В.Путин Беларус руу илгээх цагдаа нараас бүрдсэн багийг бүрдүүлжээ

Twitter Print
2020 оны 08-р сар 28-нд 12:42 цагт
Мэдээний зураг,

ОХУ-ын Ерөнхийлөгч Владимир Путин Беларусийн Ерөнхийлөгч А. Лукашенкод шаардлагатай тохиолдолд тусламж дэмжлэг үзүүлэхээ мэдэгджээ. Тэрээр Беларус дахь нөхцөл байдал хяналтаас гарсан тохиолдолд Беларус руу цагдаагийн албан хаагчдаас бүрдсэн тусгай баг илгээнэ гэжээ.

ОХУ-ын Ерөнхийлөгч В.Путин уг мэдэгдлээрээ ОХУ шаардлагатай тохиолдолд Беларусын иргэдийн эсрэг хүч хэрэглэнэ гэдгээ ил тод мэдэгдлээ хэмээн олон улсын хэвлэл мэдээллүүд онцолж байна. Ерөнхийлөгч В.Путин мэдэгдэлдээ, "Мэдээж бидэнд Беларусын өмнө хүлээсэн үүрэг бий. А.Лукашенко ОХУ Беларуст шаардлагатай тусламж дэмжлэгийг үзүүлэх эсэхийг асуусан. Хариуд нь би ОХУ Беларусын өмнө хүлээсэн бүх үүргээ хариуцлагатайгаар биелүүлнэ гэдгийг хэлсэн. Александр Григорьевич надаас цагдаагийн тусгай баг бүрдүүлэхийг хүссэн. Би ч хүсэлтийг нь биелүүлсэн. Гэхдээ бид хоёр тус багийг зөвхөн нөхцөл байдал хяналтаас гарсан онцгой тохиолдолд л ашиглана гэсэн зөвшилцөлд хүрсэн." Гэжээ.

Энэ сарын 9-нд болсон Ерөнхийлөгчийн сонгуулийн үр дүнг эсэргүүцсэн беларусчууд Ерөнхийлөгч А.Лукашенког огцрохыг шаардан эсэргүүцлийн жагсаал цуглаан зохион байгуулсаар байгаа билээ. Беларусийн сөрөг хүчнийхэн В.Путины уг мэдэгдэл олон улсын хуулийг зөрчиж байна хэмээн үзэж байна. Беларустай хиллэдэг, НАТО-гийн гишүүн орон болох Польшийн Ерөнхий сайд Матеуш Моравецкий нөхцөл байдлыг хяналтанд авна гэсэн худал шалтаг шалтгаанаар Беларуст цэрэг цагдаагийн хүч оруулах төлөвлөгөөгөө ОХУ-аас цуцлахыг шаарджээ. Түүний онцолсноор ОХУ-ын уг алхам Беларусийн иргэдийн эрх, эрх чөлөөг болон ОУ-ын хуулийг зөрчиж байгаа аж.

Ерөнхийлөгчийн сонгуулиас хойш Беларус дахь нөхцөл байдал тогтворгүй байгаа ба хууль сахиулагчид жагсагчдын эсрэг хүч хэрэглэж, хэдэн мянган иргэдийг баривчлаад байгаа юм. Өнгөрсөн пүрэв гарагт Минск хотын төв талбай дээр 1000 орчим иргэд цугларсан ба цагдаа нар тэдгээр иргэдийн дийлэнхийг нь баривчилжээ. Иргэдийн цуглааныг сурвалжилж байсан 20 орчим сэтгүүлчдийн гар утас, үнэмлэх зэргийг нь хураан авч баривчилсан ч удалгүй суллажээ.

Эх сурвалж: BBC

Содномцэрэнгийн Энхзаяа

mongolcom.mn

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.