Токиогийн Олимпийн наадмаар халдвар тархах эрсдэл байгааг анхааруулжээ

Twitter Print
2021 оны 06-р сар 08-нд 11:40 цагт
Мэдээний зураг,

Японы Тохокү их сургуулийн профессор, вирус судлаач, Японы засгийн газрын зөвлөх Хироши Ошитани Токиогийн Олимпийн наадмын үеэр коронавирусын тархалт нэмэгдэх эрсдэлтэй болохыг анхааруулжээ.

Тэрээр, "Японы засгийн газар болон Олимпийн наадмыг зохион байгуулагчид тэр дундаа ОУОХ Олимпийн наадмыг аюулгүй зохион байгуулна гэж удаа дараа мэдэгдээд байгаа. Гэхдээ бүгд эрсдэлтэй гэдгийг мэдэж байгаа. Олимпийн наадмыг ямар ч эрсдэлгүй буюу Олимпийн наадмын дараа Японд эсвэл бусад улс орнуудад коронавирусын халдвар тараахгүйгээр зохион байгуулна гэж байхгүй. Зарим улсад коронавирусын халдварын тохиолдлууд цөөн, зарим улс орнуудад коронавирусын мутацид орсон хэлбэр бүртгэгдээгүй байгаа. Бид Олимпийн наадмаар эдгээр улс орнуудад вирус тараамааргүй байна." хэмээн дийлэнх улс орнуудад коронавирусын эсрэг вакцины хомсдол үүсээд байгаа гэдгийг ойлгох хэрэгтэйг онцолжээ.

2020 онд болох байсан Токиогийн Олимпийн наадам коронавирусын цар тахлын улмаас нэг жилээр хойшлогдсон ба ирэх сарын 23-нд болох Олимпийн наадам анх удаа гадаадын үзэгчидгүй болж өнгөрөх юм. Коронавирусын 4 дэх давалгаанд өртсөн Японд коронавирусын нийт 760 мянган тохиолдол бүртгэгдсэн ба уг вирусын халдварын улмаас 13 500 хүн нас баржээ.

Токио болон Японы зарим бүс нутгуудад онц байдал зарлаад байгаа билээ. Олимпийн марафон явагдах Хоккайдо арлын үйлдвэрчний эвлэл Олимпийн наадмыг цуцлахыг уриалсан хүсэлт гаргажээ.

Японы Олимпийн хорооны гишүүн, 1988 оны Олимпийн хүрэл медальт жүдоч Каоои Ямагучи Япон улс Олимпийн наадмыг зохион байгуулахаас өөр аргагүйд хүрсэн хэмээн ярьжээ.

Япончууд Токиогийн Олимпийн наадмыг зохион байгуулах тал дээр хоёр хуваагдсан хэвээр байна. Гэхдээ TBS сувгаас энэ долоо хоногт хийсэн судалгаагаар япончуудын 55 хувь нь Олимпийн наадмыг хойшлуулах эсвэл цуцлахыг дэмжсэн хэмээн гарсан нь өнгөрсөн сарынхаас 10 хувиар буурсан үзүүлэлт аж.

Эх сурвалж: https://www.reuters.com/article/us-olympics-2020

Содномцэрэнгийн Энхзаяа

mongolcom.mn

 

Энэ мэдээ танд таалагдаж байвал LIKE хийгээрэй. Танд баярлалаа.
Манай сайт танд таалагдаж байвал LIKE хийгээрэй. Танд баярлалаа.
    АНХААР! Та сэтгэгдэл бичихдээ хууль зүйн болон ёс суртахууныг баримтална уу. Ёс бус сэтгэгдлийг админ устгах эрхтэй. Мэдээний сэтгэгдэлд www.mongolcom.mn хариуцлага хүлээхгүй.