тааламжтай бус нэг асуудал нь бид чинь тиймэрхүү байдлаар тухайн цаг үеийн асуудлыг тэр дор нь ойлголцож шийдвэрлэж чаддаггүй, эсвэл нөгөө л харанхуй уур хилэн, сөрөг сэтгэл хөдлөлдөө дийлдээд тайвнаар, ухаанаа зарцуулж ярилцаж чадаагүй зүйлээ маш удаан хугацаанд бодож, цөөнгүй хэд нь улам хорсож, хор бугшаасаар нэг л өдөр дэлбэрдэг нь харамсалтай. Эсвэл ердөө л үг дуу цөөтэй гэгддэг хүмүүс маань ямар нэгэн шалтгаанаар олны дунд нэг их ярьдаггүй мөртлөө жаахан шоудаад, халаад задраад ирэхээрээ үнэндээ төрөл арилждаг. Энэ нь тэдний угийн даруу хүн байж гэхээсээ илүү өөрийгөө нээх зориггүй, хулчгар гэж ойлгож ч болохоор байдал биш гэж үү...

Гол нь бид хөгшин залуу, дарга цэрэггүй бүгд л хоорондын харилцаанд анхаарал тавьж, харилцан санаа бодлоо ойлголцож чадсан эсэхээ төвөгшөөлгүй дахин нягталж, илүү нээлттэй, илүү харилцаа сайтай, хүндэтгэлтэй байж сурах нь гэр бүл, найз нөхөд, албан ажлын зэрэг амьдралын бүхий л хүрээлэлд үүсээд байдаг, үнэндээ улиг ужиг болчихоод байгаа олон асуудлыг энгийнээр амархаан шийдэж болох нэг гарц гэж боддог шүү. Шилдэг, өндөр хөгжилтэй улсын шилдэг баг хамт олон нэг бие организм мэт ойлголцож, хамтарч нэгдэж чаддаг учраас л тэд тэгж хөгжөөд байгаа юм. Харин бидний жишээ бол бүгд л дор бүрнээ мундаг, төгс нөхдүүд, дутагдаад байгаа юм нь эгогоо жаахан дараад эргэн тойрныхноо ойлгож харилцах communication талдаа л анхаармаар байх юм.

Миний ч чиний ч ажил хэрэг өөрийгөө ч сайн ойлгуулж, нөгөө хүнээ ч сайтар ойлгосны үндсэн дээр бүтэмжтэй байх нь уг нь хэнд ч ойлгомжтой баймаар юм. Гэтэл юм ярих харилцахад ойлгоод байгаа ч юм уу үгүй ч юм уу , за ок, болох байх зэргээр хариулаад ярилцаад бүгдээрээ сурчихсан дасчихсан гэмээр, ийм байдлаар бид урагшаа явахгүй шүү дээ үнэндээ...

Зарим нэг нөхдүүд бас өөрсдийгөө л дөвийлгөж, өөрийгөө л олонд харуулах гэж их хичээж, хашгирах хүсэлтэй байх юм. Харин өөрөөс нь илүү мэдлэгтэй улсууд чимээгүйхэн хараад сууж байгааг огт олж хардаггүй, эсвэл харахыг хүсэхгүй байх жишээний... Одоо бол бүгд л мундаг лекц, сургалтанд сууж олон сайхан зүйлийг сурч хөгжиж байна. Харин харилцан ойлголцох тал дээр бүр хамгийн илүүтэй анхаарч хөгжүүлмээр байна. Чи хичнээн төгс болж хөгжсөн ч өөрийгөө бусдад ойлгуулж чадахгүй бол ач тус нь бусдад наалдахгүй.

Хүн бол сүргийн амьтан гэдэг. Нийгмийн амьтан ч гэх нь бий. Аль аль бөөгнөрч хамтарч, бие биенээсээ салшгүй хамааралтай болсон хэв маягийн бүтэц юм, тэгэхээр бидэнд харилцан ойлголцол хамгаас чухал билээ. Тайван сайхан ярилцдаг, нээлттэй, хүлээцтэй байж сурцгаая залуусаа, найзуудаа хөгшчүүлээ...

Уламжлалт Анагаах ухааны эмч Намхайдоржийн Цогтмандах

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.