Одоо Голомтын Баясгалангийн найрлах ээлж

ЖЕНКОГООС БАЯСГАЛАНД ОЧСОН ТӨМӨР ЗАМ БА ОДОО ГОЛОМТ БАНК ТӨМӨР ЗАМААР ОРЖ ИРСЭН МӨНГИЙГ УГААНА

Гашуунсухайт – Тавантолгой чиглэлийн төмөр замыг Женко барих гэж байсан, бараг барьсан гэж хүмүүс андуураад байна. Зориуд тийм андуурлыг бий болгох зорилготой бичвэрүүд ч, бичээчид ч олон байна. Гэвч Женкогийн дөрвөн компани Баянгол зочид буудалд байрлан ТЭЗҮ/техник эдийн засгийн үндэслэл/ хийх нэрийдлээр 7.3 тэрбум төгрөг зарцуулсан ч ТЭЗҮ нь батлагдаагүй.

Мөн Зүүнбаян – Тавантолгой чиглэлд төмөр зам тавина. Сайншандын Аж үйлдвэрийн парк байгуулна гэж хэлээд ЧИНГИС БОНДООС 197 сая ам.доллар авч, тууз хайчлан Хятадын компаниас 60 гаруй сая ам.долларын галт тэрэгний зүтгүүр авчирч, сүрийг үзүүлснээс цааш шалиагүй.

Гашуунсухайт – Тавантолгой чиглэлийн төмөр замын ажлыг эхлүүлж Женко газар шорооны ажил гүйцэтгэсэн. Гэсэн ч ажил хийсэн компаниудынхаа мөнгийг төлөөгүйгээс болж ажил нь зогссон. Улмаар цэргүүдийн аваачиж баахан сүрийг үзүүлсэн ч ажил яваагүй. Дараа нь түүний бие хамгаалагч байсан Б.Батзаяа гэх залуу Монголын төмөр зам ТӨХК-ийн захирал болж, А.Гансүхтэй нийлж ОХУ-аас мөн л төмөр замын ажлыг урагшуулах зорилготой 20 гаруй сая ам.доллар аваад алга болсон. Одоо фотошопоор янзалсан хэдэн зураг л тэдэнд үлдэж, харин мөнгө нь хаачсан юм бүү мэд!

Женкод хамааралтай зөвхөн төмөр зам барихтай холбоотой авч идсэн мөнгө тоолж баршгүй. Асар их мөнгө алга болсон ч төмөр зам нь даанч баригдаагүй. Өөрөөр хэлбэл ЖЕНКО ЗУУНЫ ШИЛДЭГ ЗАЛИЛАН МЭХЛЭЛТЭЭС ӨӨР ЮУ Ч ХИЙГЭЭГҮЙ.

Ингээд өөрөө чадаагүй учраас ГОЛОМТ БАНК буюу Д.БАЯСГАЛАНД өгөх ёстой өр төлбөрийнхөө оронд Гашуунсухайт – Тавантолгой чиглэлийн төмөр замын ажлыг ТЕНДЕРГҮЙГЭЭР шууд өгчихсөн. Тэр зүгээр ч өгчихөөгүй ЭНЭ БҮХ МЭДЭЭЛЛИЙГ НЬ ТӨРИЙН НУУЦАД ХАМААРУУЛЖ, нуун далдалж байгаад өгсөн нь сонирхолтой.

Тодруулбал, Х.Баттулга Ерөнхийлөгч байхдаа /2018 он / Үндэсний аюулгүй байдлын зөвлөлийн хурлаар төмөр зам барих асуудлыг оруулж, төмөр замд хэн, хаанаас хэдэн төгрөг оруулж гаргах асуудлыг бүгдийг нь нууцалсан явдал юм. Тэгэхээр энэ төмөр замын тухай бидний хамгийн ихээр сонирхож буй хөрөнгө оруулалт, захиран зарцуулалтын тухай мэдээллүүд бүгд нууц гэсэн үг.

ҮАБЗ-ийн 2018 оны нууц зөвлөмж гарсны дараа Тавантолгой – Гашуунсухайт чиглэлийн төмөр замын гүйцэтгэгчээр “Бодь интернэйшнл” групп буюу Д.Баясгалангийн компани шалгарсан. Мөн зөвлөмжийн дагуу Засгийн газраас хоёр удаагийн тогтоож гарч, “Эрдэнэс Тавантолгой”, “Монголын төмөр зам”-ын хамтын эзэмшлийн “Тавантолгой төмөр зам” компани байгуулагдсан. Ингээд “Эрдэнэс Тавантолгой” компани нүүрсээ урьдчилан боруулах замаар төмөр замын ажлыг санхүүжүүлэх үүрэг хүлээсэн юм. Өөрөөр хэлбэл Д.Баясгалан бус нөгөө нүүрс л энэ их ажлыг санхүүжүүлж байсан болж таарч байна.

Үүнээс гадна Д.Баясгалан 1520 мм буюу өргөн царигтай Хятад руу шууд нэвтрэх боломжгүй мухар төмөр зам тавьж өгснийхөө хариуд Тавантолгой нүүрсний 10 хувийг 60 сарын хугацаанд борлуулж өөрийн зардлыг нөхөн авна гэсэн тохироо хийжээ.

Энэ ойролцоогоор 1.5 тэрбум ам.долларын тухай яригдаж байгаа юм.

Энэ төмөр зам үүргээ биелүүлдэг болтол ахиад хэчнээн ч тэрбум ам.доллар алга болохыг хэлэхэд бэрх. Ямартай ч Монгол Улс хоёр тэрбум орчим ам.долларыг хятадын талтай холбогдоогүй мухар төмөр зам барихад зарцуулж 10 гаруй жил найрлачихлаа.

ОДОО ГОЛОМТЫН Д.БАЯСГАЛАНГИЙН НАЙРЛАХ ЭЭЛЖ

Тэр төмөр замын ажлын гүйцэтгэгч болмогцоо ажлын бүхий л төмөр тооцоо бүгд зөвхөн “ГОЛОМТ БАНКААР ДАМЖИХ ЁСТОЙ” гээд шийдвэрлэчихсэн. Асар их мөнгө голомтоор дамжина, байршина, тэндээ хүүлэгдэж, мөнгө угаагдана.

МӨНГӨ УГААГДАХААС ӨМНӨ, Д.Баясгалан өөрийн эхнэр Ч.Мөнхцэцэгээс салсан гэж хэвлэлээр мэдээллэв. Мөн Ч.Мөнхцэцэг Голомт банкны ТУЗ-ийн дарга болов. Эндээс өнгөц харахад Д.Баясгаланд голомт банк хамаагүй болж, салсан эхнэр нь удирддаг болжээ гэж ойлгогдохоор. Зориуд тэгэж ойлгуулах оролдож байгаа нь тэр л дээ. Одоо голомт банкны ТУЗ-д Д.Баясгалан байхгүй. Тэгсэн атлаа тус банкны хамгийн том буюу 87.16 хувийн эзэмшигч Голомт Файнэншил Групп ХХК-ийг Д.Баясгалан ганцаараа 100 хувь эзэмшдэг. Мөн 4 орчим хувийг эзэмшдэг Бодь Интернэшнл ХХК-ийг салсан эхнэр Ч.Мөнхцэцэгийнхээ хамтаар хуваан эзэмшиж байна.

Нөгөө Тавантолгой – Гашуунсухайт чиглэлийн төмөр замын гүйцэтгэгчээр шалгарсан “Бодь интернэйшнл” шүү дээ.

Тэгэхээр бидний тооцоолсон Тавантолгой нүүрсний 10 хувийг 60 сарын хугацаанд борлуулж олох 1.5 тэрбум ам.долларыг Д.Баясгалангийн салсан эхнэр Ч.Мөнхцэцэг “УГААХ” ажиллагааг гүйцэтгэнэ гэж хардаж болохоор байна. Салсан эхнэр Д.Баясгаланд хамааралгүй МЭТ харагдуулах. Цаашлаад ямар нэг асуудал үүсэхэд хууль хяналтынхан нэг хэсэгтэй төөрч будилахаар. Тэгээд ч ҮАБЗ-ийн “НУУЦ” дардас ихээхэн дэм болно. Дараагийн дугаарт Д.Баясгалангийн салсан эхнэр Ч.Мөнхцэцэг хэрхэн мөнгө угаадаг талаар өгүүлэх болно.

Төмөрдашийн Баярхүү

 

Энэ мэдээ танд таалагдаж байвал LIKE хийгээрэй. Танд баярлалаа.